Hatutan.com, (10 Agostu 2023), Díli—Membru FALINTIL Forsa Defeza Timor-Leste (F-FDTL) na’in-152, hosi Postu Segundu Cabo, promovidu bá Postu Segundu Sarjentu, hafoin konklui formasaun bá sarjentu nian durante fulan-haat iha Centro Instrucção Comandante Nicolau Lobato (CICNL), Metinaro-Díli.

Serimónia Promosaun bá Membru FALINTIL Forsa Defeza Timor-Leste (F-FDTL) na’in-152, hosi Postu Segundu Cabo, bá Postu Segundu Sarjentu, iha Centro Instrucção Comandante Nicolau Lobato (CICNL), Metinaro-Díli, Kinta (10/08/2023). Foto: Hatutan.com.

Serimónia promosaun bá deviza ne’e realiza iha Kinta 09 Agostu 2023 ne’ebé diríje direta hosi Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek”.

Lee Mós: F-FDTL Tenke Hamutuk ho Povu iha Kualkér Tempu

Tenente Jenerál Falur “Rate Laek” parabeniza Militár sira ne’e, tanba formasaun fulan-haat ne’e hatudu ona sira-ninia kbi’it, determinasaun no espíritu funu-na’in sira-nian, konsege to’o iha faze graduasaun no ne’e marka enseramentu ida sira-ninian formasaun no treinamentu.

“Hahú hosi ohin ba oin militár na’in 152 serbisu bá nasaun nu’udár Sarjentu iha Instituisaun prestijiada F-FDTL. Komesa hosi ohin, imi ida-idak hetan responsabilidade boot liután atu diríje no fó inspirasaun bá malu. Dalan ne’ebé imi sei la’o bá oin, sei la-fásil, maibé ha’u fiar katak imi iha ona baze forte bá lideransa no abilidade atu hasoru no rezolve dezafiu sira iha futuru,” “Falur Rate Laek”.

Misaun F-FDTL nian maka asegura Pás ho estabílidade iha rai-laran, hodi hodi fó espasu bá dezenvolvimentu nasionál.

Atu kumpri objetivu hirak ne’e, kna’ar nu’udár militár tenki kontribui direta no indireta hodi mantein ordém, hatudu dixiplina no servisu maka’as, sai ezemplu bá família ho sosiedade no instituisaun no responsábilidade sira ne’e tenke tau iha neon durante oras 24 nia laran.

Susesu ne’ebé ohin loron promividu sira na’in-152 ne’e hetan, tanba hetan apoou no tulun hosi familia militár hotu ho esforsu ne’ebé kontribui bá militár. Tanba ne’e sé laiha família sira-nia domin no orasaun, oras ne’e, sira sei la mai iha fatin ida ne’e.

Iha biban ne’e, Komandante Kompañia Kapitaun Francisco Castanheira do Rego hateten, formasaun sarjentu ne’e nia finalidade atu konsolida koñesimentu ho teoria mak sira aprende no hasa’e abilidade foun ne’ebé esensiál bá funsaun sai komandante seksaun no sarjentu pelutaun nian.

Membru F-FDTL na’in-152 ne’ebé ohin ofisialmente tula ona deviza bá Postu Segundu Sarjentu ne’e, kompostu hosi feto na’in-12 no mane na’in-140.

Durante kursu formasaun sarjentu ne’e, fahe bá pelotaun 4 no kada pelotaun kompostu membru na’in 38, maibé  na’in-ida la konsege konklui kursu tanba falta no la ho justifikasaun ruma.

Serimónia promosaun bá deviza ne’e nu’udár parte ida hosi programa bá komemorasaun aniversáriu ezisténsia FALINTIL nian bá dala-48 (08 Agostu 1975 to’o 2023).

Jornalista: Rogério Pereira Cárceres