Hatutan.com, (05 Agostu 2023), Díli- Bispu Dioseze Baucau Dom. Leandro Maria Alves, nomeia Padre Alípio Pinto nu’udár vigáriu jerál hodi servi uma-kreda no apoiu servisu sira bá Dioseze Baucau.
Lee Mós : Dom Leandro Maria Alves Hakarak Sai Símbolu Unidade no Sinodalidade
Padre Alípio Pinto Gusmão (klaran) nomeia bá vigáriu jerál Dioseze Baucau. Foto/Mídia Dioseze
Nomeasaun bá Padre Alípio Pinto ne’e bazeia bá Provizaun númeru 01/VIII/ 8/2023, Dioseze Baucau nian ne’ebé fó sai hosi xanselér Padre Mario Belo iha salaun enkontru Kámara Dioseze Baucau, Sábadu (05/08/2023).
“Ita servisu hamutuk atu lori ita-nia Dioseze ne’e bá oin, ne’e duni mai fó liman bá malu, atu buat hotu ne’ebé ita halo ne’e bá Dioseze nia di’ak,” Dom Leandro Maria Alves ne’ebé Hatuta.com sita hosi live Pájina Facebook Média Dioseze Baucau.
Dom Leandro Maria Alves subliña hotu-hotu ordena atu haburas Maromak Nia reinu, primeiru iha Dioseze Baucau, tamba ne’e maka atividade Dioseze Baucau nian tenke sai prióridade prinsipál bá nai-lulik sira hotu-hotu.
“Ita buka atu ajuda malu, ita buka atu hamoris no haburas Dioseze ne’e, ida-ne’e mak ita hotu-hotu nia responsabilidade, ita-nia forsa iha ita-nia unidade no fraternidade ne’ebé sai hanesan identidade igreja nian,” Dom Leandro Maria Alves tenik.
Vigariu Jeral Eleito, Padre Alípio Pinto agradese bá Maromak, ita ema hanoin buat seluk maibé bai-bain Maromak ne’e nia planu sempre la hanesan ho buat ne’ebé ita ema hanoin.
Bainhira Padre Alípio remata estudu iha Roma, hanoin ne’e atu bá semináriu, maibé ida-ne’e la akontese no Dom Basílio do Nascimento haruka bá parókia Vemasse no muda mai iha komisaun justisa e pas Dioseze Baucau no desizaun ida bá semináriu ne’e la akontese to’o fali simu kna’ar hanesan vigáriu jerál.
“Ita-nia amu Bispu iha planu rasik, iha hanoin rasik, ne’ebé fó hatene há’u dehan há’u presiza o iha ne’e. Semináriu ne’e interdiosezanu, ne’ebé ita hotu-hotu, padre barak ne’ebé bele bá iha ne’ebá, no ita presiza ajuda malu iha ne’e. Há’u simu servisu ida-ne’e, responsabilidade ida-ne’e,” Padre Alípio Pinto hateten.
Vigariu jeral ne’e hatutan kompeténsia ne’e amu Bispu nian, nia kolabora ho Bispu, sei halo tuir buat ne’ebé atu halo no amu Bispu dehan mai, buat ne’ebé sai interesse Dioseze Baucau nian.
“Bá Dioseze Baucau nia di’ak, buat ida ne’ebé mak ita tenke aposta mak ida-ne’e interesse Dioseze nian deit mak ita tenke tau iha as liu, ida ne’e deit há’u hanoin sei la iha problema,” Nia subliña.
Jornalista: Vito Salvadór