Hatutan.com, (30 Abríl 2023), Díli—Membru Komisaun Harii Dame ONU nian ka United Nation Peacebuilding Commission (UN PBC), hato’o apresiasaun ba Centro chega! kona-bá servisu no esforsu sira ne’ebé halo ba prosesu harii dame iha Timor-Leste (TL).

Diretór Centro Nacional Chega! I.P, Hugo Maria Fernandes iha loron Sesta (28/04/2023), fahe esperiénsia ba Membru Komisaun Harii Dame ONU liu hosi Assembleia Membru Komisaun Harii Dame ONU nian ka United Nation Peacebuilding Commission ne’ebé hala’o iha Kuartél Jerál ONU nian iha Nova Iorke. Foto/CNC.

Diretór Centro Nacional Chega! I.P, Hugo Maria Fernandes iha loron Sesta (28/04/2023), fahe esperiénsia ba Membru Komisaun Harii Dame ONU nian katak, Timor-Leste nia prosesu harii dame iha Timor-Leste ne’e liu hosi knaar ne’ebé CAVR, CVA, Painel Espesiál ba Krimi Sériu hosi tinan 2001 to’o 2008 no mós knaar ne’ebé mak Centro Chega! hala’o hosi tinan 2017 to’o ohin loron.

Ko’alia iha Assembleia Ambasadór sira hosi Membru Komisaun Harii Dame ONU nian ka UN Peacebuilding Commission (UN PBC), Diretór Ezekutivu hato’o kona-bá lisaun sira hosi Timor-Leste ne’ebé mak hatudu liu hosi vizaun boot líder sira Timor-Leste nian kona-bá harii dame iha Timor-Leste no mós progressu sira ne’ebé mak halo ona hahú hosi tinan 2001.

Assembleia ne’ebé loke ofisialmente hosi Xefe PBC, Asistente Sekretáriu Jerál Asuntu Direitu Umanu no Asistente Sekretáriu Jerál ba Asuntu Harii Dame ne’e partisipa hosi Ambasadór na’in 21 ho adjuntu ambasadór sira membru UN PBC nian.

“Ambassadór sira hato’o apresiasaun boot ba servisu ne’ebé CNC halo, ne’ebé husik hela lisaun di’ak ba membru UN PBC sira, hodi bele kontinua apreende atu tulun nasaun sira ne’ebé mak iha hela konflitu no nasaun sira ne’ebé mak foin sai hosi konflitu,” Hatutan.com sita komunikadu hosi pájina ofisiál Facebook Centro Chega.I.P.

Hafoin Assembleia, Radio ONU nian mós halo entrevista ho Hugo M. Fernandes hodi kontinua fahe esperiénsia Timor- Leste nian ba membru ONU sira.

Nune’e mós, Xefe UN PBC, Ambassadór Ivan Simonovic, Reprezentante Permanente Kroasia nian ba ONU, hala’o enkontru ho Ambassador Karlito Nunes, Reprezentante Permanente Timor-Leste nian ba ONU no Diretór Ezekutivu, hodi ko’alia kona-bá posibilidade CNC atu kontinua fahe esperiénsia Timor-Leste nian ba país membru sira seluk iha futuru.

Assembleia ne’e hala’o iha Kuartél Jerál ONU nian iha Nova Iorke, rona mós esperiénsia hosi Kolombia no Gambia ne’ebé mak foin kompleta servisu Komisaun Lia Loos no Rekonsiliasaun iha sira nia pais ne’ebé mak hakarak mós aprende hosi Timor-Leste kona-bá lala’ok sira hodi implementa rekomendasaun Komisaun Lia Loos nian.

Centro Chega! nu’udar Institutu Publiku Ida ne’ebé mak úniku liu iha mundu tanba nu’dár instituisaun ida ne’ebé mak harii hafoin CAVR no CVA kompleta sira nia knaar iha tinan 2001 no 2008.

Pais sira seluk ne’ebé mak liu hosi prosesu harii Komisaun Lia Loos No Rekonsiliasaun, laiha ida mak harii instituisaun hanesan ho CNC. Ezemplu ida-ne’e nu’udár rezultadu ne’ebé pais sira seluk konsidera Timor-Leste hatudu duni kompromisiu boot no sai nu’udár lider ida iha harii dame iha mundu.

“Ambassadór membru UN PBC sira mós apresia no rekoñese katak, Timor-Leste hatudu mós ba mundu katak iha lider sira hanesan Eis Prezidente Kay Rala Xanana Gusmão, Eis Primeiru Ministru Mari Alkatiri, Prezidente José Ramos-Horta, Eis Primeiru Ministru Rui Maria de Araújo no Primeiru Ministru Taur Matan Ruak mak hatudu duni sira nia vizaun boot harii dame nian hahú hosi estabelesimentu CAVR, CVA no CNC,” Hugo subliña iha komunikadu ne’e.

Assembleia Membru Komisaun Harii Dame ONU nian ka United Nation Peacebuilding Commission ne’e, hala’o iha Kuartél Jerál ONU nian iha Nova Iorke.

Jornalista: Vito Salvadór