Lei Obriga Partidu Polítiku Sira Hamoos Atributu Kampaña

Hatutan.com, (19 Maiu 2023), Díli—Comissão Nacional de Eleições (CNE), husu bá estrutura, militante, apoiantes no simpatizante sira Partidu Polítiku hamutuk 17, atu hala’o limpeza ka hamoos hotu símbolu sira partidu nian ne’ebé taka iha fatin públiku durante kampaña.

“Tuir Lei, depois de eleisaun semana ida ita hamutuk ho Partidu Politiku sira tenke hasai panfletu, broxura ne’ebé sira taka iha dalan ninin, inklui Bandeira. Tenke hatun duni,” Prezidente CNE, José Agostinho Belo hateten iha Otél Novo Turismo, Lecidere-Dili, Sesta (19/05/2023).

Lee Mós: CNE Rejísta Kríme Eleitorál 10 Iha Viqueque, Baucau no Manufahi

Durante fulan ida, 18 Abril to’o 18 Maiu 2023, Partidu Politiku 17 ninia militante, apoiante no simpatizante sira, halo kampaña oioin, liuhosi fahe bruxura, pamfletu no Bandeira partidu ida-idak nian, taka iha fatin públiku hotu, hodi konvense eleitór bá vota sira-ninia partidu.

Nune’e, tuir Lei, hafoin eleisaun Parlamentár iha Domingu (21/05/2023) liu tiha semana ida, ParPol sira tenke limpeza no hasai hotu ona simbólu sira ne’e.

CNE mós hanoin ona katak, sei hamutuk ho autoridade seguransa sira, hanesan Polísia Nasionál Timor-Leste (PNTL), Seguransa Sivíl sira sei observa fila-fali panfletu sira ne’ebé dada besik sentru votasaun, hasai obrigatóriu.

“Ita obrigatóriu tenke hasai no informa bá partidu seluk tanba atu nune’e sira labele influensia ema nia votu,” José Belo hateten.

Sei Aplika Sansaun

José Belo dehan, bainhira eleisaun liu ona semana ida maka Partidu Politiku sira la orienta ninia militante, simpatizante, apoiante sira atu hamoos penfletu sira ne’e, CNE sei aplika sansaun administrative.

“Sansaun iha no iha Lei ne’e kuandu sira la hasai, CNE hamutuk ho polísia ita hasai. Maibé, sira-nia subsídiu ne’ebé mai ne’e ita ko’a. Sira nia osan kampaña nian $4 ne’e sei iha hela,” José Belo dehan.

Jornalista: Rogério Pereira Cárceres