Hatutan.com, (25 Abríl 2023), Díli— Comisaun Nacional das Eleições (CNE) planeia ona atu realiza debate durante loron tolu,  hahú hosi 16 to’o 18 fulan Maiu, ne’ebé sei fó tempu ba joven sira iha Partidu Polítiku sira hodi ko’alia programa.

“Planu ne’ebé iha debate ne’e sei realiza iha loron tolu nia laran komesa hosi dia 16 to’o 18 fulan Maiu, sei iha debate ba de’it partidu sira,” Prezidente CNE, José Agostinho Belo hateten iha Salaun Lalini-Larigutu CNE, Díli, Tersa (25/04/2023).

Lee Mós: CNE Rejísta Kríme Eleitorál 10 Iha Viqueque, Baucau no Manufahi

Parte CNE halo ona preparasaun, iha ne’ebé ohin realiza sorumutu ne’ebé partisipa hosi líder Partidu Politiku sira ho objetivu importante maka CNE oferese tán mementu importante ida liuliu bá partidu politiku sira alende debate públiku ne’ebé sei partisipa hosi lider sira no juventude sira, espesialmente ba feto sira.

“Ho palku ida ne’e atu sira bele iha oportunidade hanesan. Nune’e, ita ko’alia kona-bá konseitu tranzisaun jerasionál ko’alia mós kona-bá konseitu dezenvolvimentu joventude feto sira nian oinsa kontinua futuru Timor nian,” Jose Agostinho Belo hateten.

Tamba ne’e, situasaun ida-ne’e diferente tebes ho debate sira uluk nian, ba de’it partidu sira maibé agora oferese tán palku nune’e sira bele esplika, hatudu sira nia papel oinsa bele halo aprosimasaun ba matéria ne’ebé di’ak, debate ne’ebé furak atu bele muda jovens sira, populasaun tomak bele konkista no to’o tempu eleisaun bele fó votu ho másimu.

CNE hakarak joven sira tenke ko’alia kona-bá sira nia nesesidade, ko’alia mós kona-bá sira nia konseitu no tau sira nia hanoin atu kontribui ba rai ida-ne’e ba oin.

“Entaun tenke liu hosi kanál ida importante maka debate iha palku nune’e ema hotu asiste. Karik povu ne’e fó fiar, eleitór sira hili karik ida-ne’e sai komitmentu joven feto no mane ba futuru,” nia esplika.

Tanba ne’e CNE sei koordena ho RTTL, EP atu labele fó sai dala ida de’it maibé bele mós dala rua bainhira  sei iha tempu legál ne’e permite atu nune’e kampaña ida-ne’e hanesan bá hotu-hotu, tanba partidu hotu-hotu partisipa iha tratamentu hanesan ba sira.

RTTL sei iha mós  live streaming tanba iha debate ne’e fahe ba grupu rua no iha loron ikus hotu-hotu-hotu tenke hamutuk atu sira bele koñese-malu no bele mós ko’alia ba malu.

CNE ho RTTL iha ona konkordánsia bá debate ne’e sei hala’o iha salaun Mahoka no fatin preparadu ona.

Jornalista Estajiáriu: Lazaro Pereira Quefi