Ramos-Horta Hamriik iha Jornalista Nia Kotuk Defende Liberdade Imprensa

Hatutan.com, (25 Outubru 2022), Díli- Prezidente Repúblika (PR), José Ramos-Horta, firme hamriik metin iha jornalista nia kotuk hodi defende liberdade imprensa iha Timor-Leste atu asegura direitu no liberdade jornalista sira nian hodi hakerek faktu no lia-loos.

Lee Mós : PNTL Notifika Xefe Redasaun no Jornalista Jornal Independente, CI Sei Haruka Karta Lamentasaun

Prezidente Repúblika José Ramos-Horta bá jornalista sira iha kuartel jerál F-FDTL, Fatuhada, Tersa (25/10/2022), hateten relasiona ho notifikasaun hosi instituisaun Polísia Nasionál Timor Leste ba iha Xefe Redasaun no jornalista jornal Idependente nia parte sei haree ida ne’e no sei buka hamriik iha jornalizmu nia kotuk, iha jornál nia kotuk hodi asegura atu jornalista sira iha direitu no liberdade atu hakerek buat ne’ebé bele.

Nia afirma justisa devia preokupa ho krime organizadu, ho ema halo pasaporte falsu, droga ba ka buka halai sai osan hosi Timor arbiru la tuir lei, ne’e mak justisa devia haree la’ós preokupa fali ho jornalista sira nia nia rezultadu reportajen.

“Ha’u sei haree ida ne’e, ha’u nu’udar Xefe Estadu ha’u sei akompaña no hamrik iha jornalista sira nia kotuk,” Prezidente Repúblika José Ramos-Horta afirma.

Xefe Estadu dehan, nia kontra lei kontra kriminaliza difamasaun no husu tenke muda tiha lei ne’e atu iha liberdade totál ba média.

“Ida difamasaun ne’ebé krime ne’e di’ak liu muda ona, ne’e ha’u sei haree ida ne’e no sei halo diálogu ho Governu no Deputadu sira hotu atu husu favor hatun tiha lei kriminaliza difamasaun ida ne’e,” Ramos-Horta tenik.

Lee Mós : Média Labele Sai Portavóz ba Ukun-Na’in Sira

Jornalista: Vito Salvadór