Hatutan.com, (21 Maiu 2023), Díli—Prezidente Repúblika (PR), José Ramos-Horta hateten Partidu Polítiku sira ne’ebé kompete iha eleisaun Parlamentár tinan ne’e, tenke mantein disiplina no respeita povu nia desizaun liu hosi votasaun ne’ebé demokrátiku no sekreta.

Eleisaun Parlamentár 2023, Prezidente Repúblika (PR), José Ramos-Horta vota iha sentru Votasaun Suku Metiaut, Domingu (21/05/2023). Foto/Elio dos Santos da Costa.

Ramos-Horta observa katak, prosesu votasaun la’o di’ak hela no fó parabéns ba STAE, CNE, PNTL, autoridade hotu bá tempu ida-ne’e, servisu makas desde horikalan no hanesan Xefe Estadu akompaña situasaun no informasaun hotu-hotu, iha balun la kompletu, balun tendensiozu, maibé sempre koordenadu hodi verifika no atentu loos iha fatin hotu-hotu hodi halo atuasaun rápidamente.

Lee Mós: Timor-Leste Vota, Xanana: CNRT Mak Manan no Lú Olo Mós Garante FRETILIN Manan

Xefe Estadu fiar katak lider Partidu Polítiku hotu-hotu no sira nia Reprezentante iha fatin hotu-hotu nafatin disiplina no hatudu maturidade.

“Ha’u hatene no ha’u fiar líder sira hotu-hotu no líder sira nia reprezentante iha fatin hotu-hotu. Ha’u apela bá sira hotu atu nafatin disiplina, hatudu Partidu nia maturidade no eespeita povu nia direitu soberanu atu vota. Iha Rezultadu mai ita hotu-hotu akompaña no simu deit. Ne’e rezultadu ne’ebé mai hosi povu ne’ebé simples no podér ne’ebé iha kada tinan lima mak ne’e. Nia ezerse poder ida-ne’e, ne’e duni ita hotu hatudu Komportamentu ne’ebé di’ak. nune povu ida ne’e bele vota ho hakmatek,” Ramos-Horta hateten hafoin vota iha sentru Votasaun Suku Metiaut, Domingu (21/05/2023).

Xefe Estadu espera katak, buat di’ak bá nasaun ida-ne’e maka hotu-hotu tenke iha absulutu maturidade, no Governu ne’ebé efetivu kredibilidade liu bá nasaun ida ne’e, ema hotu espera sé mak maioria manan, konvida atu halo Governu ida ne’e forsa liun tán.

“Ha’u Hakarak haree Primeiru Ministru ida ne’ebé Karismátika ho Internasionál esperiénsia ba nasaun ida-ne’e iha tinan lima mai,” Ramos-Horta hateten.

Ba líder polítiku sira nafatin apela atu kalma no respeita malu ba Rezultadu ida ne’ebé mai hosi Eleisaun ida-ne’e, ba Povu nia Diretu Soberanu.

Líder sira povu ne’ebé ki’ak, loron-loron terus maibé sira espera governu ida ne’ebé matenek no vizaun di’ak nune’e ekonomia bele bá oin no kria empregu bá Joven sira.

Sempre komplikadu kuandu maioria absuluta, Primeiru Partidu mais votadu tenke buka tán partidu ida ka rua hodi forma Koligasaun eleitorál atu bele hetan maioria Parlamentu, tanba programa liu iha orsamentu tenke iha maioria atu aprova.

Jornalista: Vito Salvadór