Hatutan.com, (22 Marsu 2023), Covalima—Autoridade Nasionál Petroleum no Minerál (ANPM) fasilita formasaun ba jornalista sira liu hosi semináriu ba kapasitasaun jornalista no editór sira iha seitór Petróleu no Minerais hodi hasa’e koñesimentu jornalista sira nian atu bele halo kobertura iha área petróleu no Minerais.

Prezidenti ANPM, Florentino Soares Ferreira halo aprezentasaun bá Jornalista sira iha Salaun Aero Porto Internasional Kay Rala Xanana Gusmão, Covalima, Kuarta (22/03/2023).

Semináriu ne’e sei hala’o durante loron tolu hahú hosi Kuarta (22/03/2023) to’o Sesta (24/03/2023), iha Munisípiu Covalima, jornalista sira hetan formasaun loron rua no loron ikus sei halo vizita ba terrenu fatin atividade Petróleu no Minerais nian.

Lee Mós: ANPM Dezmente “Boatu” Kombustivel Menus iha Timor-Leste

Atividade ne’ebé organiza hosi ANPM ne’e, jornalista no editór testu sira sei hetan treinamentu ida kle’an kona-bá seitór Petróleu no Minerais liu-liu kona-bá utilizasaun termu tékniku sira iha seitór Petróleu no Minerais ba iha produtu jornalístika hodi bele fasilita no fornese informasaun ne’ebé kredível no imparsiál bazeia ba faktus iha komunidade liu hosi kobertura ne’ebé iha.

Advertisement

Prezidente ANPM, Florentino Ferreira hateten, objetivu prinsipál hosi semináriu ne’e, ANPM hakarak fahe ho maluk jornalista sira kona-bá lala’ok indústria Petróleu no Minerais nian.

Espera katak, semináriu ne’e bele iha duni utilidade ka benefísiu ba jornalista hotu no iha servisu hamutuk ida di’ak entre ANPM no média hotu kona-bá publikasaun sira kona-bá atividade Petróleu no Minerais ne’ebé kredivel no imparsiál bazeia ba faktus.

“ANPM hanesan entidade Estadu ida, iha dever morál atu kontinua servisu ho ita bo’ot sira hodi garante katak ita nia fahe informasaun sira liu hosi notísia ba públiku ho loos no kredivel. Ami hatene katak servisu jornalizmu la’ós buat ida ne’ebé mak fásil tanba ne’e ita hein katak ho semináriu ne’e bele tulun ita bo’ot hala’o imi nia misaun ho di’ak no tulun sosiedade atu hatene ho di’ak dezenvolvimentuiha seitór Petróleu no Minerais,” Prezidenti ANPM, Florentino Soares Ferreira hateten iha Salaun Aero Porto Internasional Kay Rala Xanana Gusmão, Covalima, Kuarta (22/03/2023).

Ho semináriu ne’e, ANPM la obriga atu jornalista sira servisu tuir kedan ANPM nia espetativa no la’ós atu obriga sai kedan enjeñeiru, Jeólogu ka sai kedan ema ida ne’ebé domina ka komprende seitór Petróleu no Minerais.

Maibé, maizumenus ho formasaun ne’e bele oferese ba imi hotu módulo ka programa sira ne’ebé bele eleva koñesimentu bainhira halo reportajen ka redasaun ruma relasiona ho seitór Petróleu no Minerais bele komprende ona lala’ok hosi indústria ne’e rasik.

Advertisement

Semináriu ne’e mós la’ós realiza atu kurize malu maibé atu kompleta malu no hakarak atu informasaun ne’ebé sai ba públiku no komunidade sira konsumu loos no kredivel, liu-liu iha termu tékniku sira ne’ebé bele ajuda sosiedade komprende kona-bá indústria Petróleu no Minerais iha Timor-Leste.

ANPM kontinua nafatin hakarak hala’o atividade ida ne’e, bele servisu hamutuk liu tan hodi koñese didiak industria Petróleu no Minerais.

Tanba seitór Petróleu no Minerais tenke transparante no labele konsentra de’it ba ema ida ka rua ou grupu ida de’it tanba seitór ida ne’e estratéjiku no povu iha direitu tomak atu hatene ba kualkér desizaun, kualkér asaun no kualkér rezultadu ne’ebé ANPM iha.

Iha semináriu ba loron dahuluk ne’e, jornalista sira simu matéria kona-bá estabelesimentu ANPM tuir dekretu Lei númeru 8/2008, aprezentasaun hosi diresaun Peskiza no Lisitasaun, aprezentasaun hosi Diresaun Dezenvolvimentu no Produsaun, Diresaun Saúde, Seguransa no Ambiente no ikus liu diresaun Komérsiu.

Jornalista sirá ne’ebé partisipa iha semináriu ne’e mai hosi Media Hatutan.com, Tatoli, RTTL.E.P, STL News, media Neon Metin, Jornal Independente, Timor Post no Radio Televisão Maubere ho totál 18.

Advertisement

Jornalista: Vito Salvadór/Lazaro Pereira Quefi