Hatutan.com, (23 Maiu 2023), Díli—Tribunál Judisiál Primeira Instánsia Díli (TJPID), iha 23 maiu hahú prosesu primeiru interrogatóriu judisial bá sidadaun VAG ne’ebé deskonfia hosi Repúblika Indonézia (RI), ne’ebé atu vota iha sentru votasaun Eskola Bázika Fillial (EBF), Suku Darulete, Postu Administrativu Likisá Villa, iha ambitu Eleisaun Parlamentár, Domingu (21/05/2023).

Tribunál Judisiál Primeira Instánsia Díli (TJPID), iha 23 maiu hahú prosesu primeiru interrogatóriu judisial bá sidadaun VAG ne’ebé deskonfia hosi Repúblika Indonézia (RI), ne’ebé atu vota iha sentru votasaun Eskola Bázika Fillial (EBF), Suku Darulete, Postu Administrativu Likisá Villa, iha ambitu Eleisaun Parlamentár, Domingu (21/05/2023). Foto/Elio dos Santos da Costa.

Durante prosesu primeiru interrogatóriu judisiál ne’e, Ministériu Públiku (MP), liuhosi Prokuradór João Marquês, promóve kríme rua, ida maka Fraude Votasaun, temi iha artigu 237 no krime Falsifikasaun Agravada iha artigu 304, hosi Lei Kódigu Penál Timor-Leste.

Lee Mós: PNTL Asegura Sidadaun Indonézia Ne’ebé Atu Vota Iha EBF Darulete

“Buat hotu ita tuir prosesu. Investigasaun la’o, buat hotu iha MP nia liman, depois hosi parte MP rasik ohin halo promosaun mai ho kríme rua ne’e,” Advogadu Marino da Cruz de Jesus, hateten iha Tribunál Díli, Tersa (23/05/2023).

Kona-bá krime tolu ne’e, parte arguidu rasik mós konfesa katak, faktu sira ne’e loos hotu tanba nia iha duni kartaun eleitorál ne’ebé mak nia halo. Maibé, molok nia hetan kartaun eleitorál ne’e, nia la’o tuir hotu prosedura ne’ebé mak iha.

“Bainhira nia halo, nia bá husu iha Xefe suku, iha momentu ne’ebá. Depois xefe suku mak dehan, kuandu atu halo eleitorál, tenke halo karta transferénsia (surat pindah), deklarasaun hosi Kefa-Indonézia. Ho ida-ne’e mak nia halo duni hodi mai, nia prodús duni eleitorál ne’ebé mak iha,” Advogadu Marino haktuir.

Defeza hosi VAG ne’e hatutan, nia kliente la’ós foin mai Timor-Leste, maibé hahú kedan hosi 2005, nia mai bebeik ona hodi vizita ninia família sira iha área Darulete.

“Entaun, nia mai hosi Kefa to’o iha Darulete iha ne’ebá mak, depois nia haree votasaun nia mós hakarak bá tuir votasaun,” nia dehan.

Iha prosesu primeiru interrogatóriu ne’e, arguidu rasik deklara bá juiz karak, nia mai Timor ho inisiativa rasik, mai mesak, laiha parte ida ka indivídu no grupu ruma mak fasilita nia mai to’o iha Timor.

Husu Aplika de’it AP

Haree bá krime sira ne’e, parte defeza husu Tribunál atu bele fó de’it medida koasaun Aprezentasaun Periodika bá arguidu VAG, tanba medida nia laiha ona hanoin atu halai.

Arguidu ninia dokumentu sira parte autoridade sira prende hotu ona, depois iha Darulete, arguidu hela duni iha nia ria rian sira, ne’ebé mak uma rasik.

“Ne’ebé, laiha perturbasaun atu nia halai sees hosi ne’e. Parte Defeza husu atu atraves de TIR, atraves de Provizaun Aujésia, tahan ona passaporte sira ne’e, husu atu bele aprezentasaun kada periódika de’it, aplika aprezentasaun de’it bá iha arguidu, hodi hein prosesu normál, ka prosesu investigasaun ne’ebé maka la’o iha MP,” Advogadu Marino hateten.

Audiénsia julgamentu ne’e, prezide hosi Advogadu Marino da Cruz de Jesus, Juiz Álvaro Maria Freitas no MP João Marquês.

Reformadu hosi POLRI

Advogadu Marino konta, iha tempu okupasaun Indonézia nian iha Timor, arguidu hanesan mós membru ida hosi Polísia Repúblika Indonézia (POLRI).

Maibé iha 1999, tanba situasaun funu, nune’e arguidu VAG deside halai bá Indonézia no hela iha Kabupaten Kefa.

Iha Kefa, arguidu kontinua hakna’ar nu’udár membru POLRI no to’o iha 01 maiu foin lalais ne’e nia idade tama ona reforma, hodi fila bá vida sívil.

Ho nune’e, iha 17  maiu ne’e VAG deside fila mai Timor, vizita família sira iha Darulete no hanoin ona atu hela metin ona mós iha TL.

La’ós ne’e de’it, bainhira iha lia ruma iha família, hanesan kultura ne’ebé mak nia família nian, parte família sira informa bá arguidu iha Kefa no nia sempre mai Timor-Leste hodi partisipa.

“Durante nia mai bebeik hosi 2005, to’o agora. Tanba normalmente nia sempre mai, tanba nia mai ida ne’e nia hakarak atu sai ona sidadaun Timor,” nia hateten.

Informasaun seluk ne’ebé Hatutan.com asesu hosi arguidu ninia família sira katak, daudaun ne’e, arguidu mós sai benefisiáriu ba pensaun veteranu hosi ninia inan nian (matebian).

Jornalista: Rogério Pereira Cárceres