Hatutan.com, (10 Abríl 2023), Díli-Governu liuhosi Ministériu Justisa (MJ) kontrata ona kompañia internasionál Visi Mitra ho Thales atu prodús kaderneta pasaporte Repúblika Demokrátika Timor-Leste (RDTL)  ho kuantidade rihun 73 bá tinan 2023 to’o 2025. Maibé, presiza tempu fulan-sia (9) nia laran atu konklui produsaun kaderneta ne’e tuir  kapasidade no preparasaun kompañia nian.

Lee Mós : Kaderneta Pasaporte Laiha, Ramos-Horta: “Ha’u La komprende Liu Governu Nia Servisu”

Pasaporte komún ho pasaporte servisu RDTL. Foto/Hatutan.com

Manajer  kompañia Visi Mitra  iha Díli, Yohanes Corte Real bá Hatutan.com hateten, durante tinan barak ona Visi Mitra koopera ho kompañia Thales iha Finlandia prodús kaderneta pasaporte Timor nian tanba téknikamente sira mak iha liu koñesimentu.

Kompañia internasional Thales iha kapasidade bá enjiñeiru, no hetan mós autorizasaun hosi Organizasaun Internasionál Aviasaun Sivíl (ICAO, sigla Ingles) hodi bá prodús kaderneta pasaporte.

Iha konteúdu kontratu ne’e sita mós kona-bá présu kada kaderneta pasaporte $13,25 sentavu, no totál orsamentu $950,825, hodi bele utiliza bá sosa ká prodús kaderneta pasaporte Timor nian iha rai Finlándia. Maibé, parte kompañia sei halo produsaun tuir faze no tuir mós pedidu hosi Governu rasik.

“Kaderneta Pasaporte ne’e prodús iha Finlándia, no kontratu ne’e to’o 2025 total kaderneta pasaporte rihun 73. Maibé, iha proposta ida agora ne’e Ministériu Justisa  prepara osan bá sosa, prodús uluk mak  kaderneta pasaporte rihun 16. Etapa primeiru mak rihun 16 depois haree bá volume karik ema sai maka’as, sira bele halo pedidu fila-fali  tanba kontratu la’o hela (on going),” Yohanes Corte Real informa via telefónika Segunda (10/4/2023).

Maske Governu ho na’in bá kompañia sira selebra ona kontratu, maibé prosesu bá produsaun kaderneta pasaporte ne’e rasik sei lori tempu másimu fulan-sia (9), tanba presiza tempu bá kolekta material sira hotu.

“Ami nia proposta bá Ministériu Justisa fulan-sia to’o tinan ida. Ne’e lais fulan sia ne’e. Prazu ida ne’e, inklui tempu bá kolekta material sira hotu. Produsaun ne’e, ami kolekta hamutuk han tempu fulan neen hanesan ne’e, depois mak foin produsaun ho tán tempu haruka mai ne’e, bele han fulan tolu. Ita sura hamutuk hosi prosesu sira ne’e tomak, laís liu ne’e mak fulan-sia (9) ne’e,” Yohanes Corte Real hateten.

Responsável másima kompañia Internasional Visi Mitra no Thales iha Timor-Leste ne’e dehan, entermu tékniku nian, sira laiha problema. Maibé, prosesu atu halo produsaun bá pasaporte ne’e tenke lori duni tempu ne’ebé naruk.

Nia esplika, sé hakarak prodús iha tinan 2023 maka iha 2022 liubá, Governu tenke informa antes ona bá kompañia, atu nune’e, bele halo preparasaun hodi prodús tán kaderneta pasaporte sira.

Uainhira Ministériu Justisa haree katak, stock pasaporte besik atu hotu ona, maka ministériu liuhosi ninia diresaun relevante sira hanesan Diresaun Jerál Servisu Rejistu Notariadu (DJSRN) tenke informa tinan ida antes ona atu kompañia kontartór bele prosesa fila-fali.

“Sé ita atu prodús iha tinan ida ne’e, entaun tinan kotuk liubá, ita tenke request ona, tanba nia prosesu sira ne’e kleur, ema produsaun ne’e, antrian, depois kona-bá problema sira seluk tán. Ida ne’e mak difikulta, no ne’e mak han tempu ne’e fulan sia (9) hanesan ne’e mak foin bele halo produsaun. Entaun, internal ita-nian, hosi Ministériu Justisa mak tenke halo ezersísiu maka’as, prapara kontratu para bele aselera. Agora, to’o stock hotu ona, ita hakfodak,”  Yohanes tenik.

Yohanes Corte Real dehan, tanba Governu la halo pedidu antes haree hela stock kaderneta pasaporte Timor ne’e hotu, maibé la halo fali request ka pedidu bá kompañia atu oinsá mak prosesa fali. Tanba ida-ne’e maka, oras ne’e dadaun Timor-Leste nia kaderneta pasaporte laiha, no difkulta liután Timoroan sira bá sira-nia nesesidade iha rai-laran no li’ur.

“Tanba nia prosesu bá kaderneta ne’e, nia prosesu ne’e, la’ós dehan ita bá merkadu, ita direta sosa sasán, lae. Buat ne’e kuidadu tebtebes, tanba nia seguransa lubuk ida mak iha laran, depois nia stock mós limitadu, ita foin order mak, asina ita-nia template ka dezeñu ida ikus ne’e, tuir cover, buat sira ne’e aseita hotu hosi ministru, mak foin halo produsaun ho kuantidade barak,” Yohanes hateten.

Oras ne’e dadaun, ekipa tékniku ka enjiñeiru sira Kompañia Thales nian hosi Finlándia iha ona Timor-Leste no iha tempu besik sei realiza sorumutuk iha ho Ministru Justisa (MJ), Tiágo Amaral Sarmento, ho Vise José Edmundo Caetano, inklui diretór jerál nasionál no munisipiu sira hotu, hodi aprezenta uluk kona-bá dezeñu ka modelu pasapore ne’ebé sira preparadu, molok lori bá halo produsaun.

Vise Ministru Justisa, José Edmundo Caetano, husu kompañia kontratór atu aselera prosesu produsaun pasaporte Timor ne’e, no fiar katak, tinan ne’e, bele konklui, hodi nune’e, fasilita Timoroan bele buka servisu.

“Rezolve tiha ona, ita asina kontratu ona, agora, sira sei hatama de’it kaderneta pasaporte ne’e mai. Ita espera katak, iha tinan ida ne’e, ita prodús ona pasaporte, atu fornese ona bá ita-nia sidadaun sira,” José Edmundo Caetano hateten.

Governante ne’e rekoñese, ho problema kona-bá stock kadereneta pasaporte Timor ne’ebé laiha, difikulta tebes Timoroan sira, atu bá eskola no buka servisu iha rai-li’ur, hanesan iha Australia, Indonézia, Inglaterra, Korea du Súl no iha rai barak seluk tán.

Jornalista: Rogério Pereira Cárceres