Hatutan.com, (04 Abríl 2023), Díli—Governu ofisialmente asina akordu ho Komisaun konstrusaun Igreja foun Parókia São Paulo Lospalos, hodi oferese subvensaun públiku millaun $1.

Governu ofisialmente asina akordu ho Komisaun konstrusaun Igreja foun Parókia São Paulo Lospalos, hodi oferese subvensaun públiku millaun $1, iha Ministériu Finansas, Aitarak Laran, Díli, Tersa (04/04/2023). Foto/ Lazaro Pereira Quefi.

Serimónia asinatura akordu ne’e reprezenta hosi Ministru Finansas (MF), Rui Agusto Gomes ho Prezidente Komisaun Konstrusaun Igreja Foun São Paulo Lospalos, Júlio Maria de Jesus Canto, iha Ministériu Finansas, Aitarak Laran, Díli, Tersa (04/04/2023).

Lee Mós: Xefe Estadu Promulga OJE 2023 Billiaun $2,16

Administradór Dioseze Baucau, Padre Alípio Gusmão, Provinsiál Salesiano Timor-Leste, Padre Anacleto Pires, SDB ho Pároku Parókia São Paulo Lospalos, Padre Venâncio Fátima Freitas, SDB mak sai sasin bá serimónia ne’e.

Iha intervensaun, Ministru Rui Gomes lori Governu nia naran kongratula komisaun ne’ebé sei tau-matan ba konstrusaun Igreja foun ne’e rasik no deseza susesu iha implementasaun.

“Husu bá Komisaun Konstrusaun atu fornese relatóriu, assegura transparénsia ba despeza sira, halo boa jestaun ba rekursu ne’ebé iha no fiskaliza atividade tomak durante prosesu konstrusaun,” Rui Gomes reprezenta Governu husu ba Komisaun.

Governu Timor-Leste oferese subvensaun públiku ne’e ba Igreja Katólica liu hosi Parókia São Paulo Lospalos atu konstrui Igreja Foun São Paulo Lospalos, Munisípiu Lautém.

Governu ofisialmente asina akordu ho Komisaun konstrusaun Igreja foun Parókia São Paulo Lospalos, hodi oferese subvensaun públiku millaun $1, iha Ministériu Finansas, Aitarak Laran, Díli, Tersa (04/04/2023). Foto/ Lazaro Pereira Quefi.

Ministru Finansas mós sita Lei númeru 15/2022, 21 Dezembru, aprova Orsamentu Jerál Estadu (OJE) bá tinan 2023.

“Iha OJE 2023, inskrita iha rúbrika títulu orsamentál ‘Dotacão Geral do Estado’, finansiamentu despezas ba Konstrusaun Igreja Foun Parókia São Paulo Lospalos iha Munisípiu Lautém ho montante millaun $1,” nia hateten.

Iha artigu 33.º, númeru 4 hosi Lei númeru 2/2022, Enkuadramentu Orsamentu Jerál Estadu no Jestaun Finanseira Públikas, títulu orsamentál ‘Dotação Geral do Estado’ jere hosi membru Governu responsável iha área finansas.

Bazeia ba Dekretu Governu númeru 1/2009, 18 Fevereiru, atribuisaun montante subvensaun públiku millaun $1 ba Komisaun Konstrusaun Igreja Foun Parókia São Paulo Lospalos tenke liu hosi selebrasaun akordu subvensaun públiku ida entre Governu Timor-Leste no Komisaun ne’e rasik.

Selebrasaun akordu ne’e bazeia bá Despaixu númeru 020/PM/III/2023, 13 Marsu 2023, Primeiru-Ministru, Taur Matan Ruak delega kompeténsia ba Ministru Finansas atu negosia no asina kontratu subvensaun públiku ba finansiamentu despezas relasiona ho konstrusaun Igreja Foun Parókia São Paulo Lospalos.

Jornalista Estajiáriu : Lazaro Pereira Quefi