Hatutan.com, (28 Jullu 2023), Díli—Telekomunikasau Indonesia International (TL), S.A. (TELKOMCEL) servisu hamutuk ho Ema ho defisiénsia iha Fundasaun Ahisaun hodi hasa’e koñesimentu ema ho defisiénsia.

Telekomunikasau Indonesia International (TL), S.A. (TELKOMCEL) servisu hamutuk ho Ema ho defisiénsia iha Fundasaun Ahisaun hodi hasa’e koñesimentu ema ho defisiénsia iha área dijitál. Foto/Telkomcel.

Kooperasaun ne’e tanba Telkomcel nu’udár empreza telekomunikasaun ne’ebé konsidera ema hotu merese hetan oportunidade ne’ebé hanesan, hodi assesu informasaun hanesan ema la ho defisiénsia.

Lee Mós: Telkomcel ho ZTE Sei Hasa’e Kualidade Rede no Moderniza MNO Virtuál Core, BSS inklui VAS

Telkomcel hola inisitiva ne’e hodi fahe koñesimentu ka sharing session ba ema ho defisiénsia iha Fundasaun Ahisaun hodi prepara kapasidade rekursu umanu no dezenvolvimentu ema ho defisiénsia nian.

“Bainhira iha oportunidade servisu ruma anunsiu hosi telekomunikasaun no seitór privadu seluk ne’ebé sei publika sai iha públiku hodi ema hotu bele aplika inklui maluk defisiénsia sira mós bele asesu no kompete iha oportunidade ne’e,” Hatutan.com sita komunikadu.

Objetivu hosi fahe koñesimentu ba maluk defisiénsia sira tanba Telkomcel haree katak, sira iha kualidade ne’ebé hanesan mós ema sira ne’ebé la ho defisiénsia, tanba  Fundasaun Ahisaun rasik iha média rasik hanesan Radio Komunidade Defisiénsia Timor-Leste (RKDTL) hodi halo advokasia ba ema ho defisiénsia.

Fahe koñesimentu ne’e fasilita hosi Telkomcel iha loron 08 fulan Jullu 2023 no mós sei kontinua hasa’e abilidade sira nian.

Kontinuasaun atividade hosi Telkomcel ho Fundasaun Ahisaun iha komitmentu servisu hamutuk iha loron 19 Jullu 2023, hala’o asina nota Entendimentu (MOU) entre parte rua hodi kolabora atu fahe esperiénsia liu hosi formasaun ba ema ho defisiénsia iha futuru.

Iha sermonia asina nota entedimentu ne’e, Telkomcel mós hala’o atividade Corporate Social Responsibility (CSR) halo doasaun sasan eletrónika ka Digital Service hanesan, Laptop unidade 1, Projector unidade 2 no Router unidade 1, entrega ba maluk defisiénsia sira hodi apoia sira nia atividade no servisu iha Fundasaun Ahisaun rasik.

Serimonia entrega sasan eletrónika hosi Komissáriu Prinsipál Telkom Indonesia, Bambang Permadi no Konsellu Komissáriu, Marcelino Pandin ho CEO Telkomcel, Benedictus Ardiyanto Priyo no simu hosi Diretór Fundasaun Ahisaun, Domingos Talo Mau dos Santos ho ekipa.

Parte rua iha  esperansa katak, kolaborasaun ida-ne’e nafatin kontinua hodi tulun malu liu hosi treinamentu iha área rekursu umanu, dijitalizasaun teknolojia ba dezenvolvimentu ema ho defisiénsia iha Timor-Leste.

Jornalista Estajiáriu: Lázaro Pereira Quefi