Connect with us
Pakote Ahi

Nasionál

Xanana-Lú Olo-TMR-Alkatiri Auzénsia iha Serimónia Loron Nasionál Veteranu

Published

on

Hatutan.com, (03 Marsu 2023), Díli-Povu Timor-Leste, liuliu veteranu sira, Sesta (3/3/2023), selebra loron nasionál veteranu bá dala-VI ne’ebé hala’o ho serimónia hasa’e bandeira nasionál RDTL, bandeira FALINTIL, bandeira FRETILIN no parade militár iha resintu Palásiu Governu nian.

Lee Mós : Governu ho CCLN Pendente Validasaun Dadus Veteranu Sira Ne’ebé Rejista iha 2009


Marxa hosi komemora loron nasionál veteranu, 03 fulan-Marsu 2023. Foto/Elio dos Santos da Costa

Loron nasionál veteranu ne’e hanesan onra boot no orgullu  bá povu Timor-Leste tanba Estadu rekoñese veteranu sira-nia luta, dedikasaun no sakrifísiu hodi nakfilak rai ida-ne’e sai nasaun soberanu no independente liuhosi restaurasaun independénsia iha loron 20 fulan-Maiu 2002.  

Iha komemorasaun loron nasionál veteranu, tinan ne’e, ne’ebé hala’o iha Palásiu Governu, la hanesan tinan sira liubá. Ezemplu iha loron 02 fulan-Marsu 2018,  iha serimónia komemorasaun loron veteranu nian loke ho semináriu ne’ebé  konta ho intervensaun hosi Prezidente Repúblika, Francisco Guterres “Lú Olo”, hosi Primeiru-Ministru, Marí Alkatiri, hosi Vise Komandante ein-Xefe FALINTIL  no eis-Prezidente Repúblika, Taur Matan Ruak, no Sekretáriu Estadu Veteranu nian, André da Costa Belo (L4). 

Advertisement

Iha fali loron 03 fulan-Marsu, tempu ne’ebá, halo serimónia lansamentu “Prasa Proklamasaun Independénsia”, besik Palásiu Governu nian, ne’ebé prezide husi Primeiru-Ministru, Taur Matan Ruak no partisipa hosi alta entidade sira hotu, inklui partidu polítiku nia emar sira. Mezmu Komandante ein-Xefe FALINTIL, Kay Rala Xanana Gusmão rasik la partisipa tanba iha diverjénsia polítika ho Sekretáriu Jerál Partidu FRETILIN, Marí Alkatiri, prezidente Repúblika altura ne’ebá Francisco Guterres “Lú Olo” ho Primeiru-Ministru (PM), Taur Matan Ruak.

Loron 03 fulan-Marsu nian hetan rekoñesimenru hanesan Loron Nasionál Veteranu sira nian hodi refleta loron istóriku kona-bá Konferénsia Nasionál FRETILIN nian dahuluk, harii Conselho Nacional da Resistência Timorense, no hili Xanana Gusmão hanesan Komisáriu Polítiku FRETILIN no Komandante ein-Xefe FALINTIL nian.

Serimónia loron nasionál veteranu 2023 sai hanesan loron ida triste bá veteranu sira. Tanba veteranu hosi munisípiu 13 partisipa, maibé  “maun-boot”  ka mata-dalan veteranu sira-nian, Komandante ein-Xefe FALINTIL, Kay Rala Xanana Gusmão ho Taur Matan Ruak, Francisco Guterres “Lú-Olo” ho Marí Alkatiria uzénsia iha serimónia ne’e.


Marxa hosi komemora loron nasionál veteranu, 03 fulan-Marsu 2023. Foto/Elio dos Santos da Costa

Veterana Madalena Bidau “Kasian” nu’udár feto ida ne’ebé uluk fó mós nia kontribuisaun másima bá Timor-Leste nia luta naruk to’o ukun rasik-aan triste ho auzénsia hosi lider nasionál sira nian iha serimónia komemorasaun loron nasionál veteranu nian ne’e.

Serimónia ho hasa’e RDTL, Bandeira FALINTIL no Bandeira FRETILIN  nian ne’e prezensa hosi Veteranu ne’ebé oras ne’e fila bá vida sivíl, eis Tenente Jenerál Reformadu Titó Cristóvão da Costa “Lere Anan Timur”, José Agostinho Sequeira “Somotxo”, Veteranu sira hosi  munisípiu 13, Prezidente Tribunál Rekursu (PTR), Deolindo dos Santos, Prokuradór Jerál Repúblika (PGR-sigla portugés), Alfonso López, Prezidente Parlamentu Nasionál (PPN), Aniceto Longuinhos Guterres, sidadaun militár, sivíl inklui populasaun sira iha kapitál Díli. Maibé Xanana ho Taur Matan Ruak, Marí Alkatiri auzénsia la ho razaun klaru.

Prezidente Repúblika, José Ramos-Horta mós la marka prezensa iha serimónia ne’e tanba tuir informasaun katak Prezidente Repúblika iha loron ne’e tenke hala’o vizita Estadu bá rai-li’ur.

Advertisement

“Agora, ami nia deskontente, ladún kontente di’ak liu maka, bainhira nai-ulun sira nia prezensa laiha. Bainhira Maun Xanana laiha, maun Lú-Olo laiha, maun Alkatiri laiha, maun Taur Matan Ruak laiha, maun Prezidente José Ramos-Horta laiha. Bele husik maun Lere mesak, bele husik maun Somotxo, husik Prezidente Parlamentu Nasionál, maun Aniceto Guterres, mesak hasoru malu ho ami,” Veterana Madalena Bidau “Kasian” hateten.

“Ami sente katak, hanesan aman, hanesan avó, laiha ami nia sorin, sente laran moras. Hanesan ne’e, aban-bain-rua bá oin, maun sira hamutuk para atu bele komanda dezenvolvimentu ne’e la’o di’ak bá para haburas Timor ka lae?, tanba ne’e, ha’u husu responsabilidade maun-boot sira nian,” Veterana Kasian hateten ho triste.

Serímonia loron nasionál veteranu, 03 fulan-Marsu 2023 iha Palásiu Governu. Foto/Elio dos Santos da Costa

Kasian  husu nia maun-boot sira tenke ko’alia polítika barak liu kona-bá dezenvolvimentu, atu haburas Timor, atu tau matan bá Timor nia moris, atu tau matan bá veteranu sira-nia oan sira, veteranu nia fen, oan kiak sira hotu, atu bele hamutuk hadi’a nasaun Timor-Leste.

Veterana Kasian dehan, nia ko’alia la’ós atu reklama bá nia ninia moris. Nia ko’alia, hakarak reklama bá Timor nia di’ak. Timor nia di’ak, aban-bain-rua, ema seluk bele gaba katak, Timor hatene ukun-rasik aan, no hatene mós dezenvolve rasik bá ninia nasaun.

“Tanba ne’e, ha’u hakarak liu-liu Maun-boot sira tenke hamutuk ho Veteranu sira para atu bele halo buat ruma bá rai ida ne’e. La’ós Veteranu de’it mak família moris kiak, populasaun ne’ebé mak iha Timor-Leste laran tomak, to’o agora, ita hatene ona, balu ke hetan di’ak, balu mak ladi’ak,” Veterana “Kasian” kestiona.

Iha era ukun-aan ne’e, balu ne’ebé mak Veteranu sira bele hetan netik osan, mais balu ne’ebé la hetan, halerik nafatin, ko’alia liafuan barak nafatin, sira rona to’o sira-nia tilun diuk. Dala-ruma sira ne’ebé hanesan Veteranu no Veterana hanoin, ajuda netik sira nia nesesidade.

Advertisement

Jornalista: Rogério Pereira Cárceres

 

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

Kinta-Feira Santa, Jesus Presta Mensajen Domin no Haraik Aan Molok Husik Hela Mundu

Published

on

Hatutan.com, (28 Marsu 2024), Díli—Sarani Katóliku iha mundu, inklui Timor-Leste, Kinta (28/03/2024), selebra misa Kinta-Feira Santa, hanesan loron dahuluk semana Santa nian, hodi hanoin hikas mensajen partikular Jesus Kristu nian molok Nia husik hela mundu ne’e.

(more…)

Kontinua Le'e

Nasionál

Paspor Timor Leste Terkuat ke-Empat di ASEAN

Published

on

Hatutan.com, (28 Maret 2024), Dili Indeks kekuatan paspor 2024 yang dirilis Henley Passport Index memposisikan paspor Timor Leste atau Republik Demokratik Timor Leste (RDTL) lebih kuat ke-empat di ASEAN dan bertengger di posisi ke-56 perigkat dunia, unggul 10 peringkat dari Indonesia.

(more…)

Kontinua Le'e

Nasionál

Xanana Halo Hela Avaliasaun bá Membru Governu Sira

Published

on

Hatutan.com, (28 Marsu 2024), DíliPrimeiru-Ministru (PM) Kay Rala Xanana Gusmão, halo hela avaliasaun bá membru Governu hotu hodi haree dezempeñu servisu membru Governu ida-idak nian.

(more…)

Kontinua Le'e
Advertisement

Trending