Hatutan.com, (19 Juñu 2023), Díli- Prezidente Partidu Congresso Nasionál Reconstrução Timorense (CNRT), Kay Rala Xanana Gusmão,  hato’o omenajen bá saudozu kamarada Luís Lobato no espoza Primeiru-Ministru Taur Matan Ruak, Dona Isabel Ferreira ne’ebé fila hikas bá Aman Maromak Nia Kadunan Santu.

Lee Mós : Isabel da Costa Ferreira Husik-iis Tanba Sofre Kankru

Prezidente partidu CNRT, Kay Rala Xanana Gusmão. Foto/Elio dos Santos da Costa

“Aproveita oportunidade ida-ne’e hodi partidu CNRT nia naran hato’o sentidu pêsames bá Señor Luís Lobato, ne’ebé iha loron hirak liubá fila ona bá Aman Maromak, ita husu ho harohan atu perdua nia salan sira,” Kay Rala Xanana Gusmão hateten  iha konferénsia nasionál partidu CNRT ne’ebé hala’o iha Salaun OKA, Surik Mas, Segunda (19/06/2023).

Prezidente partidu CNRT ne’e fó mos omenajen bá Primeiru-Ministru Taur Matan Ruak nia-kaben Saudoza Isabel Ferreira ne’ebé fila hikas ona ba Aman Maromak Nia Kadunan Santu hodi husik hela oan, família no parentes tomak.

“Lori partidu CNRT nia naran hato’o mós sentidu kondolénsia bá família Dona Isabel Ferreira nian, bá nia kaben Taur Matan Ruak, bá nia oan sira ne’ebé agora bá oin sei la haree, sei lasente sira-nia inan nia prezensa iha sira-nia leet,” Xanana Gusmão subliña.

Nia husu atu ema hotu reza ba Maromak, bá matebian saudozu Luís Lobato no Dona Isabel Ferreira nia klamar, atu bá hamutuk iha Maromak Nia Kadunan Sanuo hodi prepara fatin no hein ita hotu bainhira husik hela mundu ida-ne’e.

Lee Mós : Antigu Vise-Ministru Saúde Luís Lobato Hakotu Iis

Jornalista : Vito Salvadór