Hatutan.com, (21 Marsu 2023), Díli-Polísia Nasionál Timor-Leste (PNTL), Segunda (20/03/2023), hale’u tuku 21:12 Otl, kaptura no detein tán ona suspeitu na’in-ualu (8),  kompostu hosi mane  na’in-hitu (7) ho feto na’in-ida (1).

Lee Mós : Kazu Culau-Becora, Polísia Detein Joven Na’in-tolu

Suspeitu na’in-ualu ne’e, PNTL kaptura tanba deskonfia sai hanesan autór bá kazu insidente sona-malu ne’ebé mak akontese iha área Culau, Suku Becora, Postu Administrativu Cristo Rei, Díli, Domingu (19/03/2023),  hale’u tuku 21:35 Otl.

Advertisement

Hafoin kapturasaun, ekipa sira PNTL nian iha terrenu, transporta suspeitu nain-ualu lori  bá iha Komandu PNTL Munisípiu Dili, entrega bá investigadór sira, no halo ona mós detensaun iha Sela Detensaun Caicoli.

Komandante PNTL Munisípiu Díli, Superintendente Xefe Polísia Natércia Eufrasia Soares Martins. Foto/Elio dos Santos da Costa

“Liuhosi 24 oras, suspeitu sira totál na’in-ualu (8), mane hitu (7) no feto ida (1), ita kaptura, ita detein hotu,” Komandante PNTL Munisípiu Díli, Superintendente Xefe Polísia Natércia Eufrasia Soares Martins informa ba jornalista sira iha Akadémia PNTL, Comoro, Díli, Tersa (21/03/2023).

La’ós ne’e de’it, komandante Natercia informa, hafoin akontesimentu kazu ne’e, suspeitu ka autór prinsipal ne’ebé sona vitíma na’in-tolu, ida mate, no nain-rua seluk kanek todan ne’e, entrega aan kedan bá autoridade polisial.

Ekipa Investigadór sira iha Komandu Díli, sumbete ona auto-notísia kazu ne’e nian bá iha Ministériu Públiku (PM). Tanba ne’e, hafoin kumpri tiha oras 72 iha Sela Detensaun sei submete kedan bá Prosesu Primeiru Interrogatóriu Judisial iha Tribunál Distritál Dili (TDD).

Kazu Ne’e La’ós entre GAM-GAR

Iha biban ne’e, Komandante Natércia afirma, kazu insidente sona-malu iha Culau-Becora ne’e, la’ós envolve hosi membru Grupu Arte Marsiál (GAM) ho Grupu Arte Rituál (GAR), maibé kazu ne’e mosu entre individu.

Advertisement

Maske iha média sosial sira, Facebook ema lansa informasaun katak, kazu ne’e mosu entre membru GAM ho GAR, maibé, ida ne’e, laloos.

“Kazu ne’e, sim, ha’u hanoin, ne’e oportunidade di’ak, para hato’o mós, kazu ne’e, loloos ne’e, mai hosi individu. Ne’e la’ós ligadu ho Organizasaun artes marsiál. Maibé, hakarak atu hatete bá públiku katak, problema ne’e, problema partikular, entre feto ho mane, no depois maka sai tiha bá krime,” Komandante Polísia Natércia konfirma.

Joven mane na’in-tolu ne’ebé sai vítima bá kazu ne’e mak, Eduardo Francisco da Costa (20), transporta bá Hospitál Nacional Guido Valadáres (HNGV), Bidau, Díli, mak hokotu iis ka mate, Rogério dos Santos (21) kanek kaman ho Benjamin dos Santos (32), kanek todan. Oras ne’e, vitima nain-rua kontinua halo tratamentu intensivu iha HNGV.

Jornalista: Rogério Pereira Cárceres

Advertisement