Hatutan.com, (23 Abríl 2023), Díli – Asosiasaun Popular Monarkia Timor (APMT) komprometidu hadi’a setór indústria no agrikultura bainhira povu fó fiar hodi Governa rai ida-ne’e iha 2023-2028.

Lee Mós : Dezenvolve Uma-Lisan ho Kria Moeda Timor Sai Prioridade APMT

Liuhosi konferénsia imprensa ne’ebé hala’o iha Fomento II, Díli, Domingu (23/4/2023), prezidente ezekutivu APMT, Agostinho Gomes, klarifika katak biban ne’e AMPT la halo kampaña no komísiu aberta, maibé halo konferénsia imprensa atu transmite APMT nia programa jerál liga ho kompromisu APMT nian bainhira povu fó fiar atu ukun rai ida-ne’e.

Advertisement

APMT halo konferénsia imprensa iha Díli, Domingu (23/4/2023). Foto/ Lazaro Pereira Quefi

“Ita haree katak povu ida-ne’e presiza mak hadi’a ekonomia sira-nian, kria kampu servisu no hadi’a setór agrikultura. Ida-ne’e mak programa estratéjika no prinsipál APMT nian,” Agositnho Gomes haktuir.

APMT rasik iha nia programa prioridade primadona para atu  dada eleitór sira, tamba ne’e APMT fó liu importánsia bá ekonomia bainhira Timoroan nia mina maran, katak tenke kria ona reseita la’ós petrolíferu  atu nune’e la bele prejudika ekonomia rai ida-ne’e nian iha futuru,” Agostinho Gomes hateten.

APMT hare no konsiente katak tinan 20 liu restaura ukun rasik an, 20 fulan-Maiu 2002, dezempregu sai fastor ida grave tebetebes iha nivel hotu-hotu. Tanba ne’e, APMT hakarak kontribui hodi hadi’a no kria kampu servisu bá Timoroan fazeadamente iha Timor laran.

Tuir mai setor produtivu sira tenke hadi’a no investe maka’as hodi  oferese  reseita alternativa, hanesan agrikultura iha kontestu rua iha peska no produtu alimentaria, tanba ne’e tenke halo indústria no redús ona importasaun ne’ebé as tebes mai husi nasaun oioin.

APMT garantia katak iha tinan-10 Timor-Leste bele  auto sufisiente katak tinan-10   la importa tan foos ona, se karik  importa mós  importa para atu halo intervensaun merkadu de’it no ida ne’e polítika di’ak bá APMT.

Iha fatin hanesan Sekretáriu Jerál APMT, Sobario Guterres Nunes, hateten APMT hakarak aposta bá reforma administrasaun publika tanba ida-ne’e tuir APMT nia haree katak problema boot ida durante ukun an tinan-20 resin.

Advertisement

Nia dehan Timor-Leste nia kustu bá administrasaun públiku boot, maibé la kolekta reseita ne’e problema ida, se gastu ne’e boot rekolla reseita ki’ik signifika Timor-Leste tama ona ba prosesu ne’ebé mak públiku akadémiku sira ko’alia kona-bá perspetiva fiskál.

“Ita nia osan hotu ita reseita atu kobre fali administrasaun públiku, reseita atu selu fali bá pensaun veteranu, fundu seguransa sosiál, buat sira ne’e sei la iha, iha tinan sanulu oin mai, ida ne’e mak programa APMT observa iha tinan rua nulu nia laran entaun hakarak aposta ida reforma administrativa no konsentra ba ajénsia sira ne’ebé mak servisu iha asuntu ekonomia, atu fó biban hadi’a enferamentu ekonomia didi’ak para fó biban bá investor sira halo investimentu iha area produtivu sira,” nia hateten.

APMT hakarak empodera ka fiskaliza setór privadu sira atu sira atu hadi’a para sai emprezáriu nasionál sai investidór nasionál, tanba ne’e APMT hakarak kria kampu traballu  iha Timor tamba setor privadu  sira mak absorve traballadór barak liután ne’e dezenvolvimentu nia hun mai hosi setor privadu.

 Jornalista Estajiáriu : Lazaro Pereira Quefi

Advertisement