Hatutan.com, (30 Abríl 2023), Díli- Partidu Dezenvolvimentu Nasionál (PDN) hakarak  estabelese fundu espesiál ida bá juventude sira hodi apoiu dezenvolvimentu iha komunidade no hakotu dependénsia juventude sira nian bá servisu husi setór públiku no privadu sira.

Lee Mós : PDN Tau Programa Prinsipál 11 bá Hadi’a Povu Nia Moris

Fundu ne’e, tuir PDN nia konseitu atu finansia projetu no programa ne’ebé bele apoiu joven sira iha sira nia dezenvolvimentu rasik no fundu ne’ebé sei sai hanesan kapitál bá juventude sira mai husi orsamentu jerál estadu ne’ebé foti husi fundu petrolíferu Timor-Leste nian.

Advertisement

Prezidente Juventude PDN, Ikun Maia. Foto/Elio dos Santos da Costa

Prezidente Juventude PDN, Ikun Maia hateten, PDN iha programa espesiál bá juventude sira tamba ne’e bainhira PDN hetan fiar hodi bá ukun sei apoiu estabelesimentu asosiasaun juventude no reabilita infraestrutura desportiva hotu no harii instalasaun foun inklui jináziu multi funsaun atu bele akumula no halibur foin-sa’e.

“Ami haree katak juventude barak dezempregu, sira atu kontínua estudu osan laiha, tamba ne’e PDN iha ona planu atu kria fundu espesiál bá joven sira, nune’e sira bele iha kapital rasik atu dezenvolve sira nia grupu no bele apoiu sira bá moris mesak hodi kontribui ba kreximentu ekonomia foin-sa’e sira nian iha sosiedade,” Prezidente Juventude PDN, Ikun Maia bá Hatutan.com iha sede PDN, Vila Verde, Díli, Domingu (30/04/2023).

Prezidente Juventude PDN ne’e hatutan, fundu ne’ebé sei apoiu ba juventude sira sei bá rai iha Banku Nasionál Komérsiu Timor-Leste (BNCTL), no bainhira juventude sira hakarak asesu bá kréditu hodi halo negósiu ka halo grupu hakiak animál ka grupu desportiva sira sei laiha funan, tamba fundu ne’e tau espesiál dunik bá juventude sira.

Liu husi fundus bá juventude sira mós bele utiliza bá iha formasaun bá kuadru no apoiu bá iha formasaun rekursu umanu iha kada postu administrativu no suku to’o aldeia sira.

“Osan ne’e ita tau atu bele fó mós bá sentru formasaun  juventude sira iha postu administrativu to’o suku,” Nia subliña.

Hosi sorin seluk, Prezidente Partidu PDN, Lucas Soares Colibere hateten, PDN sei la halo diskriminasaun bá juventude sira liu husi fundu ne’ebé sei estabelese.

Advertisement

PDN sei identifika ho di’ak juventude sira-nia difikuldade sira atu nune’e fundu ne’ebé iha benefísiu juventude sira.

“Juventude hotu-hotu sei asesu bá fundu juventude nian no ne’e hanesan kapitál ne’ebé sai baze atu juventude sira iha kbiit finanseiru rasik atu determina sira-nia futuru no iha empregu bá an rasik,”  Lucas Soares Colibere afirma.

PDN komprometidu atu investe makas iha setór hotu-hotu liu-liu setór sira ne’ebé sei envolve direita partisipasaun juventude sira nian bá dezenvolvimentu nasionál.

Jornalista: Vito Salvadór

Advertisement