Hatutan.com, (21 Maiu 2023), Díli—Prezidente Partidu Libertasaun Populár (PLP) no atuál Primeiru-Ministru (PM), Taur Matan Ruak prontu simu rezultadu saida de’it mak povu fó liu hosi rezultadu eleisaun Parlamentár tinan ida ne’e.

Prezidente Partidu Libertasaun Populár (PLP), Taur Matan Ruak vota iha sentru votasaun EBC 17 Abríl, suku Metiaut, no Prezidente Partidu Demokrátiku (PD), Mariano Assanami Sabino vota iha sentru Votasaun EBF 1,2 ciclo, Naroman, suku Bairru- Pité, Domingu (21/05/2023). Foto/repro Hatutan.com.

Taur Matan Ruak konsidera povu mak iha desizaun bo’ot liu atu fó konfiansa bá partidu ida ne’ebé mak atu kaer ukun. Tanba ne’e husu bá povu tomak tenke mantein Pás no estabilidade hodi simu rezultadu ne’ebé iha.

Lee Mós: Xefe Estadu Husu Partidu Politiku Sira Mantein Disiplina no Respeita Desizaun Povu

“Oportunidade mai dala ida, la’ós mai dala rua ka dala tolu. Espera katak, povu tomak hatene oinsa mak aproveita oportunidade ba sira nia benéfísiu, ba dezenvolvimentu liu-liu dezenvolvimentu iha sira nia família, komunidade no nasaun,” Taur Matan Ruak hateten iha sentru votasaun EBC 17 Abríl, suku Metiaut, Domingu (21/05/2023).

Rezultadu eleisaun Parlamentár, PLP atu hetan kadeira hira mós Taur Matan Ruak nafatin kontente ho rezultadu ne’ebé povu fó liu hosi prosesu demokrátiku ida-ne’e.

“Ha’u kontente ho ida ne’ebé povu fó ba ha’u. Konserteza la’ós ona kadeira ualu, maibé númeru ne’ebé de’it, kadeira ne’ebé de’it mak povu fó ba ha’u, ha’u agradese ba ida-ne’e,” nia subliña.

PD Prontu Simu Rezultadu

Prezidente Partidu Demokrátiku (PD), Mariano Assanami Sabino mós deklara prontu simu rezultadu hosi povu tanba povu mak haki’ak demokrasia no na’in ba ukun loloos.

Mariano Assanami Sabino observa katak, votasaun la’o di’ak, fiskais sira mós hala’o sira nia servisu no STAE mós hala’o sira nia servisu no hein katak votasaun sei la’o diak liu, ema hotu iha esperansa atu povu nia votu ne’e tenke sai esperansa ba saida mak povu hakarak, labele iha manipulasaun tanba direitu povu nian ne’e labele manipula.

“Eleisaun atu povu ezerse funsaun hodi hatur ukun ne’ebé povu nian. Bainhira ukun ne’e mosu, ukun ne’e tenke servi no lori moris di’ak ba povu. Ida-ne’e mak responsablidade polítiku ne’ebé partidu polítiku sira tenke iha no ukun na’in sira tenke iha. Katak, iha nasaun demokrátiku laiha líder ida ne’ebé mosu de’it, maibé povu mak hatur tanba ne’e bainhira hetan konfiansa ba kaer ukun tenke servi povu,” Mariano Assanami Sabino hateten hafoin vota iha sentru Votasaun EBF 1,2 ciclo, Naroman, suku Bairru- Pité, Domingu (21/05/2023).

Manan ka lakon, Assanami konsidera ida-ne’e povu mak deside tanba ne’e partidu polítiku hotu-hotu tenke simu rezultadu, no hotu-hotu tenke hakruk ba povu.

“Husu bá militante no simpatizante sira Partidu Demokratiku nian katak servisu hotu ba eleisaun nian hotu ona, no ohin hakmatek hodi hein povu nia desizaun. Tanba ne’e tenke simu realidade hosi julgamentu povu nian no nafatin konbina, halo diálogu atu la’o hamutuk ba oin hodi servi povu,” nia apela.

Jornalista: Vito Salvadór