Hatutan.com, (04 Maiu 2023), Díli—Polísia Nasionál Timor-Leste (PNTL) liuhosi Komandu Munisípiu Baucau, detein sidadaun na’in-neen iha sela detensaun tanba transporta ai-konstrusaun ho roo ilegalmente hosi Wetar Indonézia mai Timor-Leste (TL), Kuarta (03/05/2023).

Komandante Departamentu Investigasaun Kriminál (DIK), Superintendente Xefe Polísia, Jorge Monteiro ho ekipa hala’o konferénsia imprensa iha Kuartél Jerál PNTL, Caicoli, Kinta (04/05/2023). Foto/PNTL.

Sidadaun na’in-neen ne’e kompostu hosi sidadaun Indonézia na’in-lima no Timoroan na’in-ida ne’ebé Polísia kaptura iha área Suku Mulia, Postu Administrativu Laga, Munisipiu Baucau.

Lee Mós: Dua WNI Masuk Secara Ilegal Ke Timor-Leste

“Iha dia 03 fulan Maiu, iha área Munisipiu Baucau ninian Suku Mulia, polísia investigasaun kriminál iha Baucau konsege detein sidadaun Indonézia na’in-lima, espesialmente sira hosi Illa Wetar ninian ho roo, hamutuk ho ai-konstrusaun 20 kúbiku atu halo transaksaun ho ita-nia sidadaun Timor-Leste ninian, ne’ebé ke hela iha suku Mulia ho nia identidade Z,” Komandante Departamentu Investigasaun Kriminál (DIK), Superintendente Xefe Polísia, Jorge Monteiro  hateten liuhosi konferénsia imprensa iha Kuartél Jerál PNTL, Caicoli, Kinta (04/05/2023).

Sidadaun na’in-lima hosi Indonézia ne’e atualmente iha hela komandu PNTL Munisipiu Baucau ninia kontrolu. Prosesu identifikasaun bá sira na’in-lima kontinua hela.

Prosesu identifikasaun bá Timoroan Z ne’ebé PNTL suspeita halo transaksaun ho sidadaun Indonézia, hodi transporta ai mai TL espesialmente iha Munisipiu Baucau mós iha prosesu identifikasaun nia laran.

“Atualmente roo ne’ebé sira utiliza no ai ne’ebé iha roo laran, iha hela kontrolu PNTL munisipiu Baucau ninian. Kazu ida-ne’e sei iha prosesu identifikasaun nia laran no espera katak, prosesu identifikasaun ne’e remata, ita sei rejista iha Ministériu Públiku rejiaun Baucau ninian hodi kontinua prosesu,” Komandante Jorge Monteiro hateten.

Hafoin prosesu ida-ne’e remata, polísia sei transmite mós informasaun bá iha adidu Polísia Indonézia nian iha embiaxada Dili, Timor-Leste, nune’e bele hatene situasaun no mós sira bele akompaña sidadaun ne’ebé enfrenta hela prosesu iha Timor-Leste.

Jornalista: Rogério Pereira Cárceres