Hatutan.com, (16 Novembru 2023), Díli— Ministru Obras Públika (MOP), Samuel Marçal, sei hapara kontratu ho empreza ka kontraktor sira ne’ebé la finaliza projetu fíziku iha tinan 2015 to’o mai 2019 ho 2023.
Lee Mós: MOP Hahú Re-dezeñu Estrada Urbana iha Díli no Sei Tau Alkatraun iha 2024
Ministru Obras Públika, Samuel Marçal. Foto/Elio dos Santos da Costa
Daudaun ne’e, Ministru Obras Públika (MOP ), Samuel Marçal ho nia ekipa iha Ministériu laran halo hela levantamentu no identifikasaun ba projetu fíziku on going sira ne’ebé dezde 2019 to’o mai agora la finaliza no balun abandona tiha ona..
“Maneira balun ami halo estensaun bá sira atu sira tenke servisu to’o hotu, sidauk hotu halo hotu tiha, balun ne’ebé abandona MOP tenke buka solusaun hapara lai hodi fó ema seluk kaer, sira ne’ebé servisu la’o hela ita haruka la’o nafatin bá para bele finaliza tiha,” Ministru Samuel Marçal haktuir hodi responde Hatutan.com iha Ministériu Negósiu Estranjeiru no Kooperasaun, Díli, Kinta (16/11/2023).
Kona-bá hirak mak iha prosesu on going dezde 2019 to’o mai agora, Ministru Samuel Marçal la fiksa, maibé bá projetu estada balun extende ona.
Iha fulan hirak liubá Ministru Samuel Marçal hatún ona despaxu hodi hapara projetu hirak ne’ebé hahú husi 2015 to’o 2019, la’ós kansela liu maibé hasai tiha orsamentu no husik hela nia atividade.
“Projetu balun iha 2015 to’o 2019 ne’e ha’u haruka para lai, hasai tiha, balun abandonadu, tanba iha problema sosiál balun, ne’ebé presiza rezolve hamutuk hodi kontinua nafatin,” Samuel Marçal hateten.
Governu konsidera projetu hirak ne’ebé mak sidauk konklui ne’e bele hamosu impedimentu bá kompañia seluk ne’ebé hakarak investe. Tanba ne’e, Ministru Samuel Marçal husu bá kompañia ne’ebé mak lamenta ho desizaun ne’e no ezije hakarak kontinua tenke iha koordenasaun ho Governu oinsá finaliza projetu refere.
Tuir observasaun hosi MOP katak lala’ok projetu sira ne’e la la’o tanba enfrenta problema oin-oin hanesan kapitál laiha, traballadór laiha, balun tanba problema téknika, oin-oin de’it, maibé Governu sei esforsu resolve.
Jornalista : Leopoldina de Carvalho