Hatutan.com, (25 Abríl 2023), Díli— Bainhira hetan fiar hodi kaer ukun iha eleisaun Parlamentár tinan ne’e, Partidu UNDERTIM hakarak dezenvolve seitór importante haat mak hanesan seitór Justisa, defeza, saúde, agrikultura no edukasaun.

Sekretáriu Jerál UNDERTIM, Adolfo da Silva.

Sekretáriu Jerál UNDERTIM, Adolfo da Silva esplika, hakarak dezenvolve no hadi’a seitór justisa tanba partidu ne’e observa katak, durante ne’e jusitsa iha nasaun ne’e la’o la loos.

Lee Mós: Iha Hatu-Udo, Partidu Repúblikanu Hosi Uma bá Uma Fahe Materia Kampaña

“Bainhira ukun ita sei uza ema espertu sira ne’ebé prodús iha rai laran liu liu universidade sira iha Timor atu hadi’a justisa ne’ebé la’o la loos,” nia hateten iha Salaun Lalini-Larigutu CNE, Díli, Tersa (25/04/2023).  

Advertisement

UNDERTIM haree katak, tempu to’o ona atu moderniza seitór defeza no segunransa hanesan Falintil – Forsa Defeza Timor Leste (F-FDTL) no Polisia Nasional Timor Leste (PNTL).

Tenke tau ekipamentu modernu ba instituisaun rua ne’e atu bele mantein asegura estabilidade no garante pás.

Partidu polítiku ne’e mós sei hadi’a Sistema saúde, tanba durante ne’e observa katak, tratamentu saúde iha rai laran la’o ladún di’ak.

UNDERTIM hakarak atu investe ba kapasitasaun rekursu umanu iha seitór saúde no mós investe hodi sosa ekipamentu ka fasilidade saúde iha territóriu tomak, nune’e pessoál saúde sira bele hala’o atendimentu di’ak liután ba povu iha área rurál.

Iha seitór Edukasaun, UNDERTIM hakarak profisionaliza diak liu tan professór sira, hadi’a Sistema edukasaun, no sei halo rekrutamentu ba professór sira ne’ebé gradua hosi fakuldade edukasaun nian.

Advertisement

Partidu ne’e mós la taka matan bá seitór agrikultura liu liu sei tau matan ba natar na’in no toos na’in Sira, fasilita materiál bazika nian ba sira atu bele hakmán sira nia servisu.

Jornalista Estajiáriu : Lazaro Pereira Quefi