Hatutan.com, (07 Juñu 2023) Díli—Prezidente Partidu Congresso Nasionál Reconstrução Timorense (CNRT), Kay Rala Xanana Gusmão ho estrutura hasoru-malu informál ho Prezidente Repúblika (PR), José Ramos-Horta iha Palásiu Prezidensiál Bairru-Pité, hodi aprezenta prontidaun hamutuk ho Partidu Demokrátiku (PD) forma governu da-sia.

“Prezidente Repúblika konvida atu realiza enkontru informál tanba CNRT sai partidu vensedór, ne’ebé mai husu atu la’o nusa, hotu-hotu hatene ona Sekretáriu Jerál CNRT Francisco Kalbuadi Lay ba tiha ona Sede PD, ne’ebé ami mós informa ba Xefe Estadu katak partidu rua ne’e sei la’o hamutuk,” Xanana Gusmão hateten, hafoin enkontru ho Xefe Estadu.

Lee Mós: PPN Aseita Posse Bá Membru Lejislativa Foun Iha Juñu

Tanba ne’e, ohin duni estrutura PD mós sei mai hasoru malu ho Xefe Estadu informál no enkontru formál loloos ne’e depois de sesaun dahuluk VI lejislatura.

“Iha sorumutu ne’e parte CNRT husu hela ba Xefe Estadu kona-bá kalendáriu no antes ne’e Prezidente Parlamentu Nasionál, Aniceto Guterres ko’alia ona katak, hein to’o loron 15 no sei monu iha loron 22 Juñu. Ita hein atu liu tiha ne’e iha loron daruak eleisaun bá Prezidente PN foun no tuir mai komisaun sira,” Xanana esplika.

Ho ida-ne’e maka Xefe Estadu bele bolu formalmente Primeiru Ministru (PM) indijitadu ne’ebé mai hosi partidu maioria Parlamentár mak indijita.

“Ohin Xefe Estadu bolu CNRT hanesan partidu mais votadu la’ós Primeiru Ministru indijitadu. Hafoin eleze tiha PPN, Vise Prezidente no komisaun sira hotu foin mak Xefe Estadu bolu Primeiru Ministru indijitadu formalmente hodi husu dehan formasaun governu oinsá atu bele disksute,” Prezidente CNRT ne’e informa.

Xanana Gusmão mós rona lia anin katak, sesaun lejislatura foun sei akontese iha fulan Setembru, maibé CNRT la aseita ho ida-ne’e tanba tuir previzaun ba rejimentu ne’ebé hateten másimu loron 15, no onestamente CNRT konkorda ho ida-ne’e tanba CNRT rasik  obedese ba regra sira atu labele hamosu difikuldade ba órden Konstituisionál.

Hanesan líder másimu partidu CNRT no líder nasionál, Xanana parabeniza povu Timor-Leste liu-liu ba juven sira ne’ebé hatudu maturidade no hahalok di’ak durante kampaña eleisaun Parlamentár la’o di’ak no laiha akontesimentu ruma grave no nafatin halo apelu atu situasaun ne’e kontinua hakmatek hodi revela maturidade polítika povu ninian.

Kona-ba proporsionalidade ba membru IX governu Xanana sei la ko’alia iha ne’e, tanba ohin enkontru ho Xefe Estadu hanesan enkontru informál ho partidu mais votadu no depois loron rua ka tolu hosi loron lejislatura foun hahú Parlamentu foun maka Xefe Estadu foin bolu Primeiru Ministru indijitadu hosi partidu maioria Parlamentár hodi ko’alia kona-bá proporsionalidade governu dasia nian.

CNRT Deteta Fraude Eleitorál

Fraúde eleitorál ne’ebé CNRT haree, fiskais partidu nian ne’ebé iha STAE no CNE aprezenta ona,  hotu-hotu hatene tiha ona katak Partidu CNRT la simu no CNRT hakarak protesta no tau fraude eleitorál ne’e ba oin la’ós atu altera rezultadu.

Xanana Gusmão dehan, kazu ne’ebé partidu CNRT sei lori ba oin atu bele hanorin jerasaun foun no futuru lider país ninian atu labele monu tán ba problema sira hanesan ne’e.

Iha fatin balun ne’ebé deputadu CNRT nian iha ne’eba ho tán fiskais, CNRT hetan votus 0, ida-ne’e sente katak demais.

“Ami bolu kedan deputada Bendita Magno hodi dehan bee imi la vota, imi abstein fali imi nia sentru votasaun, maibé deputada sira hatan sira iha ne’ebá no CNRT hetan votus 0. Ne’e signifika, votu ne’ebé CNRT hetan fó fali ba partidu seluk, ida-ne’e mak halo ami la simu,” Xanana kestiona.

Tanba ne’e lider másimu Partidu CNRT ne’e hateten katak, sei la reklama ona maibé CNRT hakarak prosesu ne’e la’o nafatin ba oin, atu bele kastiga tiha ema sira ne’ebé halo hodi hanorin katak iha futuru rai ida ne’ebé hotu-hotu tenke respeita Lei, iha demokrasia nia laran hotu-hotu tenke ezerse ninia direitu labele halo buat hanesan ne’e, labele tan akontese tanba sei iha eleisaun suku, sei iha eleisaun ba desentralizasaun nune’e kurije agora atu labele akontese iha futuru fraude eleitorál tanba ne’e krime.

Jornalista: Vito Salvadór