Hatutan.com, (26 Abríl 2023), Díli—Governu liuhosi Ministériu Defeza (MD) planeia ona iha fulan-maiu tinan 2023, sei hahú hala’o prosesu rekrutamentu bá membru espesiál foun FALINTIL Forsa Defeza Timor-Leste (F-FDTL) na’in 87.

Planu rekrutamentu ida-ne’e tanba iha (26/04), Konsellu Ministru (KM) delibera ona atu aprova tuir projetu ne’ebé aprezenta hosi Ministru Defeza Filomeno da Paixão de Jesus, bá realizasaun bá prosedimentu exesionál bá rekrutamentu nian.

Lee Mós: Ramos-Horta Husu Governu Tau Matan Espesiál Bá PNTL ho F-FDTL

“Hanesan ministru defeza en-ezersísiu mak aprezenta bá Konsellu Ministru propósta ida atu halo inkorporasaun ba foinsa’e na’in 87. Sira ne’ebé mak lisensiadu, mestradu, iha área importante sira ne’ebé mak F-FDTL presiza. Hahú hosi fulan-maiu tinan 2023 no determina ona katak, efetivu atu inkorpora iha prosedimentu ida-ne’e,” Ministru Prezidénsia no Konsellu Ministru (MPKM), Fidelis Manuel Leite Magalhães informa hafoin sorumutu KM ordináriu iha Palásiu Governu, Dili, Kuarta (26/04/2023).

Rekrutamentu bá sidadaun foinsa’e Timor oan ho totál na’in 87 ne’e, sei fahe bá Militár na’in 29 bá Kuartél Jenerál, Na’in 10 bá Komponente Terrestre, na’in 12 bá Komponente Navál, na’in 6 bá Komponente Aérea Lijeira, na’in 5 bá Sentru Instrusaun Komandante Nicolau Lobato, na’in 18 bá Unidade Apoiu Servisu, na’in 3 destaka bá Unidade FALINTIL no seluk bá Unidade Polísia Militár.

Ministru Fidelis konsidera, planu rekrutamentu ida ne’e importante tebtebes, tanba sira ne’e ho kualifikasaun lisensiadu, mestradu no iha área espesífiku hirak ne’e balun entre sira ne’e, enjiñeiru IT, enjiñeiru sivíl no jurista.

Ida ne’e, dalan ida mós atu kontinua kontribui bá profisionaliza F-FDTL, tanba bá mundu modernu agora ne’e forsa defeza ida mós presiza liu-liu maluk sira ne’ebé mak iha duni iha grau akadémiku, no área da espesializasaun sira ne’ebé mak bele kontribui atu F-FDTL sai hanesan forsa defeza ida ne’ebé maka konvensionál no modernu.

Jornalista: Rogério Pereira Cárceres