Hatutan.com, (03 Maiu 2023), Díli—Governu liuhosi desizaun Konsellu Ministru (KM) nian, deside ona hodi kansela ka la halo diskusaun tán kona-bá alterasaun saláriu mínimu ne’ebé definitivu bá traballadór Timoroan sira iha rai-laran tanba tempu badak liu ona no mandatu Governu ne’e mos atu remata ona.

Maski propósta alterasaun ida-ne’e rasik enkamiña ona bá iha meza Ministru Prezidénsia Konsellu Ministru (MPKM), Fidelis Manuel Leite Magalhães nian, hodi halo ajendamentu bá diskusaun iha sorumutu sira Konsellu Ministru nian, maibé, ohin, Governu liuhosi Portavós Fidelis Magalhães rasik deklara katak, sei la halo tán ona diskusaun bá proposta alterasaun ne’e, inklui la diskute ona mós proposta ruma tán kona-bá Projetu Dekretu-Lei seluk, tanba tempu badak liu ona.

Lee Mós: Traballadór Tinan 10 Ho Saláriu $115, KSTL Konsidera Estadu Halo Diskriminasaun

“Iha Konsellu Ministru iha desizaun katak Lei sira sei la avansa ona tanba tempu ne’e badak liu. Dekretu-Lei sira, ida ne’ebé mak ita define katak, iha nia natureza tékniku, nesesidade tékniku atu halo korresaun ruma mak ita avansa ho Dekretu-Lei. Ita lakohi atu halo alterasaun sira, tanba Dekretu-Lei ho Lei hirak ne’ebé mak iha impaktu estruturante, iha faze eleitorál ninian,” Portavós Oitavu Governu, Fidelis Manuel Leite Magalhães hateten liuhosi konferénsia imprénsa iha Palásiu Governu Dili, Kuarta (03/05/2023).

Diskusaun sira kona-bá atu halo alterasaun bá saláriu mínimu traballadór sira nian, presiza diskute ho kle’an, nune’e presiza mós tempu ida ne’ebé mak sufisiente duni.

“Bainhira ita halo, ita diskute Lei saláriu mínimu ne’e ita tenke diskute ho kle’an, ne’ebé han tempu oitoan. Sé ita haruka bá Parlamentu mós, iha ne’ebá, Parlamentu laiha plenáriu no laiha kalendáriu bá iha tinan lejislatura ida-ne’e. Entaun, dokumentus haruka bá mós, depois kaduka tiha,” Ministru Fidelis fó razaun.

Antes ne’e Ministru Koordenadór bá Assuntu Ekonómiku (MAKE), Joaquim Amaral propoin atu hasa’e saláriu mínimu bá traballadór sira ho valór hosi $115 hasa’e bá $135 bazeia mós bá orsamentu iha Grande Ospoções do Plano (GOP).

Joaquim Amaral hateten, atu hasa’e ka define saláriu bá traballadór nasionál sira, presiza haree mós bá iha realidade tanba iha elementu lubun ida mak governu tenke avalia uluk molok foti desizaun.

Jornalista: Rogério Pereira Cárceres