Hatutan.com, (11 Abríl 2023), Díli – Autoridade Protesaun Sivíl (APC), Tersa (11/4/2023),  relata katak, iha semana ida liubá, hosi loron 4 to’o loron 11 fulan-Abríl ne’e, akontese dezastre tipu oin haat ne’ebé rezulta uma 28 hetan estragu no labarik ida mate tanba mota lori.

Lee Mós : Dezastre Naturál Hamate Ema Na’in-Tolu no Estraga Uma 26

Tipu haat dezastre naturál ne’e mak hanesan rai halai, inundasaun, anin sobu, no ahi han uma ne’ebé akontese   iha Munisípiu hitu (7), hanesan Lautem, Bobonaro, Covalima, Ainaro, Díli, Viqueque ho Rejiaun Administrativu Espesiál Oé-Cusse Ambeno (RAEOA).

Advertisement

Rai hala’i estraga komunidade nia uma ida. Foto/APC

Liuhosi konferénsia imprensa iha edifísiu APC, Diretór Gabinete Relasaun Externa no Komunikasaun Anacleto Caetano, informa, total dadus dezastre naturál ne’ebé mak sentru nasionál operasaun protesaun sivíl   simu hamutuk  uma 28 hetan estragu no labarik ida mate bainhira ho nia kolega sira bá buka ramus iha Munisípiu Bobonaro, no hetan nia isin mate iha loron 8 fulan-Abríl 2023.

Iha Munisipiu Covalima, suku Matai, Aldeia Lorai, anin boot rezulta ai-tohar monu bá komunidade nia uma iha loron 1 fulan-Abríl 2023.

Iha loron 26 fulan-Marsu 2023 iha Munisípiu Lautem, Postu Administrativu Tutuala, Suku Tutuala, Aldeia Leti, akontese anin-boot sobu komunidade nia uma  ida (1).

Iha Munisípiu Ainaro, Postu Administrativu Ainaro Vila, Suku Soru Kraik, Aldeia Nu’ulu anin sobu komunidade nia uma rua (2) iha loron 3 fulan- Abríl 2023.

Iha Munisípiu Díli, Postu administrativu Dom Aleixo, Suku Comoro, aldeia 4 de Setembru, akontese ahi-han komunidade ida nia uma  iha loron 01 fulan-Abríl 2023.  Iha fali loron 09 fulan hanesan, ahi han komunidade nia uma ida iha Aldeia Lecidere, Suku Bidau Lesicere,  Postu Administrativu Na’in Feto, Munisípiu Díli.

Iha loron 01 fulan-Abríl 2023, akontese anin boot sobu kounidade nia uma ida iha Aldeia Mahata, Suku Lela-Ufe, Sub Rejiaun Nitibe, RAEOA.  Iha fali loron 05 fulan hanesan no iha RAEOA akontese mós ahi han komunidade ida nia uma.

Advertisement

Anin boot halo ai-tohar monu bá komunidade nia uma. Foto/APC

Iha  Aldeia Lena, Suku Afaloikai, Postu Administrativu Uatolari, Munisípiu Viqueque, akontese anin boot estraga komunidade nia uma haat (4) iha loron 08 fulan-Abríl 2023. Molok ne’e, iha loron 01 fulan-Janeiru 2023, iha Aldeia Buibela akontese anin-boot estraga komunidade nia uma lima (5).

Iha Aldeia Kaitahu iha loron 4 fulan-Janeiru 2023 akontese anin-boot estraga komunidade nia uma tolu (3), iha Aldeia Kailake iha loron 2 fulan-Fevereiru 2023 akontese anin-boot estraga komunidade nia uma rua (2), iha Suku Matahoi, Aldeia Iraler iha loron 31 fulan-Marsu 2023, akontese anin-boot estraga komunidade nia uma  ida (1), iha Suku Babulo, Aldeia Roma, iha loron 4 fulan-Fevereiru 2023, akontese anin-boot estraga komunidade nia uma haat (4).

Iha Postu Administrativu Viqueque, Suku Uma-ua’in Kraik, Aldeia Uhatsae, akontese anin-boot estraga komunidade nia uma ida  (1) iha loron 8 fulan-Abríl 2023.

“Autoridade Protesaun Sivíl Munisipál fó ona apoiu emerjénsia bá vítima sira no mós matebian,” hateten Anacleto Caetano.

Total dadus dezastre naturál ne’ebé mak akontese iha territóriu Timor-Leste hosi fulan-Janeiru 2023 to’o fulan-Abríl ne’e  hamutuk 478.

Jornalista Estajiáriu : Lazaro Pereira Quefi / Dirce Sandra da Costa Gomes

Advertisement