Hatutan.com, (14 Agostu 2023), Díli—Servisu Autonomu Medikamentus no Ekipamentus Saúde, Institutu Públiku (SAMES, I.P) hamutuk ho Ministériu Saúde (MS) aprezenta ona Orsamentu Ratifikativu millaun $6 ne’ebé IX haruka ona bá Parlamentu Nasionál (PN), no iha esperansa katak sei hetan aprovasaun atu bele utilza hodi responde bá stock ai-moruk iha fulan Setembru to’o Dezembru tinan ne’e.

Diretór ezekutivu SAMES, Santana Martins.

“Iha espetativa maka $6 millaun ne’e bele pasa iha Parlamentu Nasionál nune’e ami bele ezekuta iha fulan Setembru to’o Dezembru, nune’e iha inísiu Janeiru 2024 bele iha kondisaun ruma,” Diretór ezekutivu SAMES, Santana Martins hateten iha serbisu fatin Kampung Alor, Díli, Segunda (15/08/2023).

Lee Mós: Governu-SAMES Tenke Iha Ona Planu Hodi Prodús Rasik Ai-moruk iha Futuru

Parte SAMES rekoñese katak, tinan hirak ikus ne’e ai-moruk iha armazen sempre mamuk, maibé sempre iha esforsu makás atu solusiona problema todan ne’ebé hasoru bebeik iha situasaun ne’ebé difísil.

Advertisement

Santana Martins  hanesan jestór prinsipál iha SAMES klarifika mós katak, bainhira ai-moruk laiha, SAMES sempre lori todan, maibé tuir kompriensaun, jestaun bá medikamentu ne’e hola parte bá sistema siklu ida ba jestaun korrenti ida ne’ebé mak labele kotu.

Nune’e, bainhira ko’alia kona-bá SAMES, nia hola responsabilidade 50% no entidade seluk mós hola  50%. Signifika, prossesu kuantifikasaun, selesaun no definisaun bá lista kompras ai-moruk ne’e kompeténsia iha fatin seluk.

SAMES hahú hola responsabilidade bá prossesu aprovozionamentu, armazenamentu no distribuisaun maibé kompeténsia seluk ne’ebé mak hola parte iha utilizasaun ne’e fasilidades saúde sira.

Nune’e, siklu ida-ne’e labele kotu iha fatin ida, bainhira kotu iha fatin ida informasaun ne’e sei la kompletu no bele atrazu bá ninia prosesu akizasaun.

“Presiza entidades hotu-hotu apar hodi bele kumpri, nune’e aselera ita nia disponibilidade ida medikamentu nian,” Santana Martins hateten tán.

Advertisement

Orsamentu inisiál tinan 2023 ne’ebé SAMES aprezenta no aprova ho montante millaun $9.3, foin lalais aprezenta tan Orsamentu Retifikativu millaun $6, nune’e iha tinan ida-ne’e totál orsamentu bá SAMES millaun $15.3.

Tanba ne’e SAMES iha espetativa katak montante ida-ne’e bele kontinua mantein iha tinan 2034-2025, nune’e bele rezolve problema stok out iha tinan 2025.

“Ami sei la garante iha 2024 stok ne’e disponível bainhira ita seidauk iha orsamentu ne’ebé sufisiente. Tanba ne’e mak ami rekomenda nafatin ba ida-ne’e, se minimu hosi millaun $15, ne’e seidauk bele rezolve,” nia dehan.

Relatóriu semanal medikamentu iha 21% mak stock ai-moruk mamuk por volta 109 item no iha itema 110 ne’ebé stock mamuk.

Nune’e, SAMES kontinua esforsu nafatin atu bele solusiona problema ne’e, no iha esperansa ida katak sei hakas kompañia sira hodi bele lori lalais ai-moruk ne’e mai Timor.

Advertisement

Tuir nia, ai-moruk iha tipu barak mak agora stock mamuk hela, maibé atu relata kona-bá stock ne’e medikamentus em jeral iha produtu hamutuk 1.621 item mak iha hela armazen.

Tanba ne’e, laiha esperansa ida atu ema iha moras mak bele iha ai-moruk, maibé ai-moruk tenke disponível iha fatin, bainhira fabrika iha rai laran atu prodús ai-moruk ne’e oin seluk, maibé iha Timor Leste ai-moruk importa 100% hosi liur.

Entaun, tenke konsiente katak trata kompras ai-moruk iha rai laran ne’e labele hanesan ho kompras produtu sira seluk hanesan infraestrutura no seluk tán.

Jornalista Estajiáriu: Lazaro Pereira Quefi

Advertisement