Hatutan.com, (08 Maiu 2023), Díli—Ministériu Públiku (MP), liuhosi Prokuradór Ricardo Goudinho Leite, promove kríme tolu bá arguidu na’in-haat mak hanesan RdCB, EPdS, JPdS no APLA, tanba deskonfia involve iha kazu omesídiu ne’ebé rezulta vítima Dodi Adão de Jesus mate, iha área Kintál-Boot, Díli, Sábadu (06/05/2023).

Arguidu na’in-haat hanesan RdCB, EPdS, JPdS no APLA, ne’ebé deskonfia involve iha kazu omesídiu hodi oho Dodi Adão de Jesus, iha área Kintál-Boot, Díli, Sábadu (06/05/2023), submetee ba prosessu Primeiru Interrogatóriu Judisiál iha Tribunál Judisiál Primeira Instánsia Díli (TJPID), Mandarin, Dili, Segunda (08/05/2023). Foto/Elio dos Santos da Costa.

Kríme tolu ne’e mak hanesan, Omesídiu Simplés, Tentativa Omesídiu no Utilizasaun Arma Branka ne’ebé hatuur iha rezolusaun númeru 05/2017 kona-bá Arma Branka, iha ne’ebé uza sasán kro’at.

Lee Mós: Polísia Kaptura Suspeitu Na’in-haat Ne’ebé Envolve iha Kazu Oho Dodi Adão de Jesus

Ho aktu assasinatu ne’e maka, iha Segunda (08/05/2023), Polísia Nasionál Timor-Leste (PNTL), liuhosi Ekipa Investigasaun Komandu Munisipiu Dili, submete kedan suspeitu sira ne’e bá tuir Prosesu Primeiru Interrogatóriu Judisiál iha Tribunál Judisiál Primeira Instánsia Díli (TJPID), Mandarin, Dili.

Suspeitu na’in-haat ne’e, ekipa Investigasaun Komandu Munisipiu Dili, transporta bá Tribunál to’o iha tuku 15:30, lorokraik Otl no hahú tama bá iha interrogatóriu iha tuku 16:25 lorokraik Otl.

Prossesu primeiru interrogatóriu judisiál ne’e la’o kuaze oras haat resin to’o tuku 20:45 mak konklui, maibé, desizaun finál bá kazu ida-ne’e, Juiza Ercília adi’a bá aban Tersa (09/05/2023) tuku 14:00 lorokraik Otl.

Hafoin konklui faze ida-ne’e, ekipa investigasaun Komandu PNTL Díli, transporta fila kedan arguidu sira bá iha Caicoli.

Audiénsia primeiru interrogatóriu ne’e prezide hosi Juiza Ercília de Jesus, Ministériu Públiku (MP), reprezenta hosi Prokuradór Ricardo Goudinho Leite no Arguidu sira hetan Assiténsia Legál hosi Defensór Francisco Caetano Martins.

Molok ne’e, informasaun ne’ebé Hatutan.com asesu hosi ekipa servisu sekreta sira katak, Suspeitu na’in-haat (4) ne’e ho identidade inisial RdCB (idade 18).

Suspeitu EPdS (idade 24), Suspeitu JPdS (idade 19) oríjen hosi Postu Administrativu Na’in-Feto, Suku Santa Cruz, Aldeia 12 Novembru, hela iha área Kintál-boot.

Suspeitu APLA (idade 24) hosi Aldeia Caidawalari, Suku Makadiki, Postu Administrativu Uatulari, Munisipiu Viqueque, hela-fatin Kintál-boot.

Jornalista: Rogério Pereira Cárceres