Hatutan.com, (22 Abríl 2023), Díli- Iha eleisaun parlamentár 2023, povu fó fiar bá Partidu Demokrátiku (PD) Governa rai ida-ne’e, períodu 2023-2028, sei fó kréditu bá estudante sira ne’ebé hakarak kontinua sira-nia estudu iha ensinu superiór.
Lee Mós : Alkatiri: Ikus-Ikus Ne’e Governu Sai Fali Hanesan Bazar
Prezidente PD, Mariano Assanami Sabino, Sábadu (22/4/2023), iha nia kompromisu polítika bainhira hala’o kampaña iha Postu Administrativu Maliana, Munisípiu Bobonaro, afirma kréditu ne’ebé fó bá estudante sira ne’e, sei fó ho porsentu ne’ebé ki’ik, menus husi porsentu 5 hodi nune’e labele sente iha deve.
Partidu Demokratiku (PD) halo kampaña iha Munisípiu Bobonaro, Sábadu (22/4/2023). Foto/Espesiál
“Programa bá joven sira mak ita tenke fó kréditu ba estudante sira, liu-liu bá estudante sira ne’ebé remata nivel sekundáriu hodi kontinua bá ensinu superior. Kréditu ne’e osan ne’ebé mak importante tanba ho kréditu estadu hadi’a nia rekursu umanu,” Mariano Assanami Sabino hateten.
Nia hatutan, kréditu ne’e bainhira nia servisu mak foin selu no bainhira seidauk hetan serbisu nia sei laselu ida, maibé ho porsentu ne’ebé mak ki’ik, labele selu boot liu para nia sente deve.
PD mós sei kria kréditu bá foin-sa’e sira ne’ebé mak hakarak halo negósiu ki’ik hanesan loke kooperativa liu husi hakiak manu, hakiak fahi no halo buat sira seluk, tenke iha hotu lina kréditu ne’ebé mak iha.
Fó mós kréditu ba joven sira ne’ebé mak iha talentu, hanesan halo múzika, filme no buat seluk.
Fasilidade sira-ne’e, PD hakarak kria tanba konsidera joven mak autor importante bá dezenvolvimentu, nune’e, tenke hadi’a edukasaun no saúde.
Bainhira PD ukun hakarak hadi’a mós iha área sosiál nian, hodi hasa’e saláriu mínimu traballadór sira nian hosi $115.00 bá $200.00, tanba PD koñese momoos ona durante iha ukun ne’e iha problema social barak iha nasaun ne’e.
Iha fatin hanesan sekretáriu jerál PD, Antonio da Conceição ‘‘Kalohan’’, dehan, PD ukun tenke hadi’a sistema edukasaun, liu-liu haree bá profesór sira-nia bem-estar no haree mós infraestrutura eskola nian atu estudante sira labele kontinua tur iha rai, hodi hala’o atividade aprendizajen iha eskola.
‘‘Ita tenke krize buat sira ne’ebé mak la di’ak iha governasaun ida-ne’e,’’ António Kalohan hateten.
Tuir PD nia observasaun iha tinan-20 liu ukun rasik aan ne’e, povu presiza asisténsia ne’ebé di’ak iha nivel munisipiu to’o área remota, tenke tau ai-moruk no médiku sira no halo programa ne’ebé mak di’ak hodi kria fasilidade ne’ebé di’ak iha sentru saúde, postu saúde no ospitál sira hodi salva povu.
Jornalista : Elio dos Santos da Costa