Hatutan.com, (06 Jullu 2023), Díli—Deskonfia funsionáriu balun iha Diresaun Jerál Servisu Rejistu Notariadu (DJSRN) fasilita hodi produs dokumentu sidadania  bá Warga Negara Indonesia (WNI) ka sidadaun ida hosi Indonézia.

Ekipa PCIC halo hela investigasaun ba sidadaun Indonézia ne’ebé deskonfia hetan dokumentu sidadania Timor nian no fasilita hosi Timoroan balun. Investigasaun ne’e hala’o iha edifísiu PCIC, Caicoli, Kuarta (05/07/2023). Foto/PNTL.

Dokumentu importante ne’ebé sidadaun ne’e asesa mak hanesan, Kartaun Eleitorál, Billete Identidade, Passaporte Timor nian, inklui dokumentu esensiál sira seluk hosi Igreja Katólika mak hanesan, sertidaun kazamentu (kaben nian).

Lee Mós: Kaderneta Passaporte Rihun 150 Lakon

PCIC Asegura

Tuir informasaun ne’ebé Hatutan.com rekolla hosi autoridade polisiál sira iha terrenu katak, sidadaun Indonézia ne’e nu’udár eis deputadu (DPR) ne’ebé deskonfia involve iha kazu balun, liu-liu kazu krime korrupsaun nian iha ninia rai oríjen.

Tanba ta’uk autoridade polisiál sira, liu-liu Polisia Repúblika Indonézia (POLRI) atu buka-tuir, nune’e nia deside halai tama mai territóriu Timor-Leste ho objetivu atu salva an, liu-liu atu hasees-an hosi aktu krime ne’ebé mak nia rasik komete.

Maski nune’e, liuhosi liña koordenasaun entre autoridade seguransa nasaun rua nian, ikus mai PCIC deteta ninia fatin lokalizasaun nian no halo kedan identifikasaun bá sidadaun estranjeiru ne’e iha rezidénsia privadu ida iha área Fomento, Suku Comoro, Postu Administrativu Dom Aleixo, munisípiu Díli.

Tanba ne’e, iha Kuarta (05/07/2023) tuku-haat liu lorokraik Otl, ekipa PCIC tun bá foti sidadaun ne’e iha rezidénsia iha área Fomento hodi transporta kedan mai asegura iha PCIC, Caicoli atu bele kontinua prosesa bá oin.

Iha dokumentu identidade sira Timor nian ne’ebé nia asesu ho naran kompletu Leonardo Benigno Tilman (LBT) ho naturalidade Munisípiu Bobonaro.

Jornalista: Rogério Pereira Cárceres