Hatutan.com, (29 Abríl 2023), Díli— Partidu Movimentu Libertasaun Povu Maubere (MLPM) iha programa ida bainhira hetan asentu iha Parlamentu Nasionál (PN) no hola parte hodi forma governu foun iha eleisaun Parlamentár 2023, hakarak atu transforma postu administrativu 66 ne’ebé iha, nakfilak bá munisípiu.

Programa ne’e iha tanba MLPM haree katak, atribuisaun governu lokál iha postu administrativu ladún efetivu nune’e tenke transforma hotu bá munisípiu.

Lee Mós: Liberta Povu Maubere Hosi Ki’ak, MLPM Sei Investe Iha Seitór Hotu-hotu

Advertisement

“MLPM sei transforma postu administrativu 66 ne’e nakfilak ba munisípiu atu lori osan no dezenvolvimentu ba besik liu reinu no fasilmente atu povu asesu ba fasilidade públiku no hafásil servisu governu sentrál nian atu tau-matan di’ak liu tán bá povu nia moris,” Prezidente MLPM, Reis Cadalac hateten bá Hatutan.com iha sede nasionál MLPM Bairru-Pité, Sábadu (29/04/2023).

Hosi transformasaun postu administrativu hotu-hotu bá munisípiu ne’e maka MLPM sei implementa governasaun rejionál iha ne’ebé munisípiu sira sei nakfilak ba Konsellu Rejionál no ema ne’ebé ukun maka governadór ida ho nia vise atu nune’e lori ukun ne’e besik liu bá povu no povu mak na’in loloos bá ukun ne’e.

Tuir Reis Cadalac, trasformasaun governasaun ne’e ho objetivu atu dezenvolvimentu iha seitór Agrikultura, Edukasaun, Saúde no Infraestrutura la’o di’ak liu tán ba oin.

“Ami hanoin katak, ho implementasaun governasaun rejionál no munisipál, governu sentrál fó de’it asisténsia finanseiru no kada tinan fó de’it millaun $1 ba kada munisípiu atu povu Maubere dezenvolve sira nia moris iha ne’ebá no hametin liu tán governasaun lokál no kustu ne’ebé sufisiente, povu Maubere moris hakmatek ona no moris ho di’ak,” Reis Cadalac argumenta.

Oras ne’e daudaun, Timor Leste iha aldeia 2.233, suku 452, Postu administrativu 66 no munisípiu 13 ho Rejiaun Administrativa Espesiál ida.

Advertisement

Jornalista: Vito Salvadór