Hatutan.com, (07 Juñu 2023), Díli—Membru sira Oitavu Governu Konstitusionál nian, lideradu hosi Primeiru Ministru (PM), Taur Matan Ruak, iha kuarta, 07 fulan-juñu ne’e, termina ona mandatu, hafoin governasaun tinan-lima, 2018 to’o 2023.

Membru VIII Governu Konstitusionál hasai foto hamutuk ba dala ikus nian iha Palásiu Governu nia oin, Kuarta (07/06/2023). Foto/Elio dos Santos da Costa.

Tuir ajenda hosi Gabinéte PM Taur nian, iha Kuarta (07/06/2023) tuku 09:00 dadeer, membru sira Oitavu Governu Konstitusionál nian, hotu-hotu tenke partisipa iha sorumutu ordináriu Konsellu Ministru (KM) nian, iha Palásiu Governu, Díli.

Lee Mós: Enkontru Informál ho Xefe Estadu, Fixu CNRT-PD Forma Governu no 22 Juñu Posse Membru PN Foun

Sorumutu Konsellu Ministru ordináriu ne’ebé lori de’it oras ida-ne’e, nu’udár sorumutu ikus nian hodi fó “A Deus” bá malu, tanba konklui ona sira-nia mandatu governasaun.

Hafoin sorumutu ne’e, iha tuku 10:13 dadeer Otl, membru governu sira sai hosi sala reuniaun Konsellu Ministru nian, tun mai hodi hasai foto hamutuk nu’udár memória no rekordasaun ikus nian iha durantu governasaun.

Observasaun Hatutan.com iha terrenu nota katak, hafoin hasai fotografia hamutuk entre Xefe Governu Taur Matan Ruak ho ninia membru governu sira, tama fila-fali bá palásiu laran, hodi hemu hamuutuk kafé dadeer nian (snack), molok fahe malu.

Iha sala konferénsia imprensa, jornalista sira mós hein hela atu bele konfirma asuntu importante sira, tuir ajenda kobertura kada redasaun média.

Iha ne’e, membru governu sira ne’ebé disponível hodi ko’alia bá média maka, Ministru Administrasaun Estatál (MAE), Miguel Pereira de Carvalho, Ministru Justisa (MJ), Tiago Amaral Sarmento, Sekretáriu Estadu Arte no Kultura (SEAK), Teófilo Caldas, Ministru Ensinu Superior Siénsia no Kultura (MESSK), inklui Vise Ministru Interiór (VMI), António Armindo.

Rezultadu Sorumutuk KM

Durante sorumutuk, Primeiru-Ministru halo retrospetiva Mandatu Governu nian, rekoñese serbisu pozitivu ne’ebé alkansa ona hosi Ezekutivu no agradese ba kontribuisaun, dedikasaun hosi membru Ezekutivu sira hotu.

Aprezenta ona Relatóriu Finál Mandatu VIII Governu nian, hosi tinan 2018 to’o tinan 2023, publikasaun ida ne’ebé deskreve atividade no rezultadu prinsipál Ezekutivu sira nian hahú hosi kedan bainhira sira simu pose, nune’e mós dezafiu hirak ne’ebé sira hasoru no rekomendasaun sira ba futuru.

“Iha aprezentasaun Relatóriu ne’e, Ministru Prezidénsia Konsellu Ministru, Fidelis Manuel Leite Magalhães, hateten, konkista no rezultadu ne’ebé alkansa ona hosi Governu Konstitusionál da-VIII, maski hasoru difikuldade no dezafiu sira durante mandatu,” Hatutan.com sita komunikadu.

Kompozisaun VIII Governu Konstitusionál

Primeiru-Ministru, Taur Matan Ruak

Vise-Primeira-Ministra, Armanda Berta dos Santos

Vise-Primeiru-Ministru, José Maria dos Reis

Ministru Prezidénsia Konsellu Ministrus, Fidelis Manuel Leite Magalhães

Ministru Koordenadór Asuntus Ekonómikus, Joaquim Amaral

Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo

Ministru Finansas , Rui Augusto Gomes

Ministra Negósius Estranjeirus no Kooperasaun, Adaljiza Albertina Xavier Reis Magno

Ministru Justisa, Tiago Amaral Sarmento

Ministru Administrasaun Estatál, Miguel Pereira de Carvalho

Ministra Saúde, Odete Maria Freitas Belo

Ministru Edukasaun, Juventude no Desportu, Armindo Maia

Ministru Ensinu Superiór, Siénsia no Kultura, Longuinhos dos Santos

Ministra Solidariedade Sosiál no Inkluzaun, Armanda Berta dos Santos

Ministru ba Asuntus Kombatentes Libertasaun Nasionál,  Júlio Sarmento da Costa “Meta Mali”

Ministru Planu no Ordenamentu, José Maria dos Reis

Ministru Obras Públikas, Abel Pires da Silva

Ministru Transportes no Komunikasoins, José Agustinho da Silva

Ministru Turizmu, Komérsiu no Indústria, José Lucas do Carmo da Silva

Ministru Agrikultura no Peskas, Pedro dos Reis

Ministru Defeza, Filomeno da Paixão de Jesus

Ministru Interiór, Taur Matan Ruak

Ministru Petróleu no Minerais, Víctor da Conceição Soares

Vise-Ministru Finansas, António Freitas

Vise-Ministru Negósius Estranjeirus no Kooperasaun, Julião da Silva

Vise-Ministru Justisa, José Edmundo Caetano

Vise-Ministru Administrasaun Estatál, Lino de Jesus Torrezão

Vise-Ministru Saúde, Bonifácio Mau Coli dos Reis

 Vise-Ministru Edukasaun, Juventude no Desportu, António Guterres

Vise-Ministra Solidariedade Sosiál, Signi Chandrawati Verdial

Vise-Ministru Obras Públikas, Nicolau Lino Freitas Belo

Vise-Ministra Turizmu Komunitáriu no Kulturál, Inácia da Conceição Teixeira

 Vise-Ministru Komérsiu no Indústria, Domingos Lopes Antunes

Vise-Ministru Agrikultura no Peskas, Abílio Xavier de Araújo

Vise-Ministru Interiór, António Armindo

Sekretáriu Estadu Formasaun Profisionál no Empregu, Alarico do Rosário

Sekretáriu Estadu Kooperativas, Elizário Ferreira

Sekretáriu Estadu Ambiente, Demétrio do Amaral de Carvalho

Sekretáriu Estadu ba Komunikasaun Sosiál, Merício Juvinal dos Reis “Akara”

 Sekretáriu Estadu Terras no Propriedades, Eldino Rodrigues dos Santos

Sekretáriu Estadu Juventude no Desportu, Abrão Saldanha

Sekretáriu Estadu Arte no Kultura, Teófilo Caldas

 Sekretáriu Estadu ba Asuntus Kombatentes Libertasaun Nasionál, Júlio da Conceição “Loro Mesak”

Sekretáriu Estadu Peskas, Elídio de Araújo

Sekretáriu Estadu Protesaun Sivíl, Joaquim José Gusmão dos Reis Martins

Sekretária Estadu ba Igualdade no Inkluzaun, Maria do Rosário Fátima Correia

Jornalista: Rogério Pereira Cárceres