Hatutan.com, (03 Abríl 2023), Díli—Durante semana ida, hahú hosi loron 28 fulan Marsu to’o loron 3 fulan Abril tinan 2023, Autoridade Protesaun Sivíl (APC) rejista eman na’in-tolu mate no uma hamutuk 26 hetan estragus hosi Dezastre naturál iha territóriu nasionál.

Mota Komoro sobu uma komunidade iha área Ponte Komoro III, Sesta (30/03/2023). Foto/Cipriano Colo.

Diretór Gabinete Relasaun Externa no Komunikasaun Autoridade Protesaun Sivíl, Anacleto Caetano fó-sai dadus ne’e iha Caicoli, Segunda (03/04/2023.

Lee Mós: Dezastre Naturál Hamate Ema Ida no Estraga Uma 78

“Dadus ne’ebé ami hetan hosi Komandu Autoridade Protesaun Sivíl munisipál sira, iha dezastre naturál ho tipu haat mak ahanesan  anin boot, rai halai, ahi han uma no mos inundasaun. Iha mós ita nia maluk balun lakon vida,” Anacleto Caetano hateten.

Tuir dadus, iha munisípiu Ermera, Postu Administrativu Ermera, suku Estadu, aldeia Dasakina, iha loron 28 fulan Marsu tinan 2023 akontese inundasaun hodi estraga komunidade nia uma haat no iha aldeia Lizmu iha loron 28 fulan Marsu, akontese inundasaun estraga komunidade nia uma ida.

Iha suku Talimoro, aldeia Nunutua iha loron 28 fulan Marsu 2023, inundasaun estraga komunidade nia uma ida. Aldeia Bura iha loron 27 fulan Marsu 2023 inundasaun estraga komunidade nia uma ida.

Iha suku Raimerehei, aldeia Nazaré iha loron 27 fulan Marsu 2023 udan boot no rai halai estraga komunidade nia uma ida.

Suku Poetete, aldeia Samatrae iha loron 27 fulan Marsu 2023 rai halai estraga komunidade nia uma ida. Aldeia Poebun iha loron 27 fulan Marsu 2013, akontese rai halai estraga komunidade nia uma ida. Aldeia Samatrae iha loron 13 fulan Marsu 2023, anin sobu estraga komunidade nia uma ida.

Aldeia Samatrae iha loron 27 fulan Marsu 2023 akontese inundasaun estraga komunidade nia uma ida.

Iha suku Ponilala, aldeia Sakoko iha loron 27 fulan Marsu 2023, inundasaun estraga komunidade nia uma rua. Iha suku Humboe, aldeia Daeana iha loron 28 fulan Marsu 2023, rai halai estraga komunidade nia uma ida.

Iha suku Legimia, aldeia Sidir iha loron 27 fulan marsu 2023, inundasaun estraga komunidade nia uma ida.

Iha postu Administrativu Hatulia A, suku Taliati Leotelo, aldeia Aihatadeu iha loron 28 fulan Marsu 2023 inundasaun estraga komunidade nia uma ida.

Iha postu administrativu Hatulia B, suku Maubu, aldeia Arleu iha loron 27 fulan Marsu 2023 inundasaun estraga komunidade nia uma ida.

Iha postu administrativu Atsabe, suku Parami, aldeia Sio iha loron 27 fulan Marsu 2023, anin boot estraga komunidade nia uma ida.

Iha suku Bapú Leten, aldeia Ilak iha loron 13 fulan Marsu 2023 rai halai estraga komunidade nia uma ida. Iha aldeia Ilak mós iha loron 27 fulan Marsu 2023 anin sobu komunidade nia uma ida.

Iha Munisípiu Bobonaro, posto administrativu Bobonaro, suku Lour, aldeia Lalitas  iha loron 27 fulan Marsu 2023, udan no mota boot halakon inan ferik ida nia vida ho naran Milena de Jesus ho idade 65.

Iha postu administrativu Bobonaro, suku Lourba, aldeia Sordoli iha loron 1 fulan Abril 2023 udan no mota boot lori vitima na’in tolu, ida hetan ona ho kondisaun mate ho naran Tasia da Costa idade 10. Ida mak seidauk hetan ho naran Adriana da Costa idade 12. Ida fali konsege salva vida no daudaun ne’e hala’o hela tratamentu iha ospitál.

Iha akontesimentu ne’e bainhira atu selebra Domingo Ramos, ba buka ramos tahan ho nia kolega sira hakur mota no la konsege salva vida.

Komunidade halo uma iha Mota ibun Komoro besik área Ponte Komoro III, Sesta (30/03/2023). Foto/Cipriano Colo.

Iha munisípiu Baucau, postu administrativu Qeelicai, suku Afasa, aldeia Taranó iha loron 28 fulan Marsu 2023 ahi han komunidade nia uma ida.

Iha munisípiu Manufahi, postu administrativu Same, suku Holarua, aldeia Blaru iha loron 30 fulan Marsu 2023 anin sobu komunidade nia uma ida.

Iha Rejiaun Administrativu Espesiál Oe-cusse Ambeno (RAEOA), Sub Rejiaun Oe-silo, suku Bobometo, aldeia Qiubiselo iha loron 25 fulan Fevereiru 2023, anin boot estraga komunidade nia uma ida.

Iha postu administrativu Pasabe, suku Abani, aldeia Naetuna iha loron 25 fulan Fevereiru 2023 anin boot estraga komunidade nia uma ida. Iha aldeia Haemnanu iha loron 25 Fevereiru 2023 anin boot estraga komunidade nia uma ida.

Akontesimentu hirak ne’e iha munisípiu Baucau seidauk halo verifikasaun no seidauk fó apoiu emerjénsia. Iha mós munisípiu Bobonaro seidauk halo verifikasaun no seidauk fó apoiu emerjénsia.

Iha munisípiu Ermera balun halo ona verifikasaun no balun seidauk,  balun hetan ona apoiu, balun sidauk hetan.  Maski nune’e ekipa kontinua halo levantamentu ba dadus afetadu sira atu bele fó apoiu emerjénsia.

Iha munisipiu Manufahi parte Autoridade Protesaun Sivil seidauk halo verifikasaun no seidauk fó apoiu emerjénsia.

Hosi Rejiaun Administrativa Espesiál Oe-cusse Ambeno (RAEOA) mós seidauk halo verifikasaun no sidauk fó apoiu emerjénsia.

“Ba hirak ne’ebé seidauk halo verifikasaun atu hetan apoiu emerjénsia tanba Autoridade Protesaun Sivil iha Munisípiu sira iha terrenu foin simu informasaun no seidauk bele tun ba fatin akontesimentu atu halo verifikasaun,” nia hateten.

Apoiu emerjensia husi Autoridade ne’e katak apoiu hirak ne’ebé liga bá Item ai-han no la’ós ai-han.

Autoridade Protesaun Sivil nia apoiu ne’e iha parte ida, bainhira evakua komunidade afetada ba fatin seguru  tenke fó hahan tasak ba sira durante loron tolu.

Tanba ne’e, apoiu rekoperasaun katak, ba hirak ne’ebé hetan apoiu hirak ne’e liu hosi re-verifikasaun atu bele kategoriza sira iha aat totál, aat natón no aat kamán.

“Maibé ba hirak ne’ebé hetan apoiu emerjénsia la signifika hetan rekoperasaun tanba hosi parte ne’e ita apoia imediata ba sira maibé kuandu akontesimentu henesan inundasaun, bee nakonu karik bee maran mak ita halo re-verifikasaun mak bele prosessa atu hetan apoiu iha kategoria kualkér aat totál, aat natón no aat kamán,” nia esplika.

Parte Autoridade Protesaun Sivil husu ba komunidade ne’ebé hela iha foho lolon, mota-ibun  no fatin risku sira tenke kuidadu an nafatin, ba sira ne’ebé mak atu viajen ba Munisípiu kuidadu an didi’ak.

Jornalista Estajiáriu : Lazaro Pereira Quefi