Hatutan.com, (26 Abríl 2023), Díli—Partidu Unidade Dezenvolvimentu Demokratiku (PUDD), prontu ona atu kaer ukun iha 2023, nune’e dada kadoras mina mai Beaço, munisípiu Viqueque, Timor Leste (TL).

Prezidente Komisaun Polítika nasionál PUDD, Alberto Carvalho Araújo. Foto/PUDD.

“Hanesan Prezidente Komisaun Polítika nasionál PUDD nian, mai iha-ne’e atu hatete ba ita boot sira hanesan ita nia Prezidente órgaun profisionál dehan ona iha inisiu katakt, PUDD hamrik atu suporta ita nia soberania hodi lori kadoras mina mai Timor Leste,” Prezidente Komisaun Polítika nasionál PUDD, Alberto Carvalho Araújo, hateten iha kampaña ne’ebé hala’o iha munisípiu Viqueque (22/04/2023) ne’ebé transmite direta hosi pajina ofisiál facebook PUDD.

Lee Mós: Kampaña Iha Seloi-Kraik, PDC Promete Hasa’e Folin Kafé

Prezidente Komisaun Polítika nasionál PUDD  ne’e esplika, bainhira lori kadoras mina mai Timor Leste, Vqueque nia oan tenke preparadu.

PUDD nia politika primeiru maka iha ukun an ne’e tenke hatur direitu povu no devér uluk, mak hanesan direitu atu assesu ba estrada di’ak, eletrisidade, bee-moos, saúde no edukasaun.

PUDD mai atu hatur sasan hotu tuir nia fatin, tanba ukun na’in iha devér atu lori povu nia direitu ba moris di’ak.

PUDD hakarak povu ne’e moris dignu, moris saudável no la-iha mal nutrisaun iha rai ida-ne’e, liu hosi dezenvolvimentu agrikultura ne’ebé di’ak.

Partisipasaun iha kampaña ne’e militante no simpatizante PUDD nian no hetan supervizaun hosi órgaun eleitorál Comissão Nasionál das Eleições (CNE),  Provedoria ba Direitu Umanu no Justisa (PDHJ), no hetan mós seguransa másimu hosi Polísia Nasionál Timor-Leste (PNTL).

Jornalista Estajiariu: Lazaro Pereira Quefi