Hatutan.com, (07 Agostu 2023), Díli—Iha loron 20 fulan-Agostu tinan ne’e, Instituisaun FALINTIL Forsa Defeza Timor-Leste (F-FDTL) sei komemora aniversáriu ezisténsia Forsa Armada bá Libertasaun Nasionál Timor-Leste (FALINTIL) nian bá dala-48 ho tema “Hakat tuir ain-fatin FALINTIL, hametin ita-nia unidade nasionál”.

FALINTIL-Forsa Defeza Timor Leste (F-FDTL). Foto/Elio dos Santos da Costa.

Portavós no Prezidente Komisaun Organizadora bá Komemorasaun Aniversáriu FALINTIL, Capitão de Mar e Guerra João da Silva, informa, komemorasaun ida-ne’e sei realiza serimónia ofisiál iha fatin tolu la-hanesan.

Lee Mós: Ezisténsia FALINTIL Iha Tempu Rezisténsia Dignifika Povu TL

Serimónia jerál hala’o iha Kuartél Jenerál F-FDTL ho Ministériu Defeza (MD) ninian fatin iha área Fatuhada, Díli.

Eventu espesífiku rua, ida maka hala’o iha aldeia Odelgomo, Suku Aiasa, Postu Administrativu Bobonaro, Munisipiu Bobonaro, no ida tán maka, hala’o iha Suku Atelari, Postu Administrativu Laga, Munisípiu Baucau.

Razaun hili Odelgomo ho Atelari hodi hala’o serimónia solene ne’e ho objetivu atu fó hanoin fila-fali kona-bá fatin bá konsentrasaun FALINTIL sira-ninian iha tinan 1999 ne’ebé konsideradu nu’udár fatin ida istóriku iha luta libertasaun nasionál.

“Atu memoriza fila-fali konsentrasaun FALINTIL nian iha tinan 1990, tanba istória bá nasaun ida-ne’e importante. Istória ne’e hanesan abut ida bá rai ida, tanba ida-ne’e maka ita realiza iha fatin rua ne’e,” Capitão de Mar e Guerra João da Silva, informa liuhosi konferénsia imprénsa iha Kuartél Jenerál Fatuhada, Díli, Segunda (07/08/2023).

Tuir ajenda hosi komisaun organizadora, atividade ne’ebé realiza iha Tersa 08 fulan-Agostu, halo abertura bá atividade la’o ain ka Marsa  FALINTIL iha Suku Crarás, Postu Administrativu Viqueque Villa, Munisípiu Viqueque no ensera iha Suku Cairui, Postu Administrativu Laleia, Munisipiu Manatuto, Sexta 11 fulan-Agostu tinan ne’e.

Marsa FALINTIL ho objetivu atu banati hahalok asuwa’in FALINTIL nian, hodi haboot beran defende rai no povu. Sama tuir ain-fatin funu na’in sira-nian, koñese rain rasik no emar sira.

To’o iha loron 20 fulan-Agostu, realiza serimónia solene hasa’e Bandeira Nasionál nian iha Cairui (Manatuto), Odelgomo (Bobonaro).

Tanba ne’e, Komandu F-FDTL liuhosi komisaun organizadora bá komemorasaun tinan 48 ezisténsia FALINTIL nian, husu povu Timor-Leste tomak, hosi parte Leste no Oeste, hakat bá hodi partisipa direta eventu istóriku ne’e.

Iha selebrasaun aniversáriu FALINTIL nian ne’e, Komandu F-FDTL sei halo mós promosaun membru na’in atus-ida-resin, hosi Postu Cabo bá Segundu Sarjentu.

Bá iha Klasse Jenerais nian, sei iha faze diskusaun. Kona-bá Klasse Coroneis, komandu sei iha promosaun bá ninia ofisiál superiór ida bá Coronél no seluk ne’e maioria iha Klasse Sub-Balternus.

La’ós ne’e de’it, iha mós atividade jornada la’o ain hosi universitáriu sira iha grupu Estudante Hadomi Natureza (ESHANA), hahú hosi Maliana to’o iha área sira ne’ebé mak definidu.

Sei iha mós desportiva Futsal ho karáter amigável, iha mós atividade trend motór hale’u munisipiu, inklui rood rase mak realiza iha área Tasi-tolu, Díli.

Aniversáriu FALINTIL nian iha tinan ne’e, hala’o ho tema jerál maka “fó omenájen bá Asuwa’in FALINTL sira-ninia luta, hametin ita-nia Soberania nasaun. Ho espíritu luta asuwa’in FALINTIL, konsolida ita-nia dixiplina no profesionalizmu”. Tema espesífiku maka “hakat tuir ain fatin FALINTIL, hodi hametin ita-nian unidade nasionál”.

Jornalista: Rogério Pereira Cárceres