Hatutan.com, (04 Abríl 2023), Díli- Klubu Primeira divizaun Porto Taibessi FC obrigadu tenke fahe pontu hanesan ho  Coração FC hafoin Jogadór Yohanes Jehaman falla ezekuta penalidade.

Lee Mós : Manán Aitana FC 4-3, AD SLB Laulara Mantein Iha Primeira Klasifikasaun LFTL

Jogu kontinuasaun bá primeira divizaun Porto Taibessi FC vs Coração FC iha Estádiu Munisipál Díli, Tersa (04/04/2023). Foto/Elio dos Santos da Costa

Jogadór estranjeiru no avansadu prinsipál Porto Taibessi FC, Yohanes Jehaman (10) falla marka penalidade ne’ebé arbitu oferese tamba adversáriu halo falta hasoru nia maluk Jogadór Denilson Araújo (16) iha área grandear laran.

Iha jogu kontinuasaun bá primeira divizaun nian iha Estádiu Munisipál Díli, Tersa (04/04/2023), ekipa Coração FC no Porto Taibessi FC hala’o jogu ho kalma no kada joga tuir orientasaun taktika ne’ebé treinadór sira planea desde preparasaun.

Iha jogu haree katak Jogadór sira hosi ekipa rua kuaze joga tuir ritmu jogu ne’ebé iha no kada ekipa sempre halo kontra atake atu buka oportunidade hodi marka uluk golu.

Coração FC ne’ebé joga ho bola as sempre halo atake liuhosi bola dook  (long) ne’ebé iha atu bele halo presaun bá defeza adversáriu.

Porto Taibessi FC ne’ebé ho ritmu jogu alias joga samba falla atu implementa taktika ne’ebé ho di’ak tamba kuaze Jogadór adversáriu sempre halo presaun bainhira Jogadór meiu kampu Porto Taibessi FC hetan bola.

Coração FC hetan oportunidade atu marka golu liuhosi avansadu Rofino Gama (14), maibé sei falla tamba kombinasaun iha liña avansadu laiha komunikasaun di’ak, nune’e bola oportunidade ne’ebé iha ladun masimiza hodi marka golu.

Jogadór estranjeiru Porto Taibessi FC, Yohanes Jehaman (10) sempre halo defeza adversáriu atrapalla bainhira nia hetan bola, maibé falla atu aproveita oportunidade ne’ebé iha tamba defeza adversáriu mantein disiplina no asegura baliza hosi bola ameasa sira.

Coração FC hetan bola oportunidade ida liuhosi bola kantu ne’ebé Jogadór avansadu Rofino Gama (14) suta, maibé Jogadór Carlos Ximenes (16) ne’ebé kabesada bola sei falla atu marka golu tamba baliza adversáriu sei bele antesipa ho di’ak.

Ekipa Coração FC sempre halo atake liuhosi Jogadór Yohanes Gusmão (12) ne’ebé lansa bola dook bá iha área grandear Porto Taibessi FC nian, maibé defeza adversáriu sei bele antesipa ho di’ak hodi asegura baliza hosi ameasa nia laran.

 Jogadór Coração FC Isaac Gama (15) simu kartaun kinor hafoin halo falta hasoru avansadu Porto Taibessi FC  Yohanes Jehaman iha minutu 43.

Ekipa rua mantein halo kontra atake bá malu no ida-idak mantein ho nia ritmu jogu no taktika ne’ebé iha too tempu primeira parte termina ekipa rua mantein ho skor 0-0.

Jogu kontinuasaun bá primeira divizaun Porto Taibessi FC vs Coração FC iha Estádiu Munisipál Díli, Tersa (04/04/2023). Foto/Elio dos Santos da Costa

Tama bá segunda parte, ekipa rua mantein ho Jogadór sira ne’ebé joga iha primeira parte no haree katak treinadór sira hahú halo avaliasaun hodi hadia iha kada liña, atu nune’e, bele hasae intensidade jogu hodi buka oportunidade atu halo golu.

Tama bá minutu 46, ekipa Porto Taibessi FC halo uluk amiasa ida liuhosi avansadu Helman Asa (11) maibé falla no liu deit minutu ida Coração FC resposta kedas liu husi avansadu Pascual Fernandes (9) ne’ebé halo suta direita bá baliza maibé baliza Porto Taibessi FC sei bele antesipa ho di’ak.

Hafoin situasaun kontra atake ne’e, ekipa Porto Taibessi FC kontinua domina jogu no lansa atake bá adversáriu liu husi kombinasaun Jogadór sira iha liña klaran no avansadu ne’ebé solidu no halo adversáriu atrapalla maibé laiha golu ruma maka akontese.

Tama bá minutu 52, Porto Taibessi FC halo substituisaun bá Jogadór Frederico Sila (19) ne’ebé sofre aleija hodi hatama Cláudia Araújo (4) no iha minutu 53 Jogadór Coração FC Miguel Fernandes (8) simu kartaun kinor hafoin halo erru iha kampu laran.

Ekipa Coração FC kontinua halo mudansa bá táktika no buka atu hadi’a mós liña ho nune’e halo substituisaun bá Jogadór hodi hasai defeza sentral Rumulo Escurial (13) no hatama Adão Gusmão (5) ne’ebé joga iha pozisaun defeza direita no defeza direita muda ba joga iha defeza sentral nia fatin hodi halo liña kotuk solidu liután.

Jogadór Porto Taibessi FC Inocnsius Ati (3) simu kartaun kinor iha minutu 57 hafoin halo falta hasoru Jogadór avansadu Coração FC Albertino Ribeiro (21).

Coração FC kontinua hadi’a liña no liuliu kombinasaun Jogadór sira iha liña bá liña hodi lansa kontra atake.

Tama bá minutu 67 Coração FC halo tan substituisaun hodi hasai Isak Caitano Gama (15) no hatama Juninho Ximenes (3).

Ekipa rua kontinua halo atake ba malu no Porto Taibessi FC hahu hetan ritmu jogu no komesa domina bola. Ekipa rua nafatin mantein ho táktika ne’ebé iha no ritmu jogu hahu sae makas uainhira Porto Taibessi FC hetan penalidade ida ne’ebé avansadu Yohanes Jehaman (10) falla aproveita halo golu.

Jogadór avansadu Coração FC Rofino Gama (14) obrigadu tenke simu kartaun kinor hafoin halo falta hasoru Jogadór adversáriu.

Tama ba minutu 86, ekipa Coração FC halo tan substituisaun hodi hasai avansadu Pascual Fernandes (9) no hatama Zeca Monteiro (6) atu bele hasae intensidade iha liña oin no buka oportunidade atu halo golu.

Porto Taibessi FC mós halo substituisaun iha liña médiu hodi hasai Jogadór estranjeiru Helman Asa (11) no hatama Eusébio de Almeida (88) atu bele hasae tensi jogu iha liña klaran, nune’e avansadu sira bele iha oportunidade ba hetan bola no halo golu. Too tempu termina ekipa rua mantein ho skor 0-0 no obrigadu tenke fahe pontus hanesan.

Treinadór Coração FC, Chiquito do Carmo hateten Jogadór sira ohin joga di’ak no ho impata ne’ebé ekipa Coração FC hetan lori mós sorte di’ak tamba bele sai hosi zona degradasaun.

“Ha’u sente ohin há’u nia Jogadór sira joga di’ak hotu,” Chiquito do Carmo hateten.

Nia parte sei hadi’a ekipa bá jogu sira tuir mai no sei buka meius para halo jogu ida di’ak liu iha tempu tuir mai.

Asistente Treinadór Porto Taibessi FC, José Gomes hato’o parabéns ba Jogadór ekipa rua ne’ebé ohin halo esforsu no hatudu jogu ida di’ak iha kampu laran.

“Ami nia ekipa Porto Taibessi FC iha liu oportunidade atu manan jogu ne’e, maibé falla no ida-ne’e mak jogu rezultadu saida deit ekipa hotu tenke simu,”  José Gomes hateten.

Jornalista: Vito Salvadór