Hatutan.com, (06 Maiu 2023), Díli—Sussesór São Pedro hanesan Ulun boot Igreja Katólika iha mundu, Papa Francisco hato’o mensajen dame bá sarani no povu Timor-Leste (TL), husu atu hotu-hotu iha desizaun ida di’ak liu, lori prosperidade, lori páz ba família no ba nasaun tomak.

Foto/Media Vaticana.

Papa Francisco hato’o bá maun-alin inan-feton doben sira iha Timor-Leste katak, nia hasoru-malu hela ho Bispu sira Timoroan nian, mesak matenek de’it.

Lee Mós: Papa Francisco Hakarak Kampaña Eleitóral iha TL La’o ho Pasífika

“Sira haktuir ona mai ha’u moris sarani sira nian iha imi leet oinsa imi servisu, buka hakas-an atu sai buras hanesan povu ne’ebé forte, ha’u deseza di’ak ba imi hotu.  Bainhira imi tenke hili atu halo desizaun ruma, ha’u hatene katak imi hatene halo desizaun ida ne’ebé di’ak liu hotu mak sira ne’ebé lori prosperidade, lori paz ba família no ba nasaun tomak,” Mensajen Papa Francisco nian ne’e publika hosi média Arkedioseze Metropolitana Díli, Sábadu (06/05/2023).

Ukun-na’in Kreda Katólika ne’e hakarak paz ba timoroan sira, husu atu bele moris iha paz, haki’ak valór umanu, valór família nian liu-liu moris iha ksolok laran. Ksolok ne’e efeitu ida hosi Maromak nia grasa.

Atu Nai haraik ba povu Timor Leste grasa ksolok nian hodi la’o ba oin nafatin, keta lakon matak malirin ksolok fiar nian.

“Ha’u komprimeta imi ho ha’u nia bensaun. Ha’u husu atu imi reza mai ha’u. Ha’u fó bensaun ba imi ho fuan laran tomak, la’o ba oin nafatin no sempre ba oin nafatin. Ha’u fó bensaun ba imi, hodi Padre, hodi Filho no hodi Espíritu Santu sira nia naran, amen. Na’in-Feto tau-matan ba imi hotu,” Papa Francisco fó bensaun.

Vizita Ad Limina

Iha Visita Ad Limina Apostolorum mak visita bá Apóstolo sira nia rate. Vizita ida-ne’e, hahú ona hosi tinan 1585 (Papa V) to’o agora, no vizita ida-ne’e obrigatóriu ba Bispu hotu-hotu iha mundu rai-klaran.

Iha Ad Limina ne’e, Bispu sira vizita no selebra missa iha Túmulto dos Apóstolos no Basílika sira iha Roma.

Visita dikastériu sira iha Kúria Romana no ikus liu Bispu sira kompsotu hosi Arsebispu Arkedioseze Metropolitana Díli, D. Virgílio Kardeál do Carmo da Silva, SDB, Bispu Dioseze Maliana, D. Norberto do Amaral ho Bispu eleitu Dioseze Baucau, D. Leandro Maria Alves hasoru-malu ho Amu Papa Francisco nu’udár susessór São Pedro nian, hodi hatudu Uniaun kolejiál episkopál ne’ebé sólidu hanesan Jesus Kristu ho nia eskolante sira.

Jornalista: Vito Salvadór