Hatutan.com, (29 Abríl 2023), Díli—Partidu Movimentu Libertasaun Povu Maubere (MLPM) sei halo investimentu iha seitór hotu-hotu atu liberta povu Maubere hosi ki’ak, bainhira hetan fiar ka hetan asentu iha Parlamentu Nasionál no tama iha Governasaun tuir mai hodi kaer ukun.

Prezidente MLPM, Reis Cadalac.

“MLPM komprometidu atu investe makás iha seitór hotu-hotu. Iha área sira ne’ebé importante ba povu Maubere nia moris,” Prezidente MLPM, Reis Cadalac hateten bá Hatutan.com iha sede nasionál MLPM Bairru-Pité, Sábadu (29/04/2023).

Lee Mós: Kampaña Iha Seloi-Kraik, PDC Promete Hasa’e Folin Kafé

Seitór sira ne’ebé MLPM sei investe maka, seitór Agrikultura ne’ebé tuir planu sei industrializa atu bele lori benefisiu direta bá povu.

Advertisement

Sei investe bá iha seitór saúde ne’ebé MLPM haree katak, iha área rurál sira sei menus tebes pesoál saúde no fasilidade sira iha ne’ebé bainhira populasaun sofre moras ruma tenke halo referénsia mai iha Díli.

Investimentu seluk maka, sei kapasita povu Maubere atu loke indústria hodi kria rasik empregu nune’e redús dezempregu iha rai laran no lori Timor Leste ba oin diak liu tán.

Iha área infraestrutura, MLPM haree katak, povu maube presiza tebes estrada ba iha área rurál sira atu bele transporta sira nia produtu mai iha nasionál.

Tanba ne’e, sei aloka orsamentu másimu hodi konstrui estrada hosi nasionál to’o área rurál iha munisipiu hotu.

Partidu ne’e mós sei investa iha área edukasaun, tanba haree katak, Povu Maubere maioria seidauk asesu ba edukasaun ne’ebé diak no kualidade tanba iha eskola barak mak sei aat liu liu edifisiu sira, falta livru no falta professóres.

Advertisement

“Bainhira área sira ne’e ita investe hotu, MLPM garante katak, povu Maubere sei moris ho dignu hodi goza ukun an ida ne’e,” nia hateten.

Iha área turizmu, MLPM haree katak, Timor Leste nasaun ida ho nia natureza no fatin istóriku sira mesak furak no kmanek tebes, tanba ne’e bainhira hetan konfiansa iha eleisaun Parlamentár sei investe hodi dezenvolve área turizmu nune’e dada turista hosi rai liur mai barak atu bele hatama mós reseita ba Estadu.

Buat hirak ne’e, MLPM hakarak investe hotu tanba MLPM ninia vizaun no misaun maka luta atu liberta povu Maubere hosi ki’ak, dezigualdade, justisa sosiál no moras oin-oin ne’ebé afeta ba povu.

MLPM mós iha planu atu implementa governasaun rejionál iha ne’ebé munisípiu sira sei nakfila ba konsellu rejionál no ema ne’ebé ukun maka governadór ida ho nia vise atu nune’e lori ukun ne’e besik liu ba povu no povu mak na’in loloos ba ukun.

Alem de kria governasaun rejionál, MLPM mós sei kria postu administrativu 66 ne’e nakfilak ba distritu atu nune’e lori osan no dezenvolvimentu ba besik reinu no fasilmente atu povu asesu ba fasilidade públiku sira no hafasil servisu governu sentrál nian atu tau-matan di’ak liután ba povu nia moris.

Advertisement

Jornalista: Vito Salvadór