Hatutan.com, (04 Jullu 2023), Díli—Governu liu hosi Ministériu Justisa (MJ) iha tempu badak nia laran, sei halo ‘duni’ reforma internu bá iha instituisaun Policia Ciêntífica e de Investigação (PCIC), liu-liu halo auditoria bá kestaun sira kona-bá atitude, dixiplina no regra utilizasaun bá armas ka kilat.

Ministru Justisa (MJ), Amandio de Sá Benevídes hateten, Inisiativa atu halo reforma ida-ne’e, tanba iha seremónia pose bá membru IX Governu Konstitusionál nian iha Sábadu (01/07/2023), Primeiru Ministru, Kay Rala Xanana Gusmão rasik deklara tiha ona no kompromete katak, sei halo Re-estruturasaun bá PCIC, tanba la hatudu liu integridade no profesionalizmu.

Lee Mós: Ameasa Komunidade ho Pistola, Oknum PCIC Dezarmadu no Hetan Sansaun Dixiplinár

“Ida ne’e hanoin sira ne’ebé mak Primeiru Ministru tau iha prioridade atu membru governu sira ne’ebé mak tutela bá organizasaun, instituisaun sira ne’e atu haree. Ita presiza halo levantamentu, halo audit, atu bele haree kestaun sira kona-bá atitudes, dixiplinas, uza arma de fogu iha públiku, iha servisu,” Amandio de Sá Benevídes hateten hafoin soromutu Konsellu Ministru iha Palásiu Governu, Díli, Tersa (04/07/2023).

Ministru Amandio esplika, reforma internu katak tenke hadi’a dixiplina, hadi’a instrumentu sira ne’ebé bele uza arma de fogu, iha ne’ebé mak bele uza arma de fogu nune’e bele dimunui atitude sira ne’ebé mak dala-ruma uza sala sasán Estadu nian.

Iha sorumutu dahuluk membru IX Governu Konstitusionál ne’e, Primeiru-Ministru, Kay Rala Xanana Gusmão hamutuk ho membru Governu sira análiza ona kestaun sira fundamentál ba inisiu mandatu, liu-liu prioridade sira bá loron 120 dahuluk sira no Programa Governu nian.

Jornalista: Rogério Pereira Cárceres