Hatutan.com, (04 Jullu 2023), Díli- Ministru Obras Públika (MOP) iha Governu da-IX ne’e, Samuel Marçal, sei halo vizita bá munisípiu hotu hodi haree projetu Estadu nian hotu ne’ebé la’o hela, inklui verifika mós projetu sira ne’ebé laiha kontratu.
Lee Mós : MOP Promete Halo Manutensaun bá Estrada Rurál Sira Molok Eleisaun Parlamentár
Ministru Obras Públika, Samuel Marçal. Foto/Elio dos Santos da Costa
Ministru Obras Públika (MOP), Samuel Marçal hateten, hafoin aprezentasaun programa prioridade Ministériu Obras Públiku nian ba loron 120 no orsamentu bá iha Konsellu Ministru, nia hahú halo vizita bá kada munisípiu atu bele halo identifikasaun bá projetu sira ne’ebé la’o iha territóriu nasionál.
“Ha’u sei hahú halo vizita ba munisípiu tomak iha territóriu nasionál hodi haree projetu sira hotu ne’ebé iha, liu-liu bá projetu sira ne’ebé la’o laiha kontratu, balun paradu no abandonadu,” Ministru Obras Públika, Samuel Marçal, informa bá jornalista sira iha Palásiu Governu, Tersa, (04/07/2023).
Antigu Diretór Jerál Ajénsia Dezenvolvimentu Nasionál (ADN) ne’e afirma, nia parte sei kontinua halo identifikasaun bá estrada sira iha kapital Díli atu bele tau iha prioridade, inklui konstrusaun bá ponte Becusse iha tinan oin.
“Ami foin mak tama mai, amu sei halo identifikasaun bá estrada sira iha Díli laran, bá infraestrutura públiku, hanesan estrada no ponte sira durante tempu inundasaun 04 fulan-Abríl 2021 to’o agora. Ami sei tau prioridade atu hadi’a,” Ministru Samuel Marçal hateten
Orienta IGEADI Normaliza Estrada ho Ponte sira Ne’ebé Aat
Ministru Obras Públiku (MOP), Samuel Marçal hateten liga ho situasaun aktual iha territóriu nasionál hatudu katak komunidade barak mak afeta bá inundasaun kauza husi udan-boot ne’ebé halo rai halai no estraga Infraestrutura bázika hanesan estrada no ponte sura iha munisípiu balun.
Haree bá situasaun atuál iha territóriu nasionál, parte Ministériu Obras Públiku orienta ona bá Institutu Jestaun Ekipamentu no Apoiu ba Dezenvolvimentu Infraestrutura (IGEADI) atu bele atua situasaun sira ne’ebé afeta ba komunidade sira.
“Horisehik, IGEADI ho obras públiku iha munisípiu tun kedas bá iha terrenu identifika no bá ponte sira ne’ebé kotu ne’e sira buka dalan alternativu, temporariamente para hodi hanoin oinsá bá oin tau fali orsamentu hodi hadi’a ponte no estrada sira ne’ebé hetan estragu kauza hosi inundasaun ne’ebé akontese,” Ministru Samuel Marçal informa.
Informasaun ne’ebé iha hatudu ponte no estrada sira ne’ebé hetan estragu hanesan iha Munisípiu Lautém ponte ida ne’ebé hetan estragu, iha Munisípiu Covalima, Ainaro rai-halai no mós iha tan munisípiu sira seluk, balun ne’ebé karreta sei bele liu, balun ne’ebé karreta labele liu hanesan iha Munisípiu Manufahi, tan ne’e orienta ona bá iha obras públiku no IGEADI munisípiu para bele buka solusaun no dalan alternativu atu komunidade sira bele asesu.
Jornalista: Vito Salvadór