Hatutan.com, (14 Jullu 2023), Díli—IX Governu Konstitusionál halo ona ezersísiu ba orsamentu ratifikativu maka mantein ho orsamentu orijinál iha Orsamentu Jerál Estadu (OJE) 2023 ho nia montante billaun $2.1, ne’ebé sei utiliza hodi rezolve problema ai-moruk, pasaporte inklui vítima dezastre naturál durante loron 120.

Reuniaun Konsellu Ministru IX Governu Konstitusional. Foto/Elio dos Santos da Costa.

Vise-Ministru Finansas, Helder Lopes hateten, hosi orsamentu ratifikativu ne’ebé iha, IX Governu Konstitusionál sei tau prioridade ba saida mak Xefe Governu Kay Rala Xanana Gusmão hateten iha nia diskursu pose Governu foun.

Lee Mós: Loron 120 Rezolve Kadernéta Pasaporte Timor-Leste

“Prioridade sira ne’ebé governu sei tau maka ba loron 120 sei rezolve problema stock ai-moruk, pasaporte inklui ho normalizasaun ba dezastre naturais ne’ebé akontese loron hirak liu bá no mós buat balun ne’ebé IX Governu Konstitusionál presiza rezolve iha tinan ida-ne’e,” Helder Lopes hateten iha Ministériu Finansas, Sesta (14/07/2023).

Advertisement

IX Governu Konstitusionál mantein ho OJE 2023 no sei buka de’it espasu ka buka de’it osan iha billaun $ 2.1 ne’e nia laran, depois mak redistribui medidas foun ka prioridade sira IX Governu Konstitusionál nian, hodi implementa iha 2023 no mós aloka ba estrutura foun Governu nian ne’ebé iha.

“Ita mantein ho tetu orsamentu ne’ebé iha OJE 2023, tanba tuir relatóriu ne’ebé ita hetan hosi sistema Finansas Públikas nian, to’o 11 Jullu 2023 liu bá ezekusaun foin atinje de’it 27%. Ezekusaun sei ki’ik tebtebes no se ita atu aumenta tán osan ne’e, ita mós sukat ita nia kapasidade tanba aumenta tán osan, maibé ikus mai ita la ezekuta ne’e hanesan de’it,” nia hateten.

Tanba ne’e maka, Governu halo identifikasaun ba espasu fiskál ne’e re-aloka ba medida no estratejia sira inklui orgánika Governu nian foun, kuandu orsamentu ne’e sei liu, dalaruma rezulta ba hamenus tetu orsamentu hosi billaun $2.1 bele tun tán, maibé ida-ne’e konforme ezersísiu ne’ebé halo.

Iha sesaun traballu ba membru IX Governu Konstitusionál, Ministériu Finansas aprezenta ba membrus governu sira preparasaun kona-bá orsamentu ratifikativu no lori ba Parlamentu Nasionál depois de aprovasaun ba programa IX Governu Konstitusionál nian.

Ida seluk maka, Ministériu Finansas mós hahú aprezenta ba membru governu sira kona-bá preparativu sira ba OJE 2024 nian tanba tempu mós la’o dadauk no governu presiza aprezenta proposta OJE 2024 ba Parlamentu Nasionál no sesaun ikus liu iha sesaun traballu ne’e maka Ministériu Finansas aprezenta kona-bá jestaun finansas públika iha Timor-Leste, nune’e membru governu hotu-hotu bele iha koñesimentu kona-bá jestaun finansas públika liu-liu haree hosi Lei no Sistema.

Advertisement

Jornalista: Vito Salvadór