Hatutan.com, (11 Maiu 2023), Díli— Association of Southeast Asian Nations (ASEAN) liu hosi Prezidente Repúblika Indonézia, Joko Widodo (Jokowi) hato’o “Bem-vindo” hodi simu Timor-Leste (TL) integra iha organizasaun rejionál ne’e hanesan observadór, iha ámbitu Simeira ASEAN ba dala-42, ne’ebé hala’o  iha Labuan-Bajo NTT, Indonézia, Kuarta (10/05/2023).

Primeiru-Ministru (PM) Taur Matan Ruak iha enkontru bilaterál ho Prezidente Repúblika Indonézia, Joko Widodo iha Labuan-Bajo, loron 9 fulan-maiu 2023 iha ámbitu Simeira ASEAN ba dala-42, hodi aprofunda liutan relasaun no kooperasaun entre Timor-Leste no Indonézia iha Rejiaun ASEAN. Foto/Média GPM.

Jokowi hato’o Bem-vindo tanba iha Simeira ASEAN ne’ebé hala’o iha Phnom Phen tinan 2022, ofisialmente iha ona akordu prisnipál bá Timor Leste hanesan nasaun membru, maibé tenke kompleta lai rekezitus balun antes atu sai hanesan membru totál hodi bele sai hanesan nasaun membru bá-11 ne’ebé integra hamutuk ho ASEAN.

Lee Mós: Xanana-Koa Kim Hourn Diskute Estatutu TL Nu’udár Observadór ASEAN

“Primeiru Ministru Timor Leste, Bem-vindo iha família boot ASEAN nian,” Jokowi hato’o Bem-vindo bainhira loke Simeira ASEAN, ne’ebé publika hosi média KOMPAS.COM.

Advertisement

Iha sorin seluk Indonézia prontu atu fó apoiu bá Timor Leste iha ninia preparasaun sira atu adere totál bá ASEAN.

Diretór Kooperasaun ASEAN Iha Ministériu Negósiu Estranjeiru Indonézia, Sidharto Suryodipuro hateten, Timor Leste oras-ne’e daudau tenke prienxe no kompleta lai faze balun atu bele hetan estatutu membru totál ba ASEAN.

“Indonézia mós iha ona planu atu apoia Timor Leste iha tinan ida ne’e ba preparasaun ne’e,” nia hateten iha Labuan Bajo NTT, Segunda (08/05/2023), hanesan publika iha Antara.

Apoiu ne’e liu hosi konvida funsionáriu na’in-30 hosi Ministériu Negósiu Estranjeiru no Kooperasaun (MNEK) Timor-Leste atu hala’o estájiu hodi halo estudu komparativu iha Indonézia.

“Ami sei konvida funsionáriu na’in-30 atu partisipa iha Ministériu oioin iha Indonézia ne’ebé sei ko’alia kona-bá Prezidénsia ASEAN nian,” nia hateten.

Advertisement

Balun hosi funsionáriu na’in 30 ne’e sei hala’o estájiu iha Ministériu Negósiu Estranjeiru no Kooperasaun Indonézia nian no sira seluk sei koloka iha Ministériu sira seluk.

Prezensa Timor Leste nian hanesan observadór iha Simeira ASEAN ba dala-42 tinan 2023 iha Labuan Bajo, Nusa Tenggara Timur, sai hanesan momentu istóriku ne’ebé lori efeitu pozitivu bai ha seitór ekonomia no sosiál.

Primeiru Ministru TL, Taur Matan Ruak, agradese ba Indonézia ba oportunidade espesiál ida ne’e.

“Prezensa Timor Leste nian hanesan momentu istóriku. Tanba bele fó efeitu positive iha aspeitu ekonomia no sosiál. Obrigadu ba Prezidente Reúblika Indonézia Jokowi hanesan mós Prezidente ASEAN 2023, ba apoiu no komitmentu durante ne’e,” Taur Matan Ruak hateten.

Jornalista: Rogério Pereira Cárceres

Advertisement