Hatutan.com, (08 Marsu 2023), Díli—To’o oras ne’e kaderneta passaporte seidauk iha tanba Governu liuhosi Ministériu Justisa (MJ) ho kompañia fornesedór seidauk iha konkordánsia loloos kona-bá  folin atu bele estabelese kontratu.

Vise-Ministru Justisa (VMJ), José Edmundo Caetano hateten, Governu seidauk bele halo kontratu bá kompañia Visamitra tanba kompañia ne’e fa’an kaderneta passaporte ida ho pressu $13,50, enkuantu alokasaun orsamentu hosi Ministériu nian ho de’it $10 kada kaderneta.

Lee Mós: Sistema Avaria Laiha Atendimentu Bá Produsaun Pasaporte

Advertisement

“Tuir loloos, Governu kontrata ona kompañia ne’ebé antes ne’e hatama kaderneta passaporte mai Timor-Leste, maibé tanba iha mudansa bá pressu, nune’e maka to’o oras-ne’e sei iha prossesu diskusaun entre Ministériu no kompañia,” José Edmundo Caetano hateten hafóin sorumutu Konsellu Ministru Ordináriu iha Palásiu Governu Díli, Kuarta (08/03/2023).

Tuir padraun internasionál, kaderneta passaporte ida ho de’it présu $10 mai kraik, no Ministériu aloka orsamentu bazeia ba ida-ne’e, maibé parte kompañia ne’ebé daudaun ne’e Ministériu diskute hela, fa’an ho $13,50. Tanba ne’e maka Ministériu konsidera pressu ida-ne’e hanesan pressu ne’ebé aas tebes.

“Passporte ida $13,50 sentavus. Depois padraun internasionál ne’e kuaze paízes hotu-hotu ho présu $10 mai kraik. Ida-ne’e mak ita sei ko’alia ho kompañia, maibé solusaun ikus ita tenke fóti duni. Ami ko’alia ona ho kompañia ida uluk ita halo kontratu ne’e,” nia hateten.

Agora daudaun parte Ministériu Justisa esforsu hela atu halo ajustamentu hodi haree fila-fali no tenke haree presu ne’e atu bele hola duni.

Tanba ne’e nia garante katak, semana oin bele iha ona solusaun bá problema ne’e, tanba Ministériu sei tetu oinsá bele kontrata nafatin kompañia ne’ebé molok ne’e kontrata ona.

Advertisement

“Ita sei bolu mai atu ko’alia assuntu ne’e no espera katak, parte aprovizionamentu bele prosesa ona,” José Edmundo promete.

Tuir nia, iha tinan 2023 Governu liuhosi Ministériu Justisa prevee de’it orsamentu atu hola kaderneta passaporte hamutuk 400-resin.

“Ida-ne’e prioridade bá sidadaun ka Timoroan sira ne’ebé mak ho kondisaun moras, bainhira hakarak halo transferénsia bá tratamentu iha rai-liur,” nia informa.

Governante ne’e rekoñese katak, ho kaderneta passaporte ne’ebé laiha ona sai problema boot bá Ministériu, liu-liu difikulta Timoroan sira ne’ebé presiza tebes atu hetan direitu bá passaporte hodi fasilita sira bá serbisu ruma.

Maski nune’e, International Civil Aviation Organization (ICAO) ne’ebé involve hosi nasaun membru 42 rekomenda, passaporte hotu-hotu tenke iha mudansa bá kualidade.

Advertisement

Hatutan.com halo duni konfirmasaun ho na’in ba kompañia Visamitra ne’ebé Ministériu Justisa atu kontrata, maibé okupadu hela ho serbisu no seidauk bele fó komentáriu.

Jornalista: Rogério Pereira Cárceres