Hatutan.com, (08 Maiu 2023), Díli—Mediadór ho Xefe Departamentu foun hosi Diresaun Nasionál Prevensaun Konflitu Komunitáriu, Autoridade Protesaun Sivil (DNPKK-APC) partisipa iha formasaun kona-bá Lideransa Transformativa no Igualdade Jéneru.

Mediadór ho Xefe Departamentu foun hosi Diresaun Nasionál Prevensaun Konflitu Komunitáriu, Autoridade Protesaun Sivil (DNPKK-APC) partisipa formasaun kona-bá Lideransa Transformativa no Igualdade Jéneru, iha Suai Room, Timor-Plaza, Segunda (08/05/2023). Foto/APC.

“Formasaun lideransa transformativa ne’e atu kontribui ba servisu mediadór no Xefe Departamentu foun ninia servisu ho di’ak liután,” Komandante Operasaun Nasionál APC, Superientendente Asistente PNTL, Nuno Romualdo Gomes hateten iha abertura ne’ebé hala’o iha Suai Room, Timor-Plaza, Segunda (08/05/2023).

Lee Mós: APC Simu Doasaun Euro 550,000 hosi Uniaun Europeia

Nuno Romualdo Gomes  konsidera formasaun lideransa importante loos, atu kapasita di’ak liutan koñesimentu mediadór sira-nian hodi hala’o servisu ho di’ak atu kontribui ba hametin pás no redusaun konflitu iha komunidade nia leet.

Advertisement

Mediadór ninia serviu barak liu iha terrenu ho kbiit atu halo koordenasaun ho autoridade lokál no entidade sira, hodi haree ba kazu disputa no konflitu sira.

Reprezentante UN WOMEN iha Timor-Leste, Flora Wai Shan Chan esplika, dezde kedan iha tempu Covid-19 iha tinan 2020, formasaun lideransa tranformativa hala’o hamutuk UN WOMEN, DNPKK ho JU,S ne’ebé haree kona-bá justisa liga ho mediadór sira-nia servisu hodi responde ba violénsia bazeia ba jéneru liuliu igualdade jéneru iha TL.

Nia konsidera mediadór DNPKK sira-nia papel importante tebes iha sosiedade iha Timor-Leste, atu asegura no garantia hodi fó asesu justisa ba ema hotu-hotu, inklui violénsia bazeia ba jéneru liuliu ba feto, labarik feto sira no grupu vulnerável sira.

Nia fó parabens ba mediadór DNPKK nia servisu mediasaun ne’ebé konsege fó ona solusaun ba kazu hamutuk 200 hosi kazu 400 ne’ebé DNPKK rejista iha tinan 2021 no iha tinan 2022 solusiona tán kazu hamutuk 166.

“Ida-ne’e hatudu servisu mediadór DNPKK 45% hetan rezultadu di’ak no susesu,” nia hateten.

Advertisement

Partisipante na’in 50 ne’e kompostu hosi Xefe Departamentu DNPKK foun hosi munisípiu Aileu, Ainaro, Ataúro, Baucau, Bobonaro, Covalima, Manatuto, Manufahi, RAEOA, Viqueque, Laútem, inklui mediadór hosi munisípiu 12 no RAEOA.

Formasaun ne’e, hala’o durante loron haat hahú hosi 08 to’o 11 maiu 2023 ne’ebé fasilita matéria hosi fasilitadór DNPKK ho UN WOMEN, ho fundu mai hosi governu Swédia.

Jornalista Estajiáriu: Lazaro Pereira Quefi

Advertisement