Hosi: Cipriano Colo, koordenadór kobertura no Editór seniór Hatutan.com

Cipriano Colo, koordenadór kobertura no Editór seniór Hatutan.com

Hatutan.com kompleta ninia ezisténsia bá tinan-rua (20 Agostu 2021-20 Agostu 2023) hanesan mídia online iha Timor-Leste (TL) ho ninia filozofia, “notísia bá mudansa” (news for change) ho vizaun no misaun “Atu Forma Sosiedade Demokrátiku Ne’ebé Kontribui bá Dezenvolvimentu Nasionál”.

Lee Mós: Ramos-Horta: “Ha’u Lee Bebeik Hatutan.com, Notísia Kualidade no Diferente,”

Haree bá ninia filozofia, vizaun no misaun ne’e maka iha tinan-rua nia laran seidauk bele realiza ho másimu tanba iha limitasaun oioin, maibé ekipa ne’ebé sai mákina atu ezekuta misaun ne’e, esforsu nafatin ho kbiit ne’ebé iha hodi bele realiza iha tempu sira tuir-mai.

Ekipa esforsu halo ezekusaun bá filozofia, vizaun no misaun ida-ne’e ho rezultadu ki’ik balun, tanba hetan apoiu makas hosi Chief Executive Officer (CEO) Raul Dos Reis Lemos ho espoza Kris Dayanti (KD) nu’udár na’in loloos bá RAYA MEDIA & ENTERTAINMENT, Unipessoal, Lda, ho ninia matenek, brani no determinasaun atu investe, liuliu fó liberdade totál bá ekipa editoriál atu esplora no servisu independentemente iha redasaun durante tinan rua nia laran.

Ekipa redasaun Hatutan.com kompostu hosi jornalista profisionál na’in-neen ne’ebé lidera hosi Xefe Redasaun no Editór seniór, Francisco Belo Simões da Costa (karteira profisionál), Cipriano Colo hanesan koordenadór kobertura no editór seniór (karteira profisionál), Vito Salvadór (Karteira Profisionál), Rogério Pereira Cárceres (kartaun estájiu profisionál), Elio dos Santos da Costa (kartaun estájiu profisionál) no  Luciana Verdiál (jornalista no sekretária redasaun) oferese an hodi serbí públiku ho informasaun, livre hosi podér ekonómiku no goza duni independénsia editoriál.

Lee Mós: Prezensa Hatutan.com Marka Diferensa ho Karákter Reportájen Investigativu

Ekipa ne’e lidera hosi Xefe Redasaun no Editór, Francisco Belo Simões da Costa brani tebes ezekuta misaun Hatutan.com dezde prinsípiu mai to’o halo tinan-rua (2) ne’e la haree bá kuantidade produtu Jornalístiku, maibé aposta iha kualidade. Ho nune’e, notísia sira Hatutan.com nian tau prioridade liubá notísia investigativu (reportajen investigativu) ho reportajen kle’an (in-depth reporting) bá iha área polítika, ekonomia no sosiál, no konsege prodús duni produtu lubuk ida nu’udár ajenda setting rasik no konsege lori influensia bá desizaun makaer ukun sira nian.

Ekipa ne’e mós servisu ho kuidadu tebes atu tane aas Karteira profisionál ne’ebé atribui hosi Conselho de Imprensa de  Timor Leste (CI-TL), hodi la halo afiliasaun polítika ka evita subar misaun polítika iha publikasaun notísia sira.

Karákter ne’e konsege prova iha eventu polítiku boot rua tuituir-malu mak hanesan Eleisaun Prezidensiál iha tinan 2022 no Eleisaun Parlamentár 2023, bazeia bá avaliasaun hosi Diresaun Analiza Média Conselho Imprensa nian hatudu katak, Hatutan.com hatuur an iha pozisaun neutru no balansu iha ninia kobertura, hodi la hali’is bá kandidatu Prezidente ida ka Partidu polítiku ida, maski média balun hetan notifikasaun tanba iha violasaun ba kódigu étika jornalista no mós halo kobertura ka fó espasu barak liu bá partidu balun inklui bá kandidatu Prezidente Repúblika balun.

Lee Mós: Dalan sei naruk: Tinan Ida Eziste, Hatutan.com Mosu ho Deferénsia

Na’in bá empreza Chief Executive Officer Raul dos Reis Lemos. Foto/Dok.Hatutan.com

Ida-ne’e tanba konfiansa totál hosi Chief Executive Officer Raul dos Reis Lemos nu’udár investor ba Hatutan.com no mós Jenerál Manager Syeilla Surayya S. Ricardo hanesan jerente prinsipál ba asuntu administrasaun nian, nunka no nunka halo intervensaun iha redasaun nian, iha planu kobertura sira, ajenda setting redasaun nian, nune’e fó liberdade atu ekipa redasaun goza duni ninia polítika editoriál rasik tuir Lei Komunikasaun Sosiál, iha-ne’e ekipa sente duni katak, laiha intervensaun hosi podér ekonómiku no laiha intervensaun podér polítiku.

Produtu balun hosi ekipa Hatutan.com nian ho karákter investigativu no ninia prosesu sei kontinua to’o ohin loron, seidauk remata maski to’o ona edisaun 60 mak hanesan, notísia investigativu ho títulu: Deskonfia, MAPKOMS Nu’udár Prezidente FFTL Fó Projetu iha RTTL,E.P bá Sekretária FFTL.

Notísia ne’e publika iha mídia online Hatutan.com, iha 20 Janeiru 2022 to’o 27 Marsu 2023 ho nia edisaun hamutuk 60 no edisaun ikus liu ho títulu: Kazu Set-top Box RTTL,E.P, Ministériu Públiku Sei Prossesa Tuir Regra Prosesuál, ekipa sei kontinua akompaña kazu ne’e to’o hotu tanba Hatutan.com konsidera kazu ne’e fó prejuízu ba Estadu.

Hosi investigasaun bá kazu ne’e, Redasaun Hatutan.com konsege hetan presaun polítiku hosi makaer ukun sira.

Kazu ne’e mós sai barreira ba Hatutan.com ninia Business to’o taka dalan ba parte Marketing hodi la hetan iklan, inklui apoiu subvensaun ruma hosi Governu, até Governu rasik ne’ebé iha relasaun direta ho asuntu Komunikasaun Sosiál nian la rekoñese ezisténsia Hatutan.com nian iha Timor Leste.

Lee Mós: Tinan-ida Hatutan.com Serbí Públiku

Xefe Redasaun Mídia online Hatutan.com, Francisco Belo Simões da Costa, Sesta (23/06/2023), hale’u tuku 10:00 dadeer OTL, presta deklarasaun iha Ministériu Públiku (MP), hodi kumpre bá notifikasaun komparénsia (Notificação Comparência) hosi Sekretária Inspesaun Ministériu Públiku (MP) nian. Foto/Elio dos Santos da Costa.

Entidade balun ne’ebé iha relasaun direta ho notísia ne’e mós fó presaun hodi kontaktu direta bá Chief Executive Officer Raul Dos Reis Lemos atu bele intervein iha redasaun, maibé ho fuan moos no neon moos, nia rasik rejeita hodi lakohi intervein iha asuntu Redasaun nian, tanba nia rasik prefere atu buat-hotu trata ho Lei Komunikasaun Sosiál nian no husu parte sira atu uza Direitu Resposta no Retifikasaun.

Liu tán ida-ne’e, Redasaun Hatutan.com konsege hetan notifikasaun bá denunsia Kalunioza ne’ebé to’o notifika Xefe Redasaun Francisco Belo Simões da Costa hatán iha Ministériu Públiku (MP) ho nia finalidade seidauk anula to’o ohin loron.

Hatutan.com kontinua hetan notifikasaun hosi Prokuradoria Jerál Repúblika, bainhira halo kobertura ida kona-bá notísia ho títulu: Deskonfia, PGR Alfonso Lopez ho Nia Asesór Jurídiku Óscar Tavares Uza Osan Estadu Halo “Viajen Privadu” iha Portugál, maibé ikus-mai rezolve tuir dalan legál ne’ebé hatuur iha Lei Komunikasaun Sosiál nian.

Dezafiu hosi servisu independénsia média nian, liuliu buat ne’ebé ekipa Hatutan.com koko ona iha kobertura bá asuntu investigativu nian maka, susar duni iha asesu bá dadus, susar bá fontes sira atu fó sasin ka testemuña hodi koalia lia-loos tanba iha presaun oioin hosi makaer ukun sira, risku bá seguransa jornalista sira nian no seluk tán.

Produtu lubuk ida ho karákter in-depth reporting ka reportajen kle’an ne’ebé ekipa Redasaun Hatutan.com halo, konsege lori influensia balun bá desizaun polítiku sira durante ninia ezisténsia.

Perante situasaun ne’e, Hatutan.com mós hetan ona apresiasaun maka’as hosi públiku, kona-bá ninia produtu sira ne’ebé konsidera bele sai duni konsumu públiku iha kontestu Timor Leste no globál, liu-liu Prezidente Repúblika (PR), José Ramos-Horta rasik fó-sasin iha komemorasaun primeiru Aniversáriu Hatutan.com ne’ebé realiza iha Timor Plaza (20 Agostu 2022) katak, sempre lee notísia Hatutan.com no enkoraja atu ekipa ne’e kontinua mantein ho ritmu kobertura ida-ne’e, hodi la halo afiliasaun polítika maibé servi de’it públiku ho neutru, independente no imparsiál.

Ramos-Horta enkoraja ekipa atu mantein tanba publikasaun barak hosi Hatutan.com mós sai duni referénsia ba média lubuk ida ne’ebé sempre sita hanesan Ajénsia Notísia Portugal (Lusa), Indonesiatoday.co.Id, Liputan 6, www.suara.com, Malang.ayoindonesia.com, Waowsiap.com, Antaranews, Tempo.co, Detik.com, Kompas.com, Inews.belu.com, Post Kupang, Espectrum-ntt.com, kumparan.com, sindonews.com, TIMESINDONESIA.co.id, Muhamadya.org, Gatra.com, Viktorynews.id, Lintasntt.com, Rm.id, Tribunnews.com no seluk tán.

Ekipa Redasaun Mídia online Hatutan.com hasai foto hamutuk edifísiu Hatutan.com Praia dos Coqueiros, Díli, Sesta (23/06/2023). Foto/Hatutan.com.

Alende ne’e, Hatutan.com parseria ho Global Allied Comunication (GAC) Korea du Súl hodi fahe no publika notísia Lian Tetum no mós Lian Korea nian ne’ebé kooperasaun ne’e sei kontinua to’o ohin loron.

Ho korajen hosi públiku no Prezidente Repúblika rasik, hafanu duni espíritu ekipa ne’e hodi kontinua haforsa planu kobertura no aposta bá kualidade iha produtu Jornalístiku sira, hodi hahú dezenvolve rede ho entidade hotu-hotu liuliu fontes sira atu hetan konfiansa liu tán.

Realidade ida hosi kualidade publikasaun sira ne’e maka iha tinan 2022, Média online Hatutan.com selesionadu hanesan manán-na’in ka primeiru lugár iha kompetisaun bá produtu Jornalístiku di’ak liu, kona-bá tinan-10 ezisténsia Telkomcel iha Timor Leste (TL).

Empreza Telekomunikasaun hosi Indonézia, Telkomcel mós oferese asesu gratuita bá kliente sira ne’ebé utiliza sim card Telkomcel no hakarak lee notísia iha portál média online Hatutan.com la uza pulsa no pakote internet.

Telkomcel agradese tanba bele hetan konfiansa hosi ekipa Hatutan.com hodi realiza Memorandum of Undersatnding (MoU) ida-ne’e atu bele kontribui ba dezenvolvimentu povu no nasaun Timor-Leste (TL) nian.

Espetativa, esperansa no espíritu mandatu bá Hatutan.com atu serbí povu ida-ne’e hodi hakonu públiku ho informasaun, sai nafatin fonte informasaun ho kredivel iha eskalaun nasionál, rejionál no internasionál.

Hatutan.com nu’udár meiu komunikasaun sosiál ne’ebé eziste duni iha Timor-Leste ho karákter multimedia ne’ebé bele mós sai sentru opiniaun públiku, forum diskusaun no mós sentru edukasaun-formasaun peskiza no dezenvolvimentu komunikasaun aplikada.

Iha tinan-rua nia laran ne’e, Hatutan.com hanesan mídia ida ho plataforma digital (online)  buka hala’o nia knaar ho objetividade no independente  tuir norma ka baze legál sira ne’ebé estabelese ona iha Timor-Leste, liuliu kódigu étika, Lei Komunikasaun Sosiál  no prinsípiu universál jornalizmu nian.

Prezidente Repúblika, José Ramos-Horta foto hamutuk ho ekipa Mídia Hatutan.com. Foto/dok.Hatutan.com

Hatutan.com eziste ho hakarak de’it mak kontribui bá hametin Estadu Demokrátiku, hala’o funsaun kontrola sosiál no importante liu mak hakonu públiku nia informasaun no promove Liberdade ko’alia no Informasaun nian iha Artigu 40 Konstituisaun RDTL ho Artigu 41 kona-bá Liberdade Imprensa.

Hatutan.com iha nia forsa traballu hamutuk na’in-sia (9) ho nia kompozisaun mak hanesan; na’in-neen (6) koloka iha Redasaun nu’udár jornalista no editór, no na’in-tolu (3) iha multimedia (Hatutan Podcast) no administrasaun.

Hosi Diresaun Komunikasaun no Informátika  no administrasaun, finansa, lojístika  nian,  lidera hosi Syeilla Surayya S. Ricardo nu’udár Jenerál Manager,  Laurentina Pires de Jesus (Responsavel Podcast & Radio Streaming), Eligio Moniz do Rego (Web developer) ho Gabriel Nelson do Nascimento (Videographer no editór iha Hatutan Podcast).

Hatutan.com iha nia consultant jurídiku ka apoiu jurídiku ne’ebé lidera hosi Advogadu Adérito Fernandes dos Reis, ne’ebé sempre fó opiniaun jurídiku ka paresér jurídiku  bá Konsellu Redasaun kona-bá notísia sira Hatutan.com nian, liuliu notísia sira ho karater investigativu.

Dr. Adérito Fernandes dos Reis, mós prontu fasilita asisténsia legál bá pessoál jornalista Hatutan.com ne’ebé enfrenta kazu legál ruma iha Tribunál relasiona ho publikasaun no produtu Jornalístika ne’ebé publika iha portál Hatutan.com.

To’o oras-ne’e Hatutan YouTube hetan ona Subscribers hamutuk 26.233.  Gráfiku Views iha Channel Hatutan, Views Podcast Best 198.012, Views News Hatutan 70.553. Ho asesu hosi nasaun oioin iha kontinente sira ne’ebé eziste iha mundu.

Website Gráfiku 24 Oras hetan 4.376 views no to’o oras-ne’e iha ona vizióor ba Hatutan Website Hamutuk 2.893.2023.

Iha esperansa boot hosi públiku bá Hatutan.com atu kontinua sai nafatin “pioneiru” (pelopor) média online ho publikasaun notísia sira ka produtu Jornalístiku sira ho kredivel, balansu no independente. Nune’e, ho tinan-ida ne’e, aproveita momentu sira tuir mai atu maduru liután, kontinua kriativu no inovativu. ***