Hatutan.com, (22 Marsu 2023), Díli—Tribunál Justisa bá Primeiru Interrogatóriu Judisiál (TJPIJ) deside aplika medida koasaun Prizaun Preventiva bá arguidu ho inisial FA, tanba iha indísiu forte bá kazu krime ne’ebé akontese iha área Culau, Suku Becora, Postu Administrativu Cristo Rei, Dili, Domingu (19/03/2023).

Suspeitu na’in-ualu (8) ho inisiál AL, FL, JH, GJA, ASG, JMC, AL inklui feto ida ho inisiál EMSA ne’ebé deskonfia involve iha kazu oemesidiu Culau, Becora, bainhira iha hela eskuadra PNTL Cristo Rei. Foto/PNTL.

Iha kuarta 22 marsu 2023, Polisia Nasionál Timor-Leste (PNTL), liuhosi Komandu Munisipiu Dili submete ona suspeitu na’in-ualu (8) ho inisiál AL, FL, JH, GJA, ASG, JMC, AL inklui feto ida ho inisiál EMSA hodi tuir prosesu primeiru interrogatóriu judisial, tanba deskonfia involve nu’udár suspeitu bá kazu insidente sona-malu iha Culau-Becora.

Lee Mós: Kazu Culau-Becora, Suspeitu Na’in-Ualu

Maibé, prosesu interrogatóriu ne’e taka bá públiku no tuir promosaun hosi Ministériu Públiku (MP), liuhosi Prokuradór Claudino do Rosário, promove krime tolu bá arguidu sira mak hanesan, Krime Omesídiu Simplés, Krime Tentativa Omesídiu no Krime Arma Branka.

Advertisement

Hafoin prosesu primeiru interrogatóriu judisiál ne’e, Tribunál deside aplika medida koasaun Prizaun Preventiva bá Arguidu FA, Arguidu na’in-tolu (3) bá halo Aprezentasaun Periódika (AP), no Arguidu na’in-haat seluk hetan Termu Identidade Rezidénsia (TIR).

“Tribunál aplika medida prizaun preventiva ba arguidu F, tanba dehan iha indisius forte. Na’in-tolu hetan aprezentasaun periódika, restu hosi ne’e hetan medida termu-de- indentidade rezidénsia,” Manuel Exposto hateten hafoin rona despaixu ikus hosi Tribunál bá nia kliente sira iha TJPIJ, Kuarta (22/03/2023).

Iha primeiru interrogatóriu juidisiál ne’e mós MP promove krime tolu bá arguidu sira, tanba krime Omesidu simplés mak halo vítima Nilton da Costa Alves (20) lakon-vida, krime arma branka mak kro’at ne’ebé uza no krime tentativa Omesidu mak oras ne’e daudaun vítima na’in-rua Rogério dos Santos (21) ho Benjamin dos Santos (32), mak kanek todan no oras ne’e, kontinua hala’o tratamentu intensivu iha HNGV.

Defensór ne’e esplika, iha prosesu ida-ne’e, medida ne’ebé todan liu maka prizaun preventiva, tanba ne’e defeza sei simu tiha notifikasaun no sei haree lai despaixu hosi Tribunal, sei haree lai karik iha informasaun foun balun, defeza sei haree atu halo rekursu.

Prosesu primeiru interogatóriu judisiál ne’e, prezide hosi Juiz Turnu, Juiza Ana Paula, Ministeriu Públiku (MP) reprezenta hosi Prokuradór Claudino do Rosário no Arguidu sira hetan asisténsia legál hosi Defensór Públiku Manuel Exposto.

Advertisement

Jornalista: Rogério Pereira Cárceres