Hatutan.com, (08 Maiu 2023), Díli—Ministériu Obras Públikas (MOP), liuhosi Bee Timor-Leste, Empreza Públika (BTL, E.P), iha Segunda (08/05/2023) ofisialmente kontrata kompañia lokál MARLVI Unipessoal, Lda ho $835,054.69 hodi konstrui sistema bee-moos bá populasaun iha Suku Dukurai, Katrai-Karaik no Haufu, iha Postu Administrativu Lefetoho, Munisipiu Ermera.

Bee Timor-Leste Empreza Públika (BTL, E.P) Asina Kontratu ho kompañia manán-na’in ne’ebé sei implementa Projetu Konstrusaun Sistema Bee-Moos iha Postu-Administrativu Letefoho, Munisípiu Ermera, Salaun Enkontru Edifísiu Sentrál BTL, E.P, Caicoli, Segunda (08/05/2023). Foto/Elio dos Santos da Costa.

Prezidente BTL, E.P, Carlos Peloi dos Reis hateten, projetu Melloramentu Sistema Fornesimentu bee moos iha Postu Administrativu Letefoho, Munisípiu Ermera, Munisípiu Ermera iha faze dahuluk.

Lee Mós: BTL, E.P Kontrata Zufado Unip Lda ho Orsamentu $830,000 Kanaliza Bee-Moos iha Covalima

“Ita asina kontratu ho kompañia ida, atu komesa halo servisu melloramentu sistema bee-moos iha kapitál Postu Letefoho ne’ebé benefísia suku Dukurai, Katrai-Kraik ho Haufu,” Carlos Peloi dos Reis hateten hafoin serimónia Asina Kontratu iha Salaun Enkontru Edifísiu Sentrál BTL,E.P, Caicoli.

Carlos Peloi fiar katak, ho kontratu ne’ebé assina ona, hahú aban bá oin kompañia manán-na’in bele mobiliza ona ekipamentus no tékniku sira hodi bele halo servisu lalaís tanba projetu ne’e ho durasaun fulan-neen (6) de’it.

“Servisu ida ne’e, sei lori tempu fulan-neen (6). Espera sira servisu tuir tempu ne’ebé ita konkorda ona iha kontratu. Ha’u espera ita-nia autoridade lokál sira, xefe postu administratdór, apoia kompañia no Bee Timor-Leste iha terrenu atu bele rezolve problema sosiál sira, problema tékniku sira,” Carlos Peloi hateten.

Kona-bá konstrusaun bá sistema melloramentu Bee-moos nian sei iha tán projetu boot rua, liu-liu bá iha instalasaun tanki rezervatóriu ho kuantidade boot, hodi halo kanalizasaun no distribuisaun.

“Ne’e ketak. Projetu ohin ne’e foin halo de’it bá hadi’a tanki iha bee-ulun iha rua. Iha tanki ida seluk bolu BTT ne’e iha 10, ho tanki ho tanki distribuisaun ninian 11, inklui distánsia kanalizasaun 17,5 kilómetrus. Entaun, imi haree ninian kustu ne’e boot tanba distánsia ne’e dook, ita kobre 18 kilómetrus bá de’it tranzmisaun ho tanki. Sei iha tán projetu rua ita sei anunsia atu sira mós bá halo servisu kompleta malu,” nia hateten.

Projetu ida ne’e sei benefísia populasaun 5.280, alende ne’e sei kanaliza mós ba instituisaun públiku sira hanesan Edukasaun, Saúde, Igreja nomós edifísiu públiku sira seluk.

Iha fatin hanesan, na’in bá Kompañia MARLVI Unipessoal,Lda, Delio dos Santos Martins agradese bá BTL,E.P, tanba prosesu tenderizasaun ne’ebé liuhosi prosesu lubun ida, maibé ikus mai selesiona hodi ezekuta projetu ne’e.

Delio dos Santos promete sei ezekuta projetu ne’e tuir tempu ne’ebé mak hatuur ona iha kontratu katak, to’o fulan-nee (6) projetu ne’e tenke konklui.

Jornalista: Rogério Pereira Cárceres