Hatutan.com, (02 Abríl 2023), Díli- Ho selebrasaun Domingu Ramos, 02 fulan-Abríl 2023, Santa Kreda bolu atensaun atu sarani tomak hanoin bá loron Kristu Nia mate ho domin tamba  Kristu saran Nia aan ho domin tomak bá umanidade nia salvasaun.

Padre Pároku Katedral Díli, Leandro Maria Alves hateten, selebrasaun Domingu Ramos nian, santa kreda hahú ona semana santa no semana santa ida-ne’e loke kedas ho entrada Triunfál Kristu Nian iha Jerusalém.

Misa Domingu Ramos iha Igreja Katedrál Díli, 02 Abríl 2023. Foto/Elio dos Santos da Costa

Jesus ida ne’ebé sempre hasees aan ka lakohi atu ema hahí Nia publikamente mézmu Nia hatudu hahalok estraordináriu sira halo milagre, kura ema ne’ebé moras, Jesus buka atu hasees aan hosi louvór ka hahí sira ne’e hotu.  Maibé bá loron ida ohin iha selebrasaun Domingu Ramos, Jesus husik atu ema hahí Nia, hanai Nia no bolu Nia Liurai ka Salvadór.

“Ohin hahú prosesaun ho Ramos hodi hananu Hosana David Oan, Kmanek ida be mai hodi Nai nia naran, Liurai Israel nian, Hosana leten as bá.” knananuk ida-ne’e, Amu Leandro Maria Alves, hateten atu espresa lolos katak Jesus ne’e Liurai, no Nia Liurai dunik, maibé hahalok liurai ida ne’e ema nunka haree no nunka sei haree antes.

“Kristu Liurai ida ne’ebé umilde, la loko aan, Liurai ida ne’ebé haraik aan, ne’ebé hatudu Krús nu’udár Nia tronu, iha ne’ebé lakohi atu buka oin no buka tur fatin iha oin, maibé buka liu fatin sira ne’ebé ema hakbiit ka ema lakohi,” Pároku Katedral Díli, Pe. Leandro Maria Alves  haktuir iha nia omilia iha selebrasaun misa Domingu Ramos iha Igreja Katedrál, Díli.

Saserdósiu ne’e esplika mós katak profeta ida nia misaun mak atu haklaken Maromak Nia futar liafuan, profeta ne’e mak Maromak Nia ema, ida ne’ebé mak ko’alia hodi Maromak nia fatin no nu’udár Maromak Nia ema nia buka haka’as aan atu rona nafatin Maromak Nia futar liafuan no ho fidelidade lori no hato’o Maromak nia futar liafuan ne’e bá Maromak Nia povu.

Misa Domingu Ramos iha Igreja Katedrál Díli, 02 Abríl 2023. Foto/Elio dos Santos da Costa

Lisaun profeta ne’e karakteriza mós iha  sofrimentu no terus nia laran, tan la fasil atu hato’o Maromak Nia futar liafuan ba ema sira. Sofre tan la fasil mos ema atu simu saida mak profeta hato’o ne’e. Maibé nu’udár profeta sempre tau konfiansa iha Maromak ne’ebé bolu no hili nia, tan Maromak ne’ebé bolu no hili ne’e fiél no sei la hosi profeta ida mesak.

Santu Paulo fó sasin kona-bá hahalok haraik aan ka hamamuk aan Kristu nian ne’e, hodi dehan Jesus Kristu maske Maromak lolos maibé la hatudu Nia illas nu’udár Maromak, maibé haraik aan nu’udár atan hodi mosu mai nu’udár mane loos, no nu’udár mane los Kristu  haraik an liután halo  tuir de’it too mate iha krús.

Kristu nia obediénsia bá realizasaun planu Maromak Nian ne’e maka Maromak haraik bá Kristu naran ida boot liu naran hotu-hotu iha rai-ne’e, iha Lalehan ne’e mak Querios  ka Senhor ka Nai.

Iha semana santa ne’e nia laran hanesan ema sarani fiar na’in, Amu Leandro Maria Alves, husu buka atu fó pasu ida bá oin, hodi buka atu reflete katak se Jesus de’it ida be Maromak ne’e hakarak hamamuk aan atu salva ita ema, nune’e ema mos buka atu soe ninia loko aan sira,  soe tiha hirus malu sira, ódiu sira, insulta malu sira, atu nune’e, hanesan sarani dia’k bele hakat hamutuk ho Jesus bá moris rohan laek.

Iha evanjellu Kristu Nia mate hatudu momoos katak hodi haklaken Maromak Nia futar liafuan, haklaken Maromak Nia Reinu lori Jesus bá mate tan soke malu ho ema seluk nia egoízmu, ema seluk la aseita hahalok di’ak ne’ebé Jesus halo.

Jesus Kristu Nia mate  hatudu momoos katak tan de’it Jesus Nia hahalok di’ak, tan deit hahalok ida haklaken justisa, pás no domin bá ema hodi hanorin katak Maromak sei la husik ema ida mezmu nia sala na’in oinsá.

Ho hanorin sira ne’e halo ema seluk laran nakali, halo ema seluk laran moras, ema seluk lakohi simu no lori Jesus bá mate.

 Ema seluk sente lakon sira-nia dignidade tan Jesus hatudu Nai Maromak bá ema seluk. Hahalok ida nune’e sempre seluk bá ema ne’ebé mak laran nakali bá ema sira ne’ebé halo di’ak ka tulun ema seluk.

“Semana Santa ne’ebé ita hahú ho Domingu Ramos bolu ita-nia atensaun atu uza matenek, kapasidade sira ne’ebé mak Maromak fó mai ita, la’ós para atu estraga ema sira seluk, insulta ema sira seluk, la’ós atu difama ema, maibé buka atu oinsá mak matenek ne’ebé Maromak fó mai ita buka atu tulun ita-nia maluk sira no lori sira ba kompriende atu hadomi Maromak no ema seluk di’ak liután,” Amu Leandro Maria Alves hateten..

Iha Domingu Ramos ida -ne’e, iha leitura mate nian atu hatudu katak krús mak dalan loos, salvasaun no hateke bá krús signifika halo denunsia katak husik hahalok sira ne’ebé hamosu ódiu, hamosu fahe malu no lalika aprende atu hanoin aat bá ema seluk.

“Mai ita hateke bá Jesus Kristu Nia krús hodi hatene katak ida bo’ot liu ne’e mak domin, la’ós traisaun, la’ós difamasaun, maibé domin mak lori ema ba salvasaun,” Amu Leandro tenik.

Jornalista: Vito Salvadór