Hatutan.com, (29 Abríl 2023), Ainaro–Prezidente Partidu Libertasaun Populár (PLP) Taur Matan Ruak, kompromete bainhira povu fó fiar iha eleisaun parlamentár hodi forma IX  Governu, sei tau  programa prioridade ida bá hadi’a fatin distinsaun  turizmu  kulturál no dezenvolve uma-lisan sira nu’udár fatin hametin unidade no identidade timoroan sira-nian.

Lee Mós : PLP Ukun Hakarak Diversifika Ekonomia

Prezidente PLP, Taur Matan Ruak. Foto/Joaquim Coutinho

“Ita nia uma-lisan sira,  daudaun ne’e ita ajuda, ita nia Sekretáriu  Estadu Arte no Kultura ajuda hadi’a ita-nia uma-lisan sira mais saida maka ita hakarak halo, halo di’ak para orienta ba turizmu kulturál no ikus ita sira moris ne’e hametin ita nia relasaun Prezidente Partidu Libertasaun Populár (PLP) Taur Matan Ruak hateten iha nia intervensaun bainhira hala’o kampaña ho tipu diálogu ho populasaun  Ainaro iha Salaun Parókia Santa Maria, Ainaro, Sábadu (29/04/2023).

“Turizmu ita tenke iha internet ida  la’o lais no seguru, daudaun ne’e dada  fibra ótika husi Austrália mai ita-nia rai para halo internet ida lais no baratu liu. Ida seluk maka fatin entaun, ita hakarak tau osan ba Kristu Rei ita hakarak muda Dili ne’e nia oin furak la hanesan ida agora ne’e entaun saida maka ami halo daudaun ne’e muda tia Portu Dili ba Tibar,”  Taur afirma.

Advertisement

Prezidente PLP  kontínua deklara dehan nia hakarak  kontínua no hametin nafatin programa sira ne’ebé durante ne’e nia hanesan Xefe Governu implementa ona, no sei kontínua nafatin  implementa programa sira ne’ebé maka seidauk finaliza iha VIII Governu Konstitusionál.

“Ita la’ós konta istória de’it, ita halo buat ne’ebé bá ema hotu nia di’ak. Agora saida maka ita hanoin atu halo ita iha problema tolu; ida diversifikasaun ekonomia entaun saida maka ita hakarak, ita hakarak konsentra dada ita inan-aman presiza haree buat ne’ebé ita halo sira apoiu ita para rezolve ita-nia problema liu-liu mukit no kiak iha ita rain, ita tenke kombate. Se funu ita bele halo  tanbasá hikis kosar bá moris di’ak ita labele halo, mais kuandu ita halo ida ne’e primeiru ita tenke oin mós hatene saida maka ita hakarak , ita hatene saida maka ita halo no buka solusaun ba ita-nia problema sir,” Taur Matan Ruak tenik.

Bá povu Munisípiu Ainaro Matan Ruak husu bele dada bandeira CNRT nian,  bandeira PD no seluk nian tan, mas vota ne’e vota bá plataforma  entendimentu PLP, FRETILIN ho KHUNTO tamba ita ne’e manan nanis ne’ebé sira vota bá seluk ne’e hanesan joga karik ema kaer karta mate.

PLP hala’o kampaña ho tipu diálogu ho populasaun Ainaro iha Salaun Parókia Santa Maria, Ainaro, Sábadu (29/04/2023). Foto/Joaquim Coutinho

Fatin hanesan Koordenadór PLP Munisípiu Ainaro Julio da Conceição “Loro Mesak” katak Partidu Libertasaun Popular (PLP) hakarak halo mudansa, lori povu Timor-Leste  bá mundu no lori povu Timor-Leste bá moris di’ak, maibé atu realiza ida-ne’e fila fali ba povu nia determinasaun liuhosi votu iha eleisaun parlamentár, 21 fulan-Maiu 2023.
Númeru eleitór iha Munisípiu Ainaro ne’ebé rejistu iha baze dadus  Sekretariadu Tékniku Administrasaun Eleitorál (STAE) hamutuk ema na’in-47,912, kompostu hosi eleitór mane 24775 (52%) no feto 23137 (48%).

Atividade kampaña eleitorál ho tipu diálogu ne’e partisipa másimu husi militante no simpatizante, hetan seguransa husi Polisia Nasionál Timor Leste Komandu (PNTL) Munisípiu Ainaro, no supervizaun husi Komisaun Nasional Eleisaun (CNE sigla portugés) ho Provedora Direitu Humanus no Justisa (PDHJ).

 Kontribuidór :  Moises Magno

Advertisement