Hatutan.com, (10 Abríl 2023), Díli—Klubu segunda divizaun Santa Cruz FC no Fitun Estudante Lorosa’e FC, tenke fahe pontu hanesan iha jogu dalimak Liga Timorense époka 2022-2023 hafoin impata ho skore 1-1.

Klubu segunda divizaun Santa Cruz FC no Fitun Estudante Lorosa’e FC, tenke fahe pontu hanesan iha jogu dalimak Liga Timorense époka 2022-2023 hafoin impata ho skore 1-1, iha jogu ne’ebé hala’o iha estádiu munisipál Díli, Segunda (10/04/2023). Foto/Elio dos Santos da Costa.

Ekipa Fitun Estudante Lorosa’e FC iha ambisaun atu manán nia ekipa adversáriu Santa Cruz FC iha jogu ne’ebé hala’o iha estádiu munisipál Díli, Segunda (10/04/2023).

Lee Mós: Porto Taibessi FC vs Coração FC 0-0

Ambisaun ne’ebé ekipa Fitun Estudante Lorosa’e FC iha ne’e, adeptu sira asiste liu hosi motivasaun ne’ebé Jogadór sira hatudu bainhira sinál hosi árbitu hodi hahú jogu, Jogadór Fitun Estudante Lorosa’e FC hola inisiativa hodi halo kedan atake ba adversáriu Santa Cruz FC liu hosi bola long direta ba avansadu ne’ebé ho lais tebes iha área grandeal adversáriu nian.

Ekipa Santa Cruz FC ne’ebé hetan atake, nafatin kalma no iha motivasaun atu halo jogu hodi asegura adversáriu nia ambisaun no halo balansu ba jogu.

Iha minutu 10 dahuluk, ekipa rua komesa iha balansu ba jogu no kada ekipa mantein ho taktika ne’ebé iha hodi halo kontra atake ba malu.

Santa Cruz FC iha oportunidade liu hosi Jogadór avansadu Paulo Godinho (19) ne’ebé mesak ho baliza adversáriu maibé falla marka golu tanba baliza adversáriu bele antesipa ho di’ak.

Fitun Estudante Lorosa’e FC mós nafatin tenta halo kontra atake ba adversáriu Santa Cruz FC maibé ekipa rua laiha ida mak marka uluk golu hodi muda skore iha tabela.

Jogadór Santa Cruz FC Barnabé Soares (18) simu kartaun kinur iha minutu 32 hafoin halo falta hasoru Jogadór adversáriu.

Ekipa rua mantein jogu no Santa Cruz FC hetan oportunidade atu halo kontra atake maibé falla iha komunikasaun tanba bainhira halo kontra atake hosi estremu direta ka eskerda Jogadór sira iha meiu kampu no avansadu sempre falla akompaña bola sa’e hodi halo ameasa ba ekipa adversáriu.

Fitun Estudante Lorosa’e FC kontinua mantein disiplina no tenta halo balansu no buka oportunidade atu halo kontra atake hodi hatama golu no tama ba minutu 42 liu hosi bola kantu, Jogadór avansadu Fitun Estudante Lorosa’e FC João Ximenes (17) hatama golu ida hodi muda skore ba 1-0.

Hafoin jogu ne’e, ekipa Santa Cruz FC halo kedan esforsu atu bele responde maibé sei falla no tama ba minutu 43 Jogadór Fitun Estudante Lorosa’e FC Pedro Pires (28) obrigadu tenke simu kartaun kinur hafoin halo falta hasoru Jogadór Santa Cruz FC Paulo Godinho (19).

Tama ba minutu 45, ekipa Santa Cruz FC halo substituisaun ba defeza esquerda hodi hasai Robinho da Silva (16) no hatama Arsénio Amaral (21) no to’o primeira parte termina, ekipa Fitun Estudante Lorosa’e FC mantein lidera ho skore 1-0.

Tama ba segunda parte, ekipa rua mantein ho ritmu jogu ne’ebé iha no Santa Cruz FC hahú halo tranjisaun ba taktika hodi halo atake no buka atu hatama golu maibé ekipa adversáriu mantein disiplina no sempre halo presaun bainhira Jogadór Santa Cruz FC kaer bola.

Ekipa Santa Cruz FC nafatin tenta halo esforsu ho posibilidade tomak ne’ebé iha atu bele marka golu no tama ba minutu 54 Jogadór defeza Arsénio Amaral (21) lansa golu ida hodi muda skore ba 1-1.

Ho golu ne’e halo ekipa rua hasa’e liutan intensidade jogu hodi buka oportunidade atu halo golu no bele lidera hikas jogu ne’e no asegura vitóri.

Fitun Estudante Lorosa’e FC hahú halo mudansa no substituisaun ba Jogadór hodi hasai avansadu João Ximenes (17) no hatama Avelino Gama (22) iha minutu 58.

Santa Cruz FC mós kontinua halo substituisaun hodi hasai Apolinário da Silva (27) no hatama António Amaral (15) iha minutu 61 hodi hadia lina defeza no bele asegura baliza hosi ekipa adversáriu nia atake.

Ekipa rua mantein halo jogu no kada ekipa sempre halo esforsu atu bele hatama golu maibé rezultadu iha jogu hatudu ekipa rua sei mantein iha balansu.

Fitun Estudante Lorosa’e FC kontinua halo substituisaun iha minutu 65 hodi hasai Joaninho Matos (9) no hatama Natalizio Sang (15) ne’ebé jiga iha pozisaun meiu kampu no Santa Cruz FC mós kontinua halo substituisaun hodi hasai Rui Abel (29) no hatama Bras Sarmento (23) iha minutu 68.

Jogadór Santa Cruz FC António Amaral (15) simu kartaun kinur iha minutu 78. Ekipa rua sei mantein ho skore ne’ebé iha.

Fitun Estudante Lorosa’e FC kontinua halo substituisaun hodi hasai Angenucu Viegas (11) no hatama Sabino da Cruz (18) iha minutu 88.

Santa Cruz FC mós kontinua halo mudansa ba taktika liu hosi substituisaun ba Jogadór iha meiu kampu hodi hasai Rui Soares (14) no hatama avansadu Adriano Pinto (93) iha minutu 90. Too jogu termina ekipa rua mantein ho skore 1-1.

Ho rezultadu ne’ebé iha no aumento pontus ida hosi joga kontra Santa Cruz FC, halo ekipa Fitun Estudante Lorosa’e FC rekolla pontus lima (5) hosi jogu lima (5) no okupa pozisaun dahaat (4) iha tabela klasifikasaun provizoriu segunda divizaun, entertantu ekipa Santa Cruz FC okupa pozisaun da neen (6) ho pontus haat (4).

Jornalista: Vito Salvadór