Hatutan.com, (05 Juñu 2023), Díli—Prezidente Repúblika (PR), José Ramos-Horta sei ko’alia ho Prezidente Parlamentu Nasionál atuál, Aniceto Longuinhos Guterres atu halo ajendamentu posse membru Parlamentu Nasionál (PN) foun ho urjénsia iha fulan Juñu nia laran.

Prezidente Repúblika, José Ramos-Horta.

“Há’u sei husu atu posse ba membru Parlamentu Nasionál foun iha fulan Juñu ne’e. Tenke urjente. Ha’u nia preferénsia urjente. Ha’u sei ko’alia ho Prezidente Parlamentu Nasionál atu aselera prosesu ne’e,” José Ramos-Horta hateten iha Aeroportu Internasionál Prezidente Nicolau Lobato, Segunda (05/06/2023).

Lee Mós: Rezultadu Final STAE: CNRT Hetan Kadeira 31 no FRETILIN Kadeira 19

Razaun Prezidente Repúblika husu posse urjénsia ne’e atu governu foun bele toma posse, nune’e governu foun bele aprezenta programa ba iha PN.

Xefe Estadu konsidera Timor-Leste nia ajenda nasionál no internasionál kle’an no naruk tebe-tebes, tanba ne’e pessolamente Ramos-Horta hakarak kolabora di’ak ho Parlamentu foun ho governu.

Ba oin Xefe Estadu hakarak ajuda kria klima ne’ebé di’ak iha Parlamentu laran, entre bankada sira hotu-hotu, atu tane no apoia ajenda nasionál.

Ajenda nasionál no planu doméstiku tenke aselera rekuperasaun ekonómika, ajenda doméstika tenke haree buat ne’ebé governu sesante husik ba governu foun atu kontinua.

Governu sesante mós simu projetu balun mai hosi governu anteriór no remata hanesan Portu Tibar, hanesan kabu submariñu seidauk remata maibé prossesu ne’e hahú kleur ona.

Aeroportu foun ne’e ko’alia tinan 20 ona, agora mak foin asina kontratu ho kompañia bo’ot ida hosi Indonézia.

Xefe Estadu dehan, Parlamentu Nasionál maioria mak sei halo prospota bá naran Primeiru Ministru (PM) ne’ebé mai hosi Aliansa Maioria Parlamentár no Prezidente Repúblika fó posse.

“Primeiru Ministru iha autoridade no kompeténsia no eleitu hosi maioria Parlamentár no sei hili nia membru governu, Prezidente Repúblika labele interfere fali,” Ramos-Horta hateten.

Ohin Tribunál Rekursu pronunsia ona kona-bá rezultadu ne’ebé konfirma maioria iha Parlamentu Nasionál.

Jornalista: Vito Salvadór